Nˈokˈyaˈijxëmë mëbëjkën extëmë Moisés

“Mëbëjkëngyëjxm ja Moisés ko oj yaˈknë, kyaj tkupejky es yaˈˈandijët ko myäänkˈatyëty ja reyë nyëëx.” (EB. 11:24)

¿TI XYTYUKNIˈˈIJXËMË MOISÉSË YˈIJXPAJTËN MÄ...

... wiˈix tyëgatsyëty ko jäˈäy twinmay diˈib jeˈeyë tuk tsojk tyukˈoyˈatëp ets diˈib winë xëë winë tiempë?

... wiˈixë Jyobaa xypyudëjkëm parë nguytyuˈunëm tijaty të xytyuknipëjkëm?

... tiko jyëjpˈamëty nbëjtakëmë jot winmäˈäny mä ja kumäˈäyën?

1, 2. 1) ¿Ti tyuunë Moisés ko netyë jyëmëjt 40? (Ixë dibujë mä tsyondaˈagyë tyäˈädë artikulo.) 2) ¿Tiko Moisés yˈayowany mëdë Diosë kyäjpn?

MOISÉS nyijäˈäwëbë nety tijaty mbäät tˈixy tpääty Egipto. Pes të nety ja reyë nyëëx yˈuˈukniwäˈänyëty ets yˈixyˈajtypyë nety ja mëkjäˈäyë jyëën tyëjk. Kom yëˈë yaˈëxpëjkë wijy jyaˈayëty diˈib Egipto, seguurë ko nan yˈëxpëjkë matematikë, wiˈix yajkojˈyë jëën tëjk, yˈëxpëjkë mëtsäˈä o wiinkpë ayuk ets nan waˈan tˈakniˈëxpëjkë tijaty (Apos. 7:22). Mbäädë nety yˈity mëkjäˈäy, tmëdatyë kutujkën, etsë mëjˈäjtën diˈib nituˈugë Egipto jäˈäy mbäät duˈun tkamëdaty.

² Per oy duˈunë Moisés tijaty tjamëdäjty, ko netyë jyëmëjt 40, ta ttuuny diˈibë faraon mëdë fyamilyë kyaj tjaygyujkë. Kyaj jyukyˈatany extëmë Egipto jäˈäy, niˈigyë twinˈijxy yˈayowäˈäny extëmë tuumbë mosë. ¿Tiko? Yëˈko myëdäjtë mëbëjkën (käjpxë Ebreeʉsʉty 11:24-26). Pääty kyaj yëˈëyë tˈijxy ja mëkjäˈäyˈäjtën diˈibë nety jamˈäjtp. Myëbëjkë Jyobaa diˈib “nipën mbäät tkaˈixy” ets ijt seguurë ko kyuytyunaambyë wyandakën (Eb. 11:27).

3. ¿Diˈibatyë yajtëˈëwën yaˈˈatsoojëmbitäämp mä tyäˈädë artikulo?

³ Duˈun extëmë Moisés, nan tsojkëp mëbëjkëngyëjxm nˈijxëmë Jyobaa ets kyaj yëˈë nˈijxëm tijaty yä Naxwiiny. Tsojkëp nmëdäjtëmë mëbëjkën (Eb. 10:38, 39). Pääty, min nˈokˈijxëm wiˈix yajnimaytyaˈagyë Moisés mä Ebreeʉsʉty 11:24-26 parë nyajkëktëjkëmë mëbëjkën, ets nˈokˈatsoojëmbijtëmë tyäˈädë yajtëˈëwën: ¿Wiˈixë Moisés pyudëjkë mëbëjkën parë ojts tjëjpkudijë tijatyë niniˈkx këbäjk tsyejpy? Ko jäˈäy kyakupëjkëdë, ¿wiˈix pyudëjkë mëbëjkën parë niˈigyë dyajtsobaty ko Jyobaa tmëduny? ¿Ets tiko Moisés tˈawijxy ko kyumayaˈanyëtyë Dios?

JYËJPKUDIJË TIJATYË NINIˈKX KËBÄJK TSYEJPY

4. ¿Wiˈixë Moisés tjaygyujkë nuˈunën ja poky yajtukxondaˈaky?

