Job kyaj tmëdëgooyë Dios

¿MBAˈAYOOBYË tyäˈädë pumäˈäy jyaˈay? Ja txëˈäjty Job, etsë tadë toxytyëjk yëˈë nyëdoˈoxyˈäjt. ¿Mnijäˈäp wiˈix jam tˈanëëmë Job? Mëgäjxtëgoyë Dios ets mˈoˈknët. Min nˈokˈijxëm tiko dëˈën tˈamääjy ets tidën ko dëˈënë Job yˈayoojy.

Job yëˈë tuˈugë jäˈäy diˈib kyaj tmëdëgooyë Jyobaa, xëmë tmëmëdoojy. Jam tsyënääjy Us, tamyë tmëwingonëtyë Kanán. Jyobaa mëk tjantsy tsyojkyë Job, per tamë nety tuˈugë jäˈäy diˈib axëkˈijxëp. ¿Mnijäˈäp pën?

Yëˈë Satanás tadë Mʉjkuˈugópk. Jamyats ko tyäˈädë anklës yëˈë diˈib yˈaxëkˈijxypyë Jyobaa. Yëˈë diˈib yajtuundëgooyë Adán mëdë Eevʉ, ets wyinmääjy ko mbäät niˈamukë jäˈäy ttukmastuˈutyë Jyobaa. Per ¿tyukpëtsëëmëdaa wyinmäˈäny? Kyaj. Pes mijts kanääk kujk xynyijawë jäˈäy diˈib ninäˈä tkamastuttë Dios. ¿Mjamyejtsypy tijaty txëˈäjttë?

Ko ja Jakoob ets ja Josee ojts yˈoˈknëdë jap Ejiptʉ, Job yëˈë diˈibë net xëmë myëduunë Jyobaa. Jyobaa yëˈë nety tyukˈixaambyë Satanás ko yëˈë kyaj tmëmadaktäˈäyëdë jäˈäy ets axëëk dyaˈadëˈëtsët, pääty tˈanmääjy: Të xyˈixyë Job. Ok ix wiˈixëts yëˈë xëmëts xymyëmëdoy.

Ta Satanás yˈatsoojë: Aa per pääty mëmëdoyëty yëˈko mijts xykyuniˈxy ets mëjwiin kajaa tijaty xyjantsy xymyoˈoy. Per ko xypyëjkëtyaˈayët ta mastuˈudäˈänyëty.

Päätyë Jyobaa yˈanmääyë: Nëjx pëjkëtyaˈay tëgekyë diˈib myëdäjtypy, ets tun wiˈix xytyim tunäˈäny. Ets nˈokˈijxëm aber pën xymyastutpëts. Jeˈeyë ko exkëm myaˈook.

Diˈib tim jawyiinë Satanás tyuun yëˈë etsë Job ja jyëyujk tsyäjkää etsë kyameyë yajwijtskaktäˈäyët. Ets ja byorreegë yˈoˈktäˈäyët. Ta net dyajmiinyë mëk poj diˈib ja nimäjkpë yˈuˈunk yˈënäˈk yaˈoˈktääyë. Ok, ta dyajpäˈämbejtyë Job, mëk jyantsy yˈayoojy. Päätyë nyëdoˈoxy yˈanmääyë: Mëgäjxtëgoyë Dios ets mˈoˈknët. Perë Job kyaj tmëgäjxtëgooyë Dios. Nandëˈën nyimiinë nidëgëëgë jäˈäy diˈibë nety kyaj yˈoymyëtnaymyaayëbëty, ets yˈanmääyëdë ko axëëgë nety yëˈë të jyukyˈaty. Perë Job ninäˈä tkamëdëgooyë Dios.

Jyobaa jotkujk jyantsy nyayjäˈäjë ko Job kyaj myastutë, pääty ok ta ojts tkuniˈxy extëm xyˈixy mä tyäˈädë dibujë. Job ta ojts yˈagëdaknë ets ta jatëgok tmëdäjty nimäjkë yˈuˈunk yˈënäˈk, ets majtsk dëˈënën ojts myayë ja jyëyujk tsyäjkää, ja byorreegë ets ja kyameyë.

¿Mëdunaampy xëmë Jyobaa extëmë Job? Pën mëduumpy xëmë ets kyaj xymyëdëgoy, nëjxëp nandëˈën mguniˈxyëty. Nëjxëp mjukyˈaty winë xëë winë tiempë ko netyë tyäˈädë Naxwinyëdë të jyëmbity jantsy tsuj extëm ja it lugäär diˈib xyëˈäjt Eden.