Rut mëdë Noemii

MÄ BIIBLYË jap xypyäädäˈäny tuˈugë liibrë diˈib xyëˈäjtypy Rut. Yëˈë myaytyakypy tuˈugë familyë diˈib jukyˈäjttë mä ojts yˈanaˈamdë fesëty. Rut yëˈë tuˈugë kiixy diˈib kunaxˈäjt kugäjpnˈäjt Moˈap; kyaj yˈisraelitëty ets kyaj nety tˈixyˈatyë Jyobaa. Per ko Rut tnijäˈäjë Diosë tëyˈäjtënbë, ta ttsojkpejky mëkë Jyobaa. Noemii yëˈë tuˈugë mëjäˈäy tyoxytyëjk diˈib pyudëjkë Rut ets tˈixyˈatëdë Jyobaa.

Noemii israelitë yëˈë. Per ko yˈamääytyëjkë jeˈxy peky jam Israel, ta ojts nyëjxtë tsënaabyë jam Moˈap, mëdë nyaˈay ets mët majtskë myäänk. Per ta ja Noemii nyaˈay yˈoˈky. Ok, ta ja myäängëty pyëjktë mët majtskë toˈoxyˈënäˈk diˈib tsënääytyë Moˈap, Rut mëdë Orpë. Kyum mäjk jëmëjt, ta ja nimajtskpë myäänk yˈoˈktë. ¡Jantsy jotmaymyëët ojts wyëˈëmdë ja nyëdoˈoxyëty ets nandëˈënë Noemii! ¿Ti net tyuunë Noemii?

Noemii ta ttukniwinmäˈäyë jyëmbitanë mä ja nyax kyäjpn, ta tyuˈudëjkë. Rut mëdë Orpë kyaj myastuˈudanëdë, ta pyatsoˈonëdë. Të nety jeky tyuˈuyoˈoynyëdë ko Noemii tˈanmääjy ja toˈoxyˈënäˈk: Jëmbittë mä mˈit mlugäär ets wëˈëmdë mëdë mdääk.

Ta ojts ttsuˈkxtë. Ta ja Rut mëdë Orpë tyëjkëdë jëëjy yaxpë, yëˈko mëkë nety ttsoktë Noemii. Ta yˈatsoodë: ¡Kyaj nmastuˈudäˈändë! Mbanëjxandëp mä mnax mgäjpn. Perë Noemii ta yˈatsoojy: Jëmbijnëdë, uˈunk jaˈajëty. Nek oy jamë mxëë mdiempë xyajnaxtët mëdë mjiiky mëguˈuk. Ta ja Orpë ojts jyëmbijnë mä ja nyax kyäjpn. Perë Rut kyaj jyëmbijty.

Ta ja Noemii tˈanmääyë Rut: Orpë tam jyëmbijnë, panëjx. Perë Rut yˈatsoojy: ¡Katëts xyˈanëëmë njëmbitëdëts! Nbanëjxaampy. Mä mijts mnejxy, jamëts nëjxäˈäny, mä mijts mtsëënë jamëts ntsëënëyaˈany. Yëˈë mgäjpn yëˈëts ngäjpnˈataampy etsë mDios yëˈëts nDiosˈataampy. Mä mijts mˈooky, jamëts nˈoogäˈäny ets jamëts naxtëkëyaˈany. Ko ja Rut dëˈën tˈanmääyë Noemii, ta kyaj ojts nyekyˈanëˈëmxëty ets jyëmbitët.

Ta tyäˈädë nimajtskpë toxytyëjk jyäjttë Israel ets jam tsyënääytyaknbëjktë. Rut ta tyëjkë tuumbë kamoty, meerë nety ja tiempë mä ja sebäädë myiky. Tuˈugë yetyëjk diˈib xyëˈäjt Booz yëˈë yajtuunë mä ja kyam. ¿Mnijäˈäp pën tyääkˈäjtë Booz? Yëˈë Raap, diˈibë nety tsëënaapy Jerikoo.

Tëgok ta Booz tˈanmääyë Rut: Tëts nyajtukmëtmaytyaˈaky wiˈix mjäˈäyˈaty, ets wiˈix mˈoyjyaˈayëty mëdë Noemii. Nijäˈäbëts ko mdääk mdeety të xymyastuˈuty etsë mnax mgäjpn ets të miny tsënaabyë mä tuˈugë käjpn diˈibë nety kyaj xyˈixyˈaty. Pääty waˈanë Jyobaa mguniˈxyëty.

Rut ta yˈatsoojy: Extëm mijts mdimˈoyjyaˈayˈäjnë mët ëjts. Jantsy oyëts nayjyawëty kots xytyukmëtsokyë Jyobaa kyunuˈxën. Booz mëk ttukjotkëdaky extëmë Rut jyaˈayˈaty, ets ko waanë yˈijty ta mëët pyejky. ¡Jantsy jotkujkë Noemii nyayjäˈäjë! Per mas jotkujk nyayjäˈäjë ko ojts tpäättë tuˈugë yˈuˈunk, diˈib xyëˈäjt Obeed. Obeed yëˈë diˈibë net yˈokˈäjtë Davit; ok nˈaknijawëyäˈänëm mas mä Davit.