⁴ Mëbëjkëngyëjxmë Moisés tjaygyujkë ko jeˈeyë tuk tiempë yajtukxondaˈagyë poky. Per mbäädë wiinkpë kyaj duˈun wyinmääytyë. ¿Tiko? Yëˈko Egipto, yëˈë nety tuˈugë paˈis diˈib wäˈkpëtsëëmp abëtsemy nyaxwinyëdë, oyë nety jam të myëjwindëkë brujëˈäjtk ets tˈawdattë mayë dios, mientrës ja Dios mëduumbëty jeˈeyë nety yajtuumbëˈat yajmosëˈattë. Perë Moisés nyijäˈäwëbë nety ko Dios yaˈoyëyaambyë tyäˈädë jotmay. Pënatyë nety tyukxondaktëbë jyukyˈäjtën, duˈunë nety kyëxëˈëky ko oybyëtsëëmp tijaty tyuundëp, perë Moisés ijt seguurë ko kutëgoyandëbë netyë axëkjäˈäytyëjk. Pääty kyaj tyuundëgooy parë “tuk tsojk pekyoty xyondäˈägët”.

5. ¿Wiˈix mbäät njëjpkudijëm parë kyaj nxondakëm “tuk tsojk pekyoty”?

⁵ ¿Wiˈix mbäät njëjpkudijëm parë kyaj nxondakëm “tuk tsojk pekyoty”? Ko njamyajtsëm ko jeˈeyë tuk tsojk yajtukxondaˈaky. Ets mëbëjkëngyëjxm nˈijxëm ko “tijaty yä naxwiiny näjx këjxp, ets nanduˈunë tsyojkën” (1 Juan 2:15-17, Traducción del Nuevo Mundo [TNM]). Nˈokpawinmäˈäyëm wiˈix jyatäˈändë axëkjäˈäy diˈib kyaj jyodëmbittë diˈib yajpattëp “mä nax diˈib nokts” ets axëëk jyatäˈändë (Sal. 73:18, 19). Ko nnayjäˈäwëm nbokytyunäˈänëm, nˈoknayajtëˈëwëm: “¿Tijëts naytyukmëtsojkëp?”.

6. 1) ¿Tiko Moisés “kyaj tkupejky es yaˈˈandijët ko myäänkˈatyëty ja reyë nyëëx”? 2) ¿Tiko mwinmay ko Moisés yëˈë tyuun diˈib oy?

⁶ Ko Moisés tmëdäjtyë mëbëjkën, yëˈë pudëjkë parë twinˈijxy ti tyunaampy. “Mëbëjkëngyëjxm ja Moises ko oj yaˈknë, kyaj tkupejky es yaˈˈandijët ko myäänkˈatyëty ja reyë nyëëx.” (Eb. 11:24.) Moisés kyaj wyinmääy yˈitäˈäny mëj mä ja rey parë net tmëdunëdë Dios ets dyajtunët ja mëkjäˈäyˈäjtën ets ja kutujkën parë tpudëkët ja israelitëty. Yëˈë mëk ttsejkyë Jyobaa ets pyëjtakë wyinmäˈäny parë tmëdunäˈäny amumduˈukjot mët tukëˈëyë jyot myëjää etsë nyiniˈkx kyëbäjk (Deut. 6:5). Ets kom oy diˈib wyinˈijx, ta kyaj dyajnäjxyë jäj jëmuˈumën. Ja mëkjäˈäyˈäjtën diˈibë nety të tmastuˈuty extëmë oorë, platë, ojts ok ja israelitëty kyëdëkëdë (Éx. 12:35, 36). Faraon ojts yuunk nyaxypyë ets yˈoˈky mët yëˈëgyëjxmë Jyobaa myëjää (Sal. 136:15). Perë Moisés duˈunyëmë Jyobaa yajtuunë parë tnëˈëmooy ttuˈumooyë kyäjpn ets dyaˈˈawäˈätspëtsëëmy. ¡Jantsy oy wyimbëtsëëmy tijaty tyuun!

7. 1) Extëm jyënaˈanyë Matewʉ 6:19-21, ¿tiko mbäät xywyinmay ja tiempë diˈib miin këdakp? 2) Nimaytyäˈäk mët tuˈugë eksperiensyë wiˈix tyëgatsyëty ko jäˈäy twinmay diˈib jeˈeyë tuk tsojk tyukˈoyˈatëp ets diˈib winë xëë.

