Tiko yamë Moisés kyeˈeky

OK IXË Moisés tam kyeˈeky Ejiptʉ. ¿Mˈijxypyë tadë jäˈäy diˈib jam pabooyëdëp? ¿Mnijäˈäp tiko dyaˈoogandë Moisés? Min nˈokˈijxëm ets nijäˈäjëm.

Moisés jam yeˈky mä Faraongë tyëjk, ja diˈib anaˈamp Ejiptʉ. Ta jyajty mëj ets wijy jyaˈay. Moisés nyijäˈäbë nety ko yëˈë kyaj yˈEjiptʉ jäˈäyëty, ets ko yëˈë tyääkˈäjty tyeetyˈajtypyë israelitë diˈibë nety jap yajtuumbëˈäjt yajmosëˈäjttëp.

Tuˈugë xëë ko ja Moisés tmëdäjty 40 jyëmëjt, ta tyuktëjkë tsojkën ets nëjx tkuˈixäˈäny ja kyäjpn. Ta tˈijxy ko axëëgë nety jap jyattë. Ets ko tˈijxy tuˈugë Ejiptʉ jäˈäy tjantsy tsyiigyë israelitë, ta yˈijxˈawdijty pën kyaj mä pën yˈixyëty, ta dyaˈoˈky ja jäˈäy ets ta tpuˈunijäˈxy.

Ja kum bom ta Moisés jatëgok ojts nyejxy mä ja kyäjpn. Yëˈë pyudëkëyaambyë nety ets kyaj nyekyyajtuumbëˈat nyekyyajmosëˈattët. Ta tˈijxy majtskë israelitë jyantsy nyaytsyiigëdë, ta tˈanmääjy diˈibë nety jamë myëguˈuk axëëk tyuumpy: ¿Tiko mëguˈuk xytsyiiky?

Ta yˈatsoojë: ¿Pën të mbëjtaˈagyëty yajkutujkpë etsëts xyˈanaˈamdët? ¿Ti dëˈënëts xyaˈoogäˈäny extëm ëxëˈëy xyaˈoˈky ja Ejiptʉ jäˈäy?

Ta ja Moisés tsyëˈkë, pes të nety ja jäˈäy tnijawëdë ko yëˈë të dyaˈooky ja Ejiptʉ jäˈäy. Ets ko ja Faraón tnijäˈäjë ta ojts tniˈanaˈamë ets ja Moisés yˈoogët. Päätyë Moisés kyakpëtseemy Ejiptʉ.

Ko Moisés kyeky Ejiptʉ jagam ojts jyantsy nyëjxnë, ta jyajty mä nyaxë Madyan. Ets jam tˈixyˈajtyë fyamilyë Jetro, ok ta ojts pyëjknë mët ja Jetro nyëëx diˈib xyëˈäjt Sipora. Ta tyëjkë mëborreegë kuentˈäjtpë mä Jetro. Jam Madyan ja tsyënääjy 40 jëmëjt. Ets ko ja jyëmëjt tmëdäjty 80, ta ja jyukyˈäjtënë tyëgäjtsy mä nety jam byorreegë kuentˈaty. Min yaptsoo nˈokˈijxëm ti diˈibë Moisesë jyukyˈäjtënë yajtëgäjts.