Ti tyuundë ets ja Moisés kyaj yˈoogët

OK IXË tyäˈädë mixyuˈunk diˈib yam jantsy yaxp, tam tkëˈëmëmatsë tadë kiixy. Ja txëˈäjty Moisés. ¿Ets mnijäˈäp pënë tadë kiixyë jantsy tsujpë? Yëˈë reyë nyëëx diˈib jap Ejiptʉ.

Ja Moisesë tyääk ja myëdäjtë tëgëk poˈo yuˈutsy, pes kyaj ttsojky ets ja Ejiptʉ jäˈäy yaˈoogëdët. Per winmääjy ko mbäät ja jäˈäy ok pyaatyëty. Pääty min nˈokˈijxëm ti tyuun ets ja Moisés kyaj yˈoogët.

Dyaˈoˈoyë tuˈugë katsy extëm kyaj mbäädë nëë tyuktëkëty. Ta tˈagoˈkë jap ja Moisés, ta ojts tmënejxy mä ja nëë diˈib xyëˈäjtypy Nilo, ta tpëjtaky nëbëˈääjy mëëyoty. Etsë Miiriam ja Moisesë tsyëˈë jamyë wingon ojts wyeˈemy, ets tˈixäˈäny wiˈix ja Moisés jyaty.

Ko waanë yˈijty ta myiiny tsiibë ja Faraongë nyëëx. Ta tˈijxpaty ja katsy nëbëˈääjy. Ta tˈanmääjy tuˈugë tyuumbë: Nëjx okˈyajminë tadë katsy. Ko tˈajujptuty, ta tkuˈijxë tuˈugë mixyuˈunk jantsy tsujtiˈknë, jantsy yaxpë nety jap, ta ja Faraongë nyëëx pyaˈayoojë ets kyaj ttsojky ets yˈoogët.

Ta netë Miiriam tnimiiny ja Faraongë nyëëx, extëm yam xyˈixy mä tyäˈädë dibujë, ta tˈanmääjy: ¿Mtsojkypy etsëts nëjx nwojy tuˈugë israelitë toxytyëjk diˈibë tyäˈädë uˈunk yajˈyaagëp? Ta yˈatsoojë: Oy tunë mayˈäjtën.

Ta ja Miiriam pëyeˈegyë ojts jyantsy nyejxy ta ojts tˈanëëmë ja tyääk. Ko ja tyääk myiiny mä ja Faraongë nyëëx ta yˈanmääyë: Mënëjxë tyäˈädë uˈunk ets yajˈyaak yajpat, ets nmëjuyëbëts mijts.

Päätyë Moisés yëˈë tyääk yajˈyaˈkë. Ets ko ojts yaˈknäjxnë, ta ojts yajmënëjxnë mä ja Faraongë nyëëx, diˈibë net ojts yˈuˈunk niwanënë. Päätyë Moisés jam yeˈky pyejty mä ja Faraongë tyëjk.