Josiiʉs diˈib oy ak reyˈäjt jam Israel

JEˈEYË netyë Josiiʉs tmëdaty tuktujkë jyëmëjt ko tyëjkë rey jam Israel mä ja majtsk grupë jäˈäy mëdë tyëëmp yˈääts. Mutsknëmë nety ko tyëjkë rey, pääty ja mëjäˈäytyëjk pyudëjkëdë ets tˈanaˈamët ja käjpn.

Jëxtujk jëmëjtë netyë Josiiʉs kujk yˈaneˈemy, ko ogäˈän ttuuny diˈibë Jyobaa tsyojkypy. Yëˈë pyanëjxë yˈijxpajtënë diˈib oy reyˈäjttë extëmë Davit, Josafat, etsë Ezekiiʉs. Mutsknëmë nety ko dyaˈijxë jotmëkˈäjtënë.

Nëˈënë nety kujk ja tiempë nyaxy nimay ja israelitë axëëk jyantsy adëˈëtstë. Tˈawdäjttë diosëty diˈib kyaj tyëyˈäjtënëty ets tniwindaktë awinax. Päätyë Josiiʉs mëdë jyaˈay dyajwatstë ja nax käjpn. Tsiptak ets dëˈën ttunët yëˈko may ja jäˈäy diˈib yˈawdäjttëp ja awinax. Ok ix yamë Josiiʉs mëdë jyaˈay tam tpuˈudäˈäytyë awinax.

Ok ta Josiiʉs ttuknipejky nidëgëëgë yetyëjk ets dyaˈaˈoyëdë Jyobaa tyëjk. Ojts dyajnaymyukëdë meeny sentääbë mä ja käjpn diˈib yajtukmëjuuytyë tyäˈädë jäˈäy. Tapë netyë jäˈäy tyundë mä ja Diosë tyëjk, ko ja Ilkiyës diˈib nyiwintsënˈäjtypyë saserdotëty tpaty jap ja liibrë diˈibë nety të tyëgooynyë, mä Moisés tkëxjääjy ja Jyobaa yˈanaˈamën.

Ta ko Josiiʉs yajtukˈijxy ja liibrë, ta jyënany ets yajkäjxët. Ko tmëdoojy ta tpejkyë kuentë ko ja käjpn kyaj nety tmëmëdowdë Jyobaa yˈanaˈamën. Ta jyantsy jotmaytyuktëjkë, ets extëm yam xyˈixy, ta tkëˈtsyë wyit ets jyënany: Të net xytyukjotˈambëjkëmë Jyobaa, yëˈko ndääkˈäjt ndeetyˈäjtëm kyaj të tmëmëdowdë tyäˈädë anaˈamënë diˈib ijtp kujayë mä tyäˈädë liibrë.

Josiiʉs ta tˈanmääyë Ilkiyës ets nëjx dyajnidëwë ti Jyobaa tyunaampy. Ilkiyës ta ojts tninejxy ja kugajpxy Uldaa. Uldaa ta tˈanmääyë Ilkiyës ets tˈanëëmëdë Josiiʉs wiˈixë netyë Jyobaa të jyënaˈany: Jerusalén mët tëgekyë jyaˈay yajtukumëdowandëp mët ko të tˈawdattë wiingatypyë dios diˈib kyaj tyëyˈäjtënëty etsë naxwinyëdë të tyuktujknë mëdë axëkˈäjtënë. Per mijts Josiiʉs, mët ko xytyunyë oyˈäjtënë, tyäˈädë ayoˈon kyaj myinäˈäny mä mijts mjukyˈaty jaanëm ko nety mijts të mˈoˈknë.