⁷ Pën mˈënäˈkˈäjtp ets mmëduumbyë Jyobaa, ¿wiˈix mbäät mbudëkëtyë mëbëjkën parë xywyinˈixët ti mdunaampy mä mjukyˈäjtën? Oy ko xywyinmayët ti mdunaampy mä tiempë myiny kyëdaˈaky. Mmëbëk tijatyë Dios wyandakypy ets tunë mëjää parë xypyäädët diˈib mdukˈoyˈatëp winë xëë winë tiempë, kyaj yëˈëjëty diˈib jeˈeyë tuk tiempë (käjpxë Matewʉ 6:19-21). Okˈix ti tyuunë Sophie diˈib jantsy oy ajtsp mä ballet. Mä tukëˈëyë empresë diˈib Estados Unidos mä jäˈäy tyukniˈˈixëdë ballet, ojts yaˈˈanëëmë ko yajmoˈoyaˈanyë beca mä yˈëxpëky etsë mas oybyë tyuunk. Sophie jyënaˈany: “Jantsy oyëts nnayjäˈäwë kojëtsë jäˈäy mëj xyajnaxy ets axtë mëj këjxmëts nnayjäˈäwë mäjëtsë wiinkpë nmëguˈuktëjk, per kyajtsë nety njotkujkˈaty”. Ta tˈijxyë bideo Los jóvenes preguntan... ¿Qué haré con mi vida? Yëˈë jyënaˈany: “Tajëts nbëjkyë kuentë ko ndukˈoybyëtsëëmbyëtsë nety ets mëjjëtsë jäˈäy xyjantsy yajnaxy, per kyajtsë netyë Jyobaa amumduˈukjot nekymyëduny. Tajëts nmënuˈkxtaky amumduˈukjot etsëts nwinmääy ko nmastuˈudaambyëtsë ajtsk”. ¿Wiˈix tyam nyayjawëty? Yëˈë yˈakjënäˈäny: “Kyajts nwinˈayoy extëmëts të njukyˈaty. Tyam jantsy agujk jotkujkëts nnayjawëty ets prekursoorëts nduny mëdëtsë nyaˈay. Kyajtsë jäˈäy mëj xynyekyyajnaxy ets kyajts nekymyëkjäˈäyˈattë, per nmëdäjttëbëtsë Jyobaa, kanäägëtsë jäˈäy nyaˈëxpëktë ets niˈigyëts nyajmëjwindëkëyäˈändë Diosë tyuunk. Kyajts nbaˈˈayoy tijatyëts të nmastuˈuttë”.

8. ¿Ti käjpxwijënë mbäät pyudëkëdë ënäˈktëjk parë twinmaytyët ti tyunandëp mä jyukyˈäjtën?

⁸ Jyobaa nyijäˈäwëp ti mbäät niˈigyë xytyukˈoyˈaty. Moisés dyajtëëy: “¿Tii duˈun yëˈë Dios mˈamëdoowëdëp? Dios yiˈiyë yˈamëdoopy ets xymyëjjäwëdëty, ets xypyanëjkxëdëty yëˈë nyëˈë tyuˈu, ko xytyoktëty xyjyäwëdëty ets xyˈëwdattëty winëˈääw winëjot. Ets xypyaduunëdëty yëˈë yˈënaˈamën tyiyˈäjtën, yëˈë yˈënaˈamën kyutujkën, duˈunˈaamypts agujk jotkujk mjuukyˈattëty” (Deut. 10:12, 13, Mʉgoxpʉ ja̱ noky mʉdiˈibʉ jyaayʉn Moisés [MNM]). Mientrës tyam mˈënäˈkˈaty, winˈixë nëˈë tuˈu diˈibë mbäät mbudëkëty parë xytsyokëdë Jyobaa ets xymyëdunët “winëˈääw winëjot”. Mbäät mˈity seguurë ko nëjkxëp xytyukˈoyˈaty pën mduumpy duˈun.

MYËJJÄˈÄWË KO TMËDUUNYË JYOBAA

9. ¿Tiko Moisés ojts tsyiptakxëty tkuytyunët ja tyuunk?

