Ja nimaybyë yˈuˈunk yˈënäˈkë Jakoob

OK IXË tyäˈädë may uˈunk may ënäˈk. Yëˈë nimäjmajtskë myäängë Jakoob. Nan myëdäjt nandëˈënë nyëëx. ¿Mnijäˈäp tijaty txëˈäjtyë yˈuˈunk yˈënäˈkë Jakoob? Min nˈokˈijxëm.

Lea yëˈë yajmaxuˈunkˈäjtë Ruben, Simeonk, Leví, etsë Judaa. Ets ko ja Rakel kyaj ti ja yˈuˈunk tpaty ta jyotmaytyuktëjkë. Päätyë Rakel tmooyë Jakoob ja tyuumbë Bilaa etsë Bilaa yëˈë yajmaxuˈunkˈäjtë Dan mëdë Neftalii. Ta netë Lea tmooyë Jakoob ja tyuumbë Silpaa ets ja Silpaa yëˈë yajmaxuˈunkˈäjtë Gad mëdë Aser. Ok ta Lea tpaty ja nimajtskë myäänk Isakar mëdë Zabulon.

Ok taanëmë Rakel tpaty tuˈugë myäänk, diˈibë tyukxëˈäjt Josee. Ok nijawëyäˈänëmë jyukyˈäjtënë Josee ets wiˈix jyajty mëj. Tyäˈädë dëˈënë yˈuˈunk yˈënäˈkë Jakoob nimäjktuˈuk diˈib maxuˈunkˈäjt ko nety jam tsyëënë mä Labangë tyëjk.

Jakoob nan myëdäjt niganäägë nyëëx, perë Biiblyë jeˈeyë tmaytyaˈaky tuˈuk diˈib xyëˈäjt Dina.

Ta ja tiempë tpaty mä ja Jakoob ttukniwinmäˈäyë tmastuˈudäˈänyë Laban ets jyëmbitanë Kanán. Ta dyajnaymyujktääyë yˈuˈunk yˈënäˈk, ja tsyiip byorreegë, ja jyëyujk tsyäjkää, ets ta net tyuˈudëjkëdë.

Të netyë Jakoob mëdë yˈuˈunk yˈënäˈk tyëjkëndë mä nyaxë Kanán, ko ja Rakel tpaty ja tuˈugë yˈuˈunk. Per axëëk jyajty, pes oˈk mä nety jamë yˈuˈunk dyajmaxuˈunkˈaty. Per ja uˈunk kyaj wiˈix jyajty. Jakoob ja ttukxëˈäjty Bejamingʉ.

Minë net nˈokjamyajtsëm tijaty txëˈäjttë ja nimäjmajtskpë myäängë Jakoob, yëˈko yëˈë ojts myayëndë ets jyäjttë tuˈugë mëj käjpn diˈib yajxëëmoojy Israel. Tyäˈädë Israel gäjpn ja ojts wyaˈkxy mäjmajtsk peky, mäjk yajxëëmoojy dëˈën extëmë Jakoob nimäjkë myäänk txëˈäjttë ets majtsk dëˈën extëmë Josee myäänk. Isa̱a̱ jeky yˈakjukyˈajty ko niˈamukë tyäˈädë ënäˈk myaxuˈunkˈäjtääytyë, mbäät nˈokwinmäˈäyëm wiˈix jotkujk tyim nayjäˈäjë ko tˈijxy nimayë yˈokˈënäˈk. Per min nˈokˈijxëm wiˈix jyajtyë yˈok Dina.