Jakoob jyaˈty Arán

¿MNIJÄˈÄP pënë tyäˈädë yetyëjkëty diˈib yam mëdë Jakoob myaytyäˈäktë? Të netyë Jakoob tyuˈuyoˈoynyë kanäk xëë, ko tpatyë tyäˈädë yetyëjkëty mä tuˈugë nëgoondakn byorreegë kuentˈattë. Ta Jakoob dyajtëëjy: ¿Mä mtsoondë?

Ta yˈatsoodë: Arán.

Ta Jakoob dyajtëëjy: ¿Mˈixyˈäjttëbë Laban?

Ta yˈatsoodë: Nˈixyˈäjttëbëts, ix tëxii myinyë nyëëx Rakel mët tukajpëˈëgë borreegë. ¿Mbäät xyˈixyë Rakel ko tam myiny?

Ko Jakoob tˈijxmiinyë Rakel mëdë may byorreegë, ta ojts nyejxy mä ja nëgoondakn ets tˈagëëytyuty ets ja borreegë nyëˈuuktët. Ta netë Jakoob ojts ttsuˈkxyë Rakel ets tˈanmääjy pënë dëˈën yëˈë. Ja Rakel jyantsy xyondaky, ta ojts nyejxy mä tyëjk ets ttukmëtmaytyakyë tyeety.

Laban jotkujk jyantsy nyayjäˈäjë ko ja Jakoob jyënany wyëˈëmäˈäny mä tyëjk. Ets nan xondak ko yˈanmääyë tpëkäˈänyë Rakel. Per ta Laban tˈanmääyë Jakoob ets tnidunëdë Rakel jëxtujk jëmëjt. Jakoob nyiduun dëˈënë Rakel yëˈko mëk ttsojky. Per ¿mnijäˈäp pënë Laban kyëyäjk ko tpaty ja tiempë etsë Jakoob tˈaxäjëdë nyëdoˈoxy?

Yëˈë kyëyäjkë Lea, ja myëj nëëx. Kyaj yëˈëjëtyë Rakel. Jaanëmë Jakoob yajmooyë Rakel ets tnëdoˈoxyˈattët ko tkupejky tˈaknidunët nan ja jëxtujk jëmëjt. Mä tadë tiempë Dios nyasˈijxë etsë yetyëjk tmëdatët kanäägë nyëdoˈoxy. Per tyamë Biiblyë jyënaˈany ko yetyëjk jeˈeyë mbäät tmëdaty tuˈugë nyëdoˈoxy.