⁹ Moisés yajwinˈijx extëm tuˈugë “Kristë” o “Winˈixy”, tyäˈädë yëˈë yˈandijpy ko Jyobaa yëˈë diˈib winˈijxë parë dyaˈˈawäˈätspëtsëmëdë kyäjpn Egipto. Moisés “duˈun dyajnäjxy ko yaˈˈaxëkˈixy diˈib Kristë extëmë mëkjäˈäyˈäjtënë diˈib mas tsobatp ets kyaj dyuˈunëty ja mëkjäˈäyˈäjtën diˈib Egipto” (Heb. 11:26, TNM). Yëˈë nyijäˈäwëbë nety ko tsiptäˈägäämp ja tuunk diˈib yajtuknipëjk ets ayowäämbë nety ko yaˈˈaxëkˈixäˈäny. Të nety tuˈugë israelitë yˈanëˈëmxëty: “¿E mijts pënxëmëts të mbëjktakëbë ënaˈambë yajkutujkpë mä ëëtsëtyën?” (Éx. 2:13, 14, MNM). Ok, ta Moisés dyajtëëyë Jyobaa: “¿Tiijëts duˈun ënet tjääktimytyuundäˈägëp ets yëˈë mëjˈënaˈambë tmëbëkëty yëˈë nˈääw nˈëyukëts[?]” (Éx. 6:12, MNM). Parë tmëmadäˈägët ko yaˈˈaxëkˈixäˈäny, ta Jyobaa ttukmëtmaytyaky tijaty jyëjptsëˈk jyëjpjäˈäwëp. Tsip ja tuunk diˈibë Moisés yajtuknipëjk, per ¿wiˈixë Jyobaa pyudëjkë?

10. ¿Wiˈixë Jyobaa ttukniˈˈijxë Moisés parë ttunët ja tuunk diˈib tyuknipëjk?

¹⁰ Tuk pëky, ko Jyobaa yˈanmääyë: “Ëjts mijts njaymyëëtˈataampy” (Éx. 3:12, MNM). Majtsk pëky, ko jyotmëkmooyë mët ko tyukmëtmaytyakë wiˈixë xyëë nyikejy: “Ëjtsë duˈun Jäˈtäämp extëmëts Ëjts nJäˈtäˈäny” (Éx. 3:14, TNM).a Myëdëgëk pëky, ko myooyë mëjää parë ttunëdë mëjˈäjtën diˈib yajnigëxëˈk ko yëˈë nety të jyantsy kyexyëty (Éx. 4:2-5). Ets myëmäjtaxk pëky, ko tkejxyë Aarón parë jyamyëdatëdët, yëˈë dyajnaxët ja ayuk ets pyudëkëdët parë ttunët ja tuunk diˈib yajtuknipëjk (Éx. 4:14-16). Ko netyë Moisés yˈooganë, seguurë yˈijty ko Dios yëˈë diˈib tyukniˈˈijxëp pënaty mëduunëp wiˈix ttunët oytyim diˈibëtyë tuunk. Päätyë Josué tˈanmääy: “Yëˈë Wintsën [Jyobaa] yëˈë këˈëm mduˈuwinˈyoˈoyanëp, ets yëˈë mjamymyëëtˈatanëp. Nijënäˈä mgaˈëxmatsäˈänyë, ets mgayajwëˈëmäˈänyë aduˈuk. Päätykyëjxm këdii duˈun ninuˈun mmayëty mdäjëty, ets këdii mtsëˈëgëty mjäwëty” (Deut. 31:8, MNM).

11. ¿Tiko Moisés dyajtsobaty ja tuunk diˈib yajtuknipëjk?

¹¹ Ko Moisés tˈijxy wiˈixë Jyobaa pyudëkëty, ta niˈigyë dyajtsobaty ja tuunk diˈib tsiptakxë ets tˈijxy ko yëˈë “diˈib mas tsobatp ets kyaj dyuˈunëty ja mëkjäˈäyˈäjtën diˈib Egipto”. ¿Këdii niˈigyë nety tsyobääty tmëdunëdë Dios diˈib tukëˈëyë mëkˈäjtën myëdäjtypy ets kyaj dyuˈunëty ko tmëdunëdë faraon? ¿O waˈanë nety niˈigyë tsyobääty tyunët prinsipe jam Egipto ets kyaj dyuˈunëty ko Jyobaa wyinˈijxë parë twooyoˈoyëdë israelitëty? Moisés yajkunuˈkx wiˈix jyaˈayˈajty. Jantsy oy mëdë Jyobaa nyaymyaayë ets yëˈë mooyë “mëkˈäjtën” parë ojts twooyoˈoy ja israelitëty mä ja Nax diˈib Yajtukwinwäˈänëdë (Deut. 34:10-12, MNM).

