Ja tsäˈäny mä kyëxˈijxtë

¿JANTSY tsäˈänyë tyäˈädë diˈib yam mˈijxypy kepykyëjxy? Kyaj, kyaj jyantsy tsyaˈanyëty. Pujxn tsäˈäny yëˈë. Yëˈë Jyobaa yˈanmääyë Moisés ets tpëjtäˈägët jam kepykyëjxy ets mbäät jamë israelitë kyëxˈixtë ets kyaj yˈooktët. Perë tadë tsäˈäny diˈib jam naxkëjxy, jantsy tsäˈäny yëˈë. Yëˈë tsyuˈtstë israelitë ets dyajpäˈämbajttë. ¿Mnijäˈäp tiko?

Yëˈko israelitëty tmëgäjxtëgooytyë Dios etsë Moisés. Pes jyënandë: ¿Tikots xyajpëtsëëmdë Ejiptʉ etsëtsë net yä nˈooktët? Pë mä tyäˈädë lugäär kyajts ti jeˈxy peky ets ni nëë. Ets kyajtsë manaa nekyjëˈxäˈändë.

Per ja manaa oy jeˈxy jaˈa, pes yëˈë diˈibë Jyobaa mooyëdë ets nandëˈënë nëë ets nyëˈuuktët. Per ja israelitëty kyaj tmëjjäˈäjëdë. Päätyë Jyobaa tyuknigajxëdë awäˈän tsäˈäny. Ta tsyuˈtsëdë, ets nimay jyantsy yˈoˈktë.

Ta ja israelitëty tnimiindë Moisés ets tˈanmääytyë: Tëts nbokytyundë, yëˈko tëts nmëgäjxtëgoytyë Jyobaa ets mijts. Mënuˈkxtäˈägë Jyobaa ets dyajjëgaˈagëdë tyäˈädë may tsyaˈany.

Ta ja Moisés ojts nyinuˈkxtäägëdë. Ta Jyobaa yˈanmääyë ets dyaˈoyët tuˈugë pujxn tsäˈäny, ets tpëjtäˈägët kepykyëjxy, ets jam kyëxˈixtët pënaty ja tsäˈäny të tsyuˈutsëdë. Moisés ta ttuuny extëmë Dios yˈanmääyë. Ta niˈamukë pënatyë nety ja tsäˈäny të tsyuˈutsyëty kyëxˈijxtë mä ja pujxn tsäˈäny, ets yˈagëdaktë..

Tyäˈädë yëˈë xytyukniˈijxëm ko ëtsäjtëm dëˈën nyajpatëm extëm ja israelitëty diˈibë tsäˈäny tsuˈtsëdë. Pes ok pëkë kuentë, niˈamukë jäˈäy pyäˈämbety, myëjäˈäyë ets yˈooky. Jyattë dëˈën, yëˈko Adán mëdë Eevʉ tmastuttë Jyobaa. Perë Jyobaa yaˈawatsypyë tuˈu ets mbatëmë jukyˈäjtënë winë xëë winë tiempë.

Jyobaa yëˈë diˈib kyajxë Jesukristʉ yä Naxwiiny. Yajkëxwejpy kepykyëjxy, mët ko mayë jäˈäy wyinmääytyë ko yˈaxëkjäˈäyëty. Perë Jyobaa ojts tkexyë Jesús ets xyajnitsokëm. Pääty pën këxˈijxëm mä Jesukristʉ, ets pën nbajoˈomëm, nëjxëp mbatëmë jukyˈäjtënë winë xëë winë tiempë. Ok niˈigyë nˈaknijawëyäˈänëm wiˈix mbatëmë tyäˈädë jukyˈäjtënë.