Rahab myëbëjkë Jyobaa

¿Mtsojkënyëˈajtypy nwoonëjkxët ja tiempë mä jyukyˈajtyë Rahab? Okwinmay ko tam nyajpatëm mä Jericó gäjpn. Tyäˈädë käjpn yajpääty Canaán, mä jäˈäy kyaj tmëbëktë Jyobaa. Jam tsyënääy tuˈugë toxytyëjk diˈib xëˈäjt Rahab.

Ko Rahab myutskˈäjty, ta yajtukmëtmaytyaky wiˈixë Moisés ojts dyaˈˈawäˈätspëtsëëmy ja israelitëty jap Egipto ets wiˈix ojts dyajnaywyaˈkxyëty ja mejnyë Tsaptspë. Yëˈë nan yajtukmëtmaytyak wiˈixë Jyobaa tpudëjkë ja israelitëty parë myadaktë ko tsyiptuundë. Per ta Rahab tnijäˈäwë, ¡ko tam ja israelitëty të nyaynyikojëdë kyäjpnbëˈääy!

Tëgok, ta nimajtskë israelitë jyäjttë koots jam Jericó parë tˈixäˈändë ja käjpn. Ta jyäjttë mä tyëjkë Rahab. Etsë Rahab ta yajtëjkëdë tyëgoty. Mä tadë koots, ta ja rey diˈib Jericó tnijäˈäwë ko të nety jyaˈty nimajtskë käjpn niˈˈijxpë mä tyëjkë Rahab. Ta tkejxy ja tyuumbëtëjk parë nëjkx dyajtsoondë. Rahab ta ojts tˈyuˈutsy ja israelitëty tyëjknikëjxm ets ta tˈanmääy ja reyë tyuumbëty: Jantsy të yä myindë ja käjpn niˈˈijxpëty, per të ja nyëjkxnëdë. ¡Mbäät xynyaspäädëdë pën mbatsoˈondëp tyamyë! ¿Mnijäˈäwëp tiko Rahab ojts tˈyuˈutsy ja käjpn niˈˈijxpëty?... Yëˈko myëbëjkë Jyobaa ets nyijäˈäwëbë nety ko pyudëkëyaampy ja israelitëty parë tjaˈabëktët ja Jericó gäjpn ets ja nax diˈib Canaán.

Mä nety ja käjpn niˈˈijxpë kyatsoondënëm, ta ttukwandaktë Rahab ko tsoˈogandëp mëdë fyamilyë ko netyë Dios dyajkutëgoyë Jericó gäjpn. ¿Mnijäˈäwëp ti Rahab yajtukˈanaˈam ttunët parë tsyoˈogët?... Ja käjpn niˈˈijxpë yˈanmääyëdë: Këxtsumë tyäˈädë tejpxynyë tsaptspë mbentanë ëxkëˈëy. Pën mduumpy duˈun, ta niˈamukë tsyoˈoktët diˈib yajpatp mdëgoty. Rahab ta duˈun meerë ttuuny extëm yaˈˈanmääy. ¿Mnijawëyaampy ti net tuun jäjtë?...

Ko nyajxy tuk xëë majtsk xëë, ta ja israelitëty tnaˈˈawdijttë amonyë ja käjpn. Tëdujk xëë tnaˈˈawdijttë tëgokaty. Per mä ja myëjëxtujk xëëbë, ja tnaˈˈawdijttë jëxtujkˈok. Ta net niˈamukë jantsy mëk yaxkaktë. ¡Ta Jyobaa dyajjijtääy ja käjpnë nyabots! Per ja tëjk mä nety yˈity këxtsumy ja tejpxynyë tsaptspë kyaj wiˈix jyajty. ¿Mˈijxypy mä dibujë?... ¡Duˈunë Rahab mëdë fyamilyë tsyoktë!

¿Ti mdukniˈˈijxëbë yˈijxpajtënë Rahab?... Rahab nyijäˈäwëbë nety ko Jyobaa kuentˈatanëp ets myëbëjk ko yajtukmëtmaytyaky tukëˈëyë tijatyë nety të ttuny. Mijts nan ta kujk xynyijawë tijatyë Jyobaa të ttuny. ¿Mmëmëdowaambyë Jyobaa extëm ttuunyë Rahab?... ¡Seguurë ko mmëmëdowaampy!