12. ¿Tijaty tuungë Jyobaa xytyuknipëjkëm?

¹² Ëtsäjtëm, nan të nyajtuknipëjkëmë tuunk. Jyobaa të xytyuknipëjkëm parë ngäjpxwäˈkxëmë oybyë ayuk, duˈun extëm ttuknipëjkyë Pablo etsë wiinkpë Dios mëduumbëty (käjpxë 1 Timotee 1:12-14). Ets niˈamukë duˈun të nyajtuknipëjkëm (Mat. 24:14; 28:19, 20). Ta näägë nmëguˈukˈäjtëm diˈib tyuundëp aduˈugë Diosë tyuunk ets ta diˈib të yajtuunkmoˈoytyë parë tyundët mëjjäˈäy o diˈib pyudëjkëbë mëjjäˈäy parë tpudëkëdë myëguˈuktëjk mä naymyujkën. Per mbäädë nfamilyëˈäjtëm diˈib kyaj yˈëxpëktë etsë wiink jäˈäy kyaj dyajtsoobäättë ja tuunk diˈibë Jyobaa xymyoˈoyëm o xyˈëbat xykyäjpxpatëm mët ko nnayojxëm mä Diosë tyuunk (Mat. 10:34-37). Pën xyaˈëxtëkëwäˈägäˈänëm, mbäädë net nwinmäˈäyëm ko kyaj tsyobääty nbëjtakëmë jot mëjää mä Diosë tyuunk o ko kyaj nmëmadakëm diˈib të nyajtuknipëjkëm. Pën duˈun njäjtëm, ¿wiˈix mbäät xypyudëjkëmë mëbëjkën parë nmëmadakëm?

13. ¿Wiˈixë Jyobaa xypyudëjkëm parë nduˈunëm ja tuunk diˈib të xytyuknipëjkëm?

¹³ Nˈokmënuˈkxtakëmë Jyobaa amumduˈukjot parë xypyudëjkëm. Nˈoktukmëtmaytyakëm tijaty njëjptsëˈk njëjpjäˈäwëm. Pes yëˈë diˈib të xytyuknipëjkëmë tyäˈädë tuunk ets yëˈë diˈib xypyudëjkëm parë nduˈunëm. ¿Wiˈix? Duˈun extëmë Moisés tpudëjkë. Tuk pëky, yëˈë xyˈanmäˈäyëm: “Ëjts mijts njotmëkmoˈoyaampy, duˈun, ëjts mijts nbudëkëyaampy, nwijtsˈitaampy mëdëtsë nˈaˈoygyëˈë diˈib tyuumbyë tëyˈäjtën” (Is. 41:10). Majtsk pëky, yëˈë ko niˈigyë mëbëjkën dyajkëktëkë mä tijaty wyandakypy, pes duˈun xyˈanmäˈäyëm: “Tëjëts ngajpxy, ets nguytyuunaambyëts. Tëjëts nduknibëjtäägë, ets nan ndunaambyëts” (Is. 46:11). Tëgëk pëky, yëˈë ko Dios xymyoˈoyëm ja mëkˈäjtën diˈib jantsy mëjwiin jantsy kajaa (2 Kor. 4:7). Ets taxk pëky, parë nduˈunëm tijaty yajtuknipëjkëm, Jyobaa xypyudëjkëm mët yëˈëgyëjxmë nmëguˈukˈäjtëm diˈib yajpattëp abëtsemy nyaxwinyëdë, diˈib nayjotkujkmooyëdëp nixim niyam ets naybyudëjkëdëp (1 Tes. 5:11). Ko Jyobaa niˈigyë xytyukniˈˈijxëm parë nduˈunëm diˈib të xytyuknipëjkëm, ta niˈigyë mëbëjkën kyëktëkë ets njaygyujkëm ko ja tuunk diˈib xytyuknipëjkëm niˈigyë tsyobääty ets kyaj dyuˈunëty tijaty jaˈäjtp yä Naxwiiny.

YˈAWIJXYPYË NETY KO DIOS MYOˈOYAˈANYËTYË MAYˈÄJTËN

14. ¿Tiko Moisés yˈijty seguurë ko yajmoˈoyäämbë nety ja kyumäˈäyën?

