Raap dyuˈutsy ja käjpn niˈijxpë

TYÄˈÄDË yetyëjkëty myëdäjttëbë jotmay. Jäˈäy yaˈooganëdëp, pääty tsojkëp kyaˈaktët. Israelitëtyëˈë diˈib jäjttë käjpn niˈijxpë, etsë tadë toxytyëjk diˈib pudëjkë txëˈäjty Raap. Raap jam tsyënääjy mä ja Jerikoo gäjpn nyabotsyëty. Min nˈokˈijxëm wiˈixë tyäˈädë tyuun jyäjtë.

Ja israelitëty jeˈeyë nety ttuknaxäˈändë ja Jordán mëj nëë ets tyëkëyäˈändë Kanán. Perë Joswee jawyiin tkejxy majtskë israelitë ets nëjx tniˈixtë ja Jerikoo gäjpn.

Ko ja käjpn niˈijxpë jyäjttë Jerikoo, jam jyäjtaktë mä tyëjkë Raap. Per ta näägë jäˈäy tˈijxtë ja käjpn niˈijxpë ets tˈanmääytyë ja rey: Të tsuˈuy myindë israelitë käjpn niˈijxpë. Ko ja rey dëˈën tmëdoojy ta tkejxyë tyuumbë mä tyëjkë Raap. Ta ja Raap yaˈanmääjy: ¡Yajpëtsëmë tadë yetyëjk diˈib të myiny yä mä mdëjk! Per ja Raap të nety dyuˈutsy ja israelitëty tyëjknikëjxy. Pääty tˈatsoojy: Të jyantsy myindë näägë yetyëjk, per kyajts nijawë mä tsyoondë. Kyajnëmë nety kyootsë ko të nyëjxnëdë mä kyaˈadikynyëmë käjpn dëjkˈää. ¡Panëjxtë jotëgoy ets xynyaspäädëdët! Ta ja yetyëjkëty tpatsoˈondë pëyeˈegyë.

Ko nyëjxtääytyë, ta ja Raap ojts nyejxy jam tyëjknikëjxy ets tˈanmääjy ja käjpn niˈijxpëty: Ëjts nijäˈäbëts ko Jyobaa yëˈë moˈoyanëdëbë tyäˈädë nax. Nmëdoyˈäjttëbëts ko yëˈë diˈib yajtëtsë ja jikymyejnyë Tsaptspë ko mbëtsëëmdë Ejiptʉ, ets ko miitsëty nandëˈën diˈib myaˈoˈktë ja reyëty ja Seˈon ets Og. Ets pääty tyam, ix tëts ëjts nˈoyjyaˈaytyaˈaky mët miitsëty, nandëˈënë net miitsëty xytyundëdë mayˈäjtënë ets mˈoyjyaˈaytyäˈäktët mët ëjts. Ets xyajtsoˈogëdëtsë ndeety, ndäägëts etsë nmëgaˈaxëty.

Ta ja käjpn niˈijxpë tˈanmääjy ja Raap ko dëˈënˈatëp extëm jyënaˈany. Pääty yaˈanmääjy: Këxotsë tyäˈädë tejxynyë tsaptspë mä mbentanë ets yajnaymyukëdë niˈamukë mjiiky mëguˈuk yä mä mdëjk. Net kots njëmbittët ets nˈixtëdëtsë tyäˈädë tejxyny, kyajts pën nyaˈooktët diˈibë nety yä mä mdëjk. Ta ja käjpn niˈijxpë ojts nyëjxnëdë mä Joswee ets ttukmëtmaytyaktääjy wiˈixë nety të jyattë.