Tuˈugë rey diˈib kuwijy kuwinmäˈäny

SALOMONK mutsknëmë nety ko tyëjkë rey. Tsyojk mëkë Jyobaa ets pyanëjxë käjxwijënë diˈibë tyeety mooyë. Jyobaa tyukjotkëdakë Salomonk, ets pääty tuˈugë ux dyajtëëjy kumäˈäyoty: Salomonk, ¿ti mtsojkypy ets nmoˈoyët?

Salomonk ta yˈatsoojy: Jyobaa Dios, ëjts tim mutsknëmëts ets kyajts njaty wiˈixëts nˈanaˈamët. Pääty moogyëtsë wijyˈäjtënë etsëts yajxonë mgäjpn nˈanaˈamët.

Jyobaa yˈoymyëdoo ti Salomonk amdoojë. Pääty tˈanmääjy: Të xyˈamdoyë wijyˈäjtënë ets kyaj yëˈëjëtyë mëkjäˈäyˈäjtënë ets ni kyayëˈëjëty etsë mxëë mjukyˈäjtënë yonët, nmoˈoyaambyë wijyˈäjtënë extëm diˈib nipën dëˈën tkamëdatynyëm. Per nmoˈoyaampy nandëˈën diˈib kyaj të xyˈamdoy, nmoˈoyaambyë mëkjäˈäyˈäjtënë etsë mëjˈäjtënë.

Ko waanë tiempë nyajxy ta Salomonk nyimiinëdë nimajtskë toxytyëjk diˈib nety myëdäjttëp tuˈugë mëj jotmay. Ja jawyiimbë jyënany: Ëjts mëdë tyäˈädë toxytyëjk tuˈugyëts ntsëënëdë mä tuˈugë tëjk. Ëjts jawyiinëtsë nˈuˈunk nbaty, ets kyum majtsk xëë ta yëˈë nandëˈën yˈuˈunk tpaty. Per ta yëˈë ja yˈuˈunk yˈoˈky. Ets tamtsë nety nmäˈäy kots xytyukpukoˈkë yˈuˈunk ooky, ta ojts tmënejxyë nˈuˈungëts. Ets kots ojts njotwijy tats nˈijxy ja uˈunk ooky ets nˈëxkajpyëts ko kyajts jyaˈaty ja nˈuˈunk.

Ko dëˈën tmëdoojy ja tuˈukpë toxytyëjk ta jyënany: ¡Kyaj! ¡Yëˈë uˈungë juukypyë ëjtsë njaˈa etsë ookypyë yëˈë jyaˈa! Ta yˈatsoojy ja jawyiimbë toxytyëjk: ¡Kyaj yëˈë ookypyë yëˈë mˈuˈunkˈäjtypy etsë juukypyë ëjtsë nˈuˈunk! Ets dëˈënën ja toxytyëjkëty nyaygyajxytsyiˈkëdë. ¿Ti net tyuunë Salomonk?

Ta tˈamdoojy tuˈugë espäädë, ets ko yajmëmiiny, ta jyënany: Poˈtwäˈxë tadë uˈungë juukypyë ets moˈoytyë këjkujmë tadë toxytyëjk.

Per ja toxytyëjkë jawyiimbë diˈib jyantsy uˈunkˈäjtypy ta jyënany: ¡Kyaj! Tunë mayˈäjtënë katë xyaˈoogyë tadë uˈunk. ¡Nek moˈoy yëˈë! Per ja tuˈukpë toxytyëjk ta jyënany: Nipën kyayajmoˈoyët waˈan dyajpoˈtwaˈxy këjkujm.

Ta ja Salomonk jyënany: ¡Katë xyaˈoogyë tadë uˈunk! Moˈoyë tadë jawyiimbë toxytyëjk. Yëˈë dëˈën jyantsy uˈunkˈäjtypy. Salomonk jyënany dëˈën yëˈko ja uˈunktääk mëkë netyë yˈuˈunk ttsoky, pääty jyënany ko nek oy yajmoˈoyët ja tuˈukpë toxytyëjk nëgokë ja uˈunk kyaˈooky. Ko ja jäˈäy tnijäˈäjëdë wiˈix ja Salomonk dyaˈoˈoyë jotmay, ta jotkujk nyayjäˈäjëdë ko tmëdattë tuˈugë ryeyë kuwijy kuwinmäˈänybyë.

Nëˈën ja Salomonk ojts yˈaneˈemy Dios kyunuˈx ja kyäjpn, ijt windëë ja jeˈxy peky extëmë triigë, sebäädë, uubës etsë iigë. Ja jäˈäy oyatyë wyit nyijam tpëjtaktë ets oyatyë jyëën tyëjk tmëdäjttë. Ets mëjwiin kajaa tijaty jyamˈäjty.