Rut mëdë Noemí

Tuk tiempë jamˈäjtë yuu Israel. Päätyë Noemí diˈib israelitë, ojts tsyoony mëdë myëmëjjäˈäy ets nimajtskë myäänk parë ojts nyëjkxtë tsënaabyë Moab. Ok, ta yˈoˈky ja myëmëjjäˈäy. Ets ja nimajtskpë myäänk, ta pyëjktë mëdë toˈoxyˈënäˈk diˈib Moab, tuˈuk diˈib xëwˈäjt Rut ets jatuˈuk Orpá. Per jotmaymyëët njënäˈänëm ko nan oˈktë jaa nimajtskpë myäänk.

Ko ja Noemí tmëdoyˈajty ko jam Israel kyaj yˈokjamˈäjnë yuu, ta ttukniwinmäˈäyë jatëgok jyëmbitäˈäny. Rut mëdë Orpá, ta ojts tpatsoondë ja Noemí, per tuˈääy ta yˈanmääyëdë: “Miitsëty jantsy oy të mtsëënëdë mëdëtsë nˈuˈunk nˈënäˈk ets jantsy oyjyaˈay të mˈittë. Oyxyëp ko jatëgok mbëktë. Jëmbittë mä mjëën mdëjk Moab”. Ta tyäˈädë toxytyëjkëty yˈatsoowdë: “Mëk ntsoktë ets kyaj naytyuˈuk nyajwëˈëmäˈändë”. Noemí janääm jatsojk yˈanmääyëdë parë jyëmbittët. Ok, ta Orpá jyëmbijty, perë Rut wëˈëm. Noemí ta tˈanmääyë Rut: “Orpá të jyëmbity mä nyax kyäjpn ets mä diosëty, panëjkx ets jëmbit mä mdäägë jyëën tyëjk”. Perë Rut ta yˈatsooy: “Kyaj nmastuˈudäˈäny. Yëˈë mgäjpn, yëˈëts ngäjpnˈataampy etsë mDios, yëˈëts nDiosˈataampy”. Wiˈix mˈokwinmay, ¿wiˈixëdaa Noemí nyayjäˈäwë ko duˈun yˈatsoowë Rut?

Ko Rut mëdë Noemí jyäjttë Israel, yëˈë nety jam mujktsondakpë sebäädë. Tëgok, ta Rut ojts nyijkxy mä kyamë Boaz, parë nëjkx dyajmukäˈäny diˈibë nety të dyajwëˈëmdë. Boaz, yëˈë tyääkˈäjtë Rahab ets të nety tmëdoyˈaty ko Rut jam tsyoony Moab ets ko kyaj netyë Noemí të tmastuˈuty. Boaz ta tˈanmääy ja tyuumbëtëjk ets niˈigyë dyajwëˈëmdët ja sebäädë parë Rut dyajmukët.

Mä tadë ux, ta Noemí dyajtëëyë Rut: “¿Mä tyam ojts të mduny?”. Rut ta yˈatsoowë: “Mä kyamë Boaz”. Noemí ta yˈanmääyë: “Boaz, yëˈë niduˈuk diˈibëtsë nmëmëjjäˈäy myëguˈukˈäjtypy. Aktuungoj jam mët ja toˈoxyˈënäˈkëty. Kyaj jam pën wiˈix mdunäˈänyëty”.

Rut jam tyuunˈadëtsy mä kyamë Boaz axtë ko myujktääy ja pëjtaˈaky. Boaz pyëjkë kuentë ko Rut yëˈë tuˈugë toxytyëjk diˈib jantsy oyjyaˈay ets tuumbë jäˈäy. Mä tadë tiempë, ko tuˈugë yetyëjk yˈooky ets kyaj ja yˈuˈunk yˈënäˈk të tmëdaty, ta ja kyudëjk pyëkët mët tuˈugë wyingon mëguˈuk. Päätyë Boaz pyejky mëdë Rut. Ta tpattë tuˈugë yˈuˈunk diˈib xyëëwmooytyë Obed. Ko ja tiempë nyajxy, Obed yëˈë yˈokˈuˈunkˈäjtë rey David. Ja myëtnaymyaayëbë Noemí, jantsy agujk jotkujk nyayjäˈäwëdë. Pääty yˈanmääyëdë: “Jyobaa yëˈë jawyiin të mmoˈoyëtyë Rut diˈib të yˈoyjyaˈaytyaˈaky mët mijts. Ets tyam, tam tuˈugë mˈok. Pääty nˈokmëjkumäˈäyëmë Jyobaa”.