Tuˈugë templë parë Jyobaa

Ko Salomón yˈanaˈamtsondaky Israel, ta Jyobaa yajtëëwë: “¿Ti mtsojkypy nmoˈoyët?”. Salomón ta yˈatsooy: “Mutsknëmëts ets kyajts oy nnijawë wiˈixëts tijaty ndunët. Tunë mayˈäjtën, mmoogyëtsë wijyˈäjtën parëts nguentˈatëdë mgäjpn”. Jyobaa ta yˈanmääyë: “Kom yëˈëts të xyˈamdoyë wijyˈäjtën, mijts diˈib mˈitäämp mas kuwijy. Per kyaj yëˈëyëty, nan nmoˈoyaambyë mëkjäˈäyˈäjtën ets nan nëjkxëp mjukyˈaty kanäk jëmëjt pën xymyëmëdoowbëts”.

Salomón ta tkojtsondaky ja templë. Yëˈë yajtuunë oorë, platë, kepy etsë tsää. Tukëˈëyë diˈib yajtuun ak yëˈë oyatypyë. Milˈamë yetyëjk etsë toxytyëjkë wijyˈyatypyë tyuundë. Kyum jëxtujk jëmëjt, ta yajkojˈabejty ja templë. Ta net tpaty ja xëëw mä Jyobaa yajtukëdëyaˈany, ta yajpëjtaky ja wintsëˈkën mä ja altaar. Ta Salomón nyaygyoxtënääytyakë altaar winduuy ets nyuˈkxtaky: “Mijts Jyobaa, yëˈë mjanitëjkëp tuˈugë templë mas mëjpë ets tsujpë këdiinëmë tyäˈädë. Per tunë mayˈäjtën, kupëk extëm nˈawdattë ets nmënuˈkxtäˈäktë”. Wiˈix mˈokwinmay, ¿tyukjotkëdakëdaa Jyobaa ja templë? ¿Myëdoowˈijt extëmë Salomón myënuˈkxtakë? Ko nyuˈkxtaktääy, ta jënˈyaˈank ojts kyaˈay ets tnoˈktääy ja wintsëˈkën. Duˈunë Jyobaa dyajnigëxëˈky ko tyukjotkëdakypyë nety ja templë. Ko ja israelitëty duˈun tˈijxtë, ta jantsy jotkujk nyayjäˈäwëdë.

Kom ja rey Salomón jantsy wijy yˈijty, yˈixyˈäjtë jäˈäy mä tukëˈëyë ja it lugäär. Nimay ijtyë jäˈäy nyinëjkxyëty parë tpudëkët ets dyaˈoyët ja yˈamay jyotmay. Axtë ja reyna diˈib tsoˈomp Seba ojts nyinëjkxyëty parë yˈixäˈänyëty pën jantsy wijˈyë duˈun, ets yajtëëwë tijaty diˈib jantsy tsip. Ko tmëdooy wiˈix tˈatsooyë Salomón, ta jyënany: “Kyajtsë nety nmëbëky extëmëts të nyaˈˈanëëmë, per tyamnëmëtsë net nˈixy ko niˈigyë mwijˈyëty ets kyaj dyuˈunëty extëmëts të nyajtukmëtmaytyaˈaky. Yëˈë mDios Jyobaa të mgunuˈkxyëty”. Jam Israel jantsy oyë jäˈäy jyukyˈäjttë ets agujk jotkujk, per kyaj jyejky.