¿Pënën Jobˈäjt?

Job, yëˈë tuˈugë yetyëjk diˈib yˈawdäjtë Jyobaa ets tsyënääy Uz. Jantsy mëkjäˈäy yˈijty ets nimayë fyamilyë. Nan oyjyaˈay, pyudëjkë ayoobë jäˈäy, kuˈookytyoxytyëjk ets ja ënäˈkuˈunk diˈibë nety kyaj tyääk tyeety. Job nan tyukmëduunë oyˈäjtënë jäˈäy. Wiˈix mˈokwinmay, ¿päätyëdaa nety ninäˈä tkamëdatäˈänyë amay jotmay?

Job kyaj tnijäˈäwë, per yëˈë netyë Satanás diˈib jam ijx tuunëp. Jyobaa ta tˈanmääyë Satanás: “¿Të xyˈixyë Job diˈibëts xymyëduump? Kyaj jap pën duˈun naxwiiny. Yëˈë xymyëmëdoowbëts ets oy jyaˈayˈaty”. Satanás ta yˈatsoowë: “Mëmëdoyëty mët ko xykyuentˈaty ets xykyunuˈkxy, mmoobyë nyax kyam etsë jyëyujk yˈanimal. Per okpëjkëtyaˈay tijaty myëdäjtypy, ta kyaj mnekyˈawdatäˈänyëty”. Jyobaa ta yˈanmääyë: “Mbäät xyˈokˈijxmatsy, per kyaj xyaˈoogët”. Jyobaa ta tnasˈijxë etsë Satanás tˈijxmatsëdë Job, ¿mnijäˈäwëp tiko? Yëˈko ijtpë nety seguurë ko Job duˈunyëm myëmëdowäˈänyëty.

Satanás wiˈixëmë Job tjantsy ayoˈonmooy parë tˈijxmäjtsy. Tim jawyiin, ojts tkexyë jäˈäyëty diˈib yajtijtëp sabeos parë ojts twijtskakëdë ja jyëyujk animalë Job extëmë bakë, toorë etsë burrë. Ok, ta jëën ojts kyaˈay ets tyooytyaay ja borreegë. Ta net tuk grupë jäˈäy diˈib tsoˈondëp Caldea ojts wyijtskaktäˈäyxyëty ja kyameyë. Nan oˈktääy ja tyuumbëtëjk diˈibë nety jam kyuentˈäjttëbë jëyujk animal. Per ja jotmayë mas kajaabë, yëˈë ko yaˈˈanmääy: të yˈoˈktäˈäytyë ja mˈuˈunk mˈënäˈk, pes tapë nety kyay yˈuuktë ko të nyijijtpattë. Job jantsy mon tuk nyayjäˈäwë, per duˈunyëm tˈawdäjtyë Jyobaa.

Satanás niˈigyë ttsojky etsë Job yˈayowët, pääty dyajpäˈämbejty ko puˈuts tyukpëtsëëmdääyë diˈib mëkë jäj jëmuˈumën mooyë. Job kyaj nety tnijawë tiko duˈun axëëk jyaty kyëbety, per duˈunyëmë Jyobaa tˈawdäjty. Ko duˈunë Jyobaa tˈijxy, ta jantsy jotkujk nyayjäˈäwë.

Ok, ta Satanás tkejxy nidëgëëgë yetyëjk parë nëjkx tˈakˈijxmatstë Job. Ta yaˈˈanmääy: “Seguurë ko të mbokytyuny ets mguyuˈutsaambyë net. Päätyë Dios duˈun mdëytyunyëty”. Job ta yˈatsooy: “Kyajts ti axëkˈäjtën të nduny”. Per ok, ta wyinmääy ko yëˈë Jyobaa pyoky ko axëëk jyaty kyëbety ets jyënany ko Dios kyaj ttunyë tëyˈäjtën.

Tuˈugë mixy diˈib xyëwˈäjtypy Elihú, të nety jeˈeyë tmëdoowˈity wiˈix myaytyäˈäktë. Per ta kyajpxytyuktëjkë ets jyënany: “Kyaj tyëyˈäjtënëty extëm mjënäˈändë. Jyobaa mëj yˈity extëm kyaj ndimpawinmäˈäyëm, yëˈë ninäˈä ti tkatunët diˈib axëëk. Yˈijxypy tukëˈëyë ets pyudëjkëbë jäˈäy ko dyajnaxyë amay jotmay”.

Jyobaa nan myëtmaytyakë Job. Duˈun tˈanmääy: “¿Mä nety myajpääty kots ojts nyajkojˈyë tsäjp etsë nax? ¿Tiko mwinmay ko kyajts ndunyë tëyˈäjtën? Alokë mgajpxy kyaj xynyijawë ti tuun jäjtëp”. Job yˈëxkäjpë tyëgoˈoyën ets jyënany: “Tëts ndëgoy, maˈkx extëmëts të njënäˈäny. Tëts mijts nmëdoyˈaty, per tyam njantsy yˈixyˈajtypyë net, ets tëts nˈixy ko mijts, mbäät tukëˈëyë tijaty xytyuny”.

Ko Job ttuknäjxtääy ja amay jotmay, ta Jyobaa yaˈˈagëdakë ets mas niˈigyë tijaty myooyë ets këdiinëm diˈibë nety të dyajtëgoy. Job jeky jyukyˈajty ets agujk jotkujk. Jyobaa ojts kyunuˈkxyëty mët ko xëmë myëmëdoowë, oy ojts tsyiptakxëty. Ets mijts, ¿duˈun mjäˈäyˈatäˈäny extëmë Job ets xëmë Jyobaa xyˈawdatäˈäny oy ti tyun jyatëdët?