Ja ujts diˈib yaˈamp

MOISÉS jamë nety të jyaˈty mët ja byorreegë mä ja kopk diˈib xyëˈäjtypy Oreb. Jam tˈijxy tuˈugë ujts jyantsy yeeny, per ja ujts kyaj tyoy.

Ta ja Moisés wyinmääjy, per tidaa ko kyaj tyoy, minëts nˈokˈixy. Ta ko tmëwingoony, ta tmëdoojy tuˈugë ayuk pyëtsemy mä ja ujts: Katë mnekymyiny. Janë mgëˈëk, yëˈko wäˈätsë tyäˈädë nax mä mdanë. Yëˈëdëmë netyë Dios mëgäjxëp mët yëˈëgyëjxmë yˈanklës, päätyë Moisés ojts nyaywyingubaˈanëty.

Ta Dios yˈanmääyë: Nˈijxˈayoobyëtsë ngäjpn jap Ejiptʉ ets yëˈëts nyaˈawäˈätspëtsëmaampy, päätyëts mijts ngexy ets nëjx jap xyajpëtsemy. Jyobaa jamë netyë kyäjpn dyajnëjxäˈäny Kanán mä ja lugäärë tsujpë.

Per ja Moisés yˈatsoojy: ¿Pënëts ëjts etsëts nëjx nyajpëtsemy Ejiptʉ? Ets pën xyˈanmääytyëbëts, ¿pën të mgexyëty? ¿Wiˈixëts nˈatsowët?

Ta Dios yˈanmääyë, dëˈën xyˈatsowët: JYOBAA diˈib Diosˈäjtë Abra̱a̱n, diˈib Diosˈäjtë Isa̱a̱ ets diˈib Diosˈäjtë Jakoob yëˈëjëts të xykyexy. Ta Jyobaa yˈakjënany: Dëˈëntsën nxëˈaty winë xëë winë tiempë.

Ta ja Moisés yˈatsoojy: ¿Per pën kyaj tmëbëktë kots mijts të xykyexy?

Ta Dios yajtëëjë: ¿Ti jam mëdäjtypy mgëˈëjoty?

Ta Moisés yˈatsoojy: Tuˈugë kepy.

Ta Dios yˈanmääyë: Naskapë tadë kepy. Ko tnaskäjpë ta jyëmbijty tsäˈäny. Ta netë Jyobaa tyukˈijxë ja tuˈugë mëjˈäjtën. Ko yˈanmääyë: Kuxäjë mwitoty. Ta ja Moisés ojts kyuxäjë ets ko tjuˈty ja kyëˈë ta tˈijxy jantsy poobëm dëˈën extëmxyëbë leprë päˈäm pyaatyëty. Ta Jyobaa yˈanmääyë: Nmoˈoyaambyë mëjää ets xytyunët ja tuˈugë mëjˈäjtënë. Ets yëˈë tunäämp ets ja israelitëty tmëbëktët ko ëjts mijts të ngexy.

Ok ta ja Moisés jyëmbijty mä tyëjk ets tˈanmääyë Jetro: Kajxkëts Ejiptʉ etsëts nëjx nˈixyë njiiky nmëguˈuk. Ta Jetro kyajxë, ta Moisés ojts nyëjxnë Ejiptʉ.