¹⁴ Moisés “yˈawijxypyë naty ko ja Dios myoˈoyaˈanyëtyë [...] mayˈäjtën” (Eb. 11:26). Kyaj nety nëgoo tnijawë ti miin këdakp, per yëˈë diˈib tuˈumooyë mä tijaty tyuun. Duˈun extëmë Abrahán, Moisés myëbëjk ko Jyobaa mbäät dyajjukypyekyë oˈkpë (Luk. 20:37, 38; Eb. 11:17-19). Ets kom jyëjpˈijx ja kunuˈkxën, kyaj wyinmääy ko nëgoobë netyë xyëë tiempë të dyajtëgoy nuˈun 40 jëmëjt kyeˈekyjëdijty ets ja 40 jëmëjt tsyënääyëdijty mä ja lugäärë äänëˈëk tëëtsëˈëkpë. Oyë nety yajxon tkanijawë wiˈix yˈadëwäˈäny tijatyë netyë Jyobaa të twandaˈaky, mëbëjkëngyëjxm tˈijxy ko yajmoˈoyäämp ja kyumäˈäyën.

15, 16. 1) ¿Tiko mbäädë jot winmäˈäny nbëjtakëm mä ja kumäˈäyën? 2) ¿Ti kunuˈkxën mˈawijxypy mjëjpˈijxypy mä Diosë yˈAnaˈam Kyutujkën?

¹⁵ Ets ëtsäjtëm, ¿nˈawijxëm ko jantsy yajmoˈoyäˈänëm ja kumäˈäyën? Duˈun extëmë Moisés, nan kyaj yajxon nnijäˈäwëm wiˈix yˈadëwäˈäny tijatyë Dios wyandakypy. Extëm nˈokpëjtakëm, kyaj nnijäˈäwëm näˈä tsyondäˈägäˈäny ja mëk ayoˈon (Mar. 13:32, 33). Per niˈigyë nnijäˈäwëm tijaty ets kyaj dyuˈunëtyë Moisés, extëm wiˈix yˈixˈatäˈäny ja lugäärë tsujpë. Ets nˈawijx njëjpˈijxëm ja kumäˈäyën, oy yajxon nganijäˈäwëm wiˈix njukyˈatäˈänëm mä Diosë yˈAnaˈam Kyutujkën. Ko yajxon nbawinmäˈäyëm wiˈix yˈixˈatäˈäny ja jembyë jukyˈäjtën, yëˈë xypyudëkëyäˈänëm parë jëjpˈam nbëjtakëmë Diosë Kyutujkën. ¿Tiko? Okpawinmayë tyäˈädë: ¿mjuyëp tuˈugë tëjk diˈib kyaj yajxon xynyijawë wiˈix yajpääty? Kyaj. Nanduˈun jyaty mä diˈib nˈawijx njëjpˈijxëm, pën kyaj nˈijtëm seguurë kyaj mbäät jamë xëë tiempë nyajtuˈunëm. Perë mëbëjkën yëˈë diˈib mbäät xypyudëjkëm parë yajxon nˈijxëm wiˈix yˈixˈatäˈänyë jukyˈäjtën mä Diosë yˈAnaˈam Kyutujkën.

¹⁶ Parë yajxon xyjaygyukët wiˈix yˈixˈatäˈäny ja Diosë yˈAnaˈam Kyutujkën, pawinmay wiˈix mjukyˈatäˈäny mä ja lugäärë tsujpë. Ko xyˈëxpëkët mä Biiblyë wiˈix jyukyˈäjttë Dios mëduumbëty mä nety kyaminynyëmë Kristë, winmay tijaty myajtëwaampy ko nety jyukypyëktë ets tijaty myajtëwanëp mä nety të mjukyˈaty mä ja tiempë jyëjpkëxanë. Okpawinmay wiˈix njantsy xyondäˈägäˈänëm ko nëjkx nˈixyˈäjtëm ja aptëjk diˈib tëëyëp oˈknëdë ets ndukmëtmaytyakëm tijatyë Dios tukmëduunëdë. Ets wiˈix jotkujk njantsy nyayjawëyäˈänëm ko nëjkx nˈixyˈäjtëm jëyujk animalë awäˈänatypyë ets nˈijxëm wiˈix tuˈugyë yajpäättë, ets wiˈix wanaty wanaty njëmbijtëm wäˈätsjäˈäy ets nmëwingoˈonëmë Jyobaa.

17. ¿Wiˈix xypyudëjkëm ko yajxon nbawinmäˈäyëm ja kumäˈäyën?

¹⁷ Ko yajxon nbawinmäˈäyëm ja kumäˈäyën diˈib yajmoˈoyäˈänëm, yëˈë xypyudëkëyäˈänëm parë tyam tijaty nmëmadakëm, jotkujk nyajpatëm ets nduˈunëm diˈib mbäät xypyudëjkëm parë nbatëm ja jukyˈäjtënë winë xëëbë. Pablo duˈun tkujäˈäyë: “Mä kyajnëm ti nmëdäjtëm, pes nˈokˈawijxëm mëdë maˈxtujkën” (Rom. 8:25). Yëˈë duˈun nyijäˈäyë ja myëguˈuktëjk diˈib nëjkxtëp tsäjpotm, per oy ko niˈamukë Dios mëduumbë duˈun ttundët. Oy kyajnëm nˈaxäjëm ja jukyˈäjtënë winë xëëbë, duˈunyëm nˈawijxëm maˈkxtujkën myëët ja kumäˈäyën mët ko nmëdäjtëm mëk ja mëbëjkën. Duˈun extëmë Moisés, kyaj nwinmäˈäyëm ko nanëgoobë xëë tiempë nyajtëgoˈoyëm nuˈun kujk nmëduˈunëmë Dios. Niˈigyë nˈijtëm seguurë “ko diˈibë nˈijxëm, näjxp yëˈë, per diˈibë kyaj yaˈixy winë xëë winë tiempë yˈity” (käjpxë 2 Korintʉ 4:16-18).

18, 19. 1) ¿Tiko mbäät nduˈunëmë mëjää parë kyaj nyajtëgoˈoyëmë mëbëjkën? 2) ¿Ti nˈixäˈänëm mä jatuˈukpë artikulo?

¹⁸ Mëbëjkën, yëˈë mä nyigëxëˈëky diˈib “jantsy tëyˈäjtën diˈib kyaj nˈijxëm” (Eb. 11:1, TNM). Pënaty kyaj tijaty tˈixy extëmë Dios, kyaj tmëdatyë mëbëjkën, pääty kyaj tjaygyukëdë nuˈunën tsyobääty ko nmëduˈunëmë Jyobaa. Duˈun wyinmaytyë ko “lokë winmäˈäny yëˈë” (1 Kor. 2:14). Per ëtsäjtëm, jukyˈatäˈänëm winë xëë ets nˈixäˈänëm ko oˈkpë jyukypyëkäˈändë, diˈibë naxwinyëdë jäˈäy kyaj tjaygyukëdë. Duˈun extëmë Pablo yˈanmääyë näägë ëxpëkyjyaˈay ko yëˈë “kuˈayuk es kyaj ti tnijawë”, tyam nanduˈun mayë jäˈäy wyinmaytyë ko tsuuwinmäˈäny tijaty ngäjpxwäˈkxëm (Apos. 17:18).

¹⁹ Tyam njukyˈäjtëm mä jäˈäy kyaj tmëdattë mëbëjkën, pääty tsojkëp nduˈunëmë mëjää parë niˈigyë nyajkëktëjkëm. Nˈokmënuˈkxtakëmë Jyobaa parë “këdiibë mmëbëjkën tyëgoyˈatët” (Luk. 22:32). Duˈun extëmë Moisés, nˈokˈyaˈijtëm winmäˈänyoty wiˈix wyimbëtsëmäˈäny ko nbokytyuˈunëm, nuˈun tsyobäädäˈäny ko nmëduˈunëmë Jyobaa ets ko nˈawijx njëjpˈijxëm ja jukyˈäjtënë winë xëëbë. ¿Yëˈëyë tyäˈädë diˈibë Moisésë yˈijxpajtën xytyukniˈˈijxëm? Kyaj. Mä jatuˈukpë artikulo nˈixäˈänëm wiˈixë Moisés pyudëjkë ko tmëdäjtyë mëbëjkën parë tˈijxyë Dios diˈib “nipën mbäät tkaˈixy” (Eb. 11:27).

[Notë]

[Dibujë diˈib mä pajina 10]

¡Jantsy oy nëjkx nnayjäˈäwëm ko nmëtmaytyakëmë Dios mëduumbë extëmë Moisés! (Ixë parrafo 16)