Ja Israelitëty tsyoˈonëdë Babiloñʉ

JA NETY kujk nyaxy majtsk jëmëjt mä ja medos etsë persas tjaˈabëjktë Babiloñʉ käjpn. Ets ok ixë net mä dibujë, tam ja israelitë tsyoˈonëdë Babiloñʉ. ¿Wiˈix yˈawäˈätspëtsëëmdë? ¿Pën ojts kyaxëdë?

Yëˈë Siro ja rey diˈib Persia. Kajaanëmë nety yˈaktëgoyëty etsë Siro myaxuˈunkˈatët, ko Jyobaa ojts tˈanëëmë kyugajpxy Isaiiʉ ets tkujayët ko Siro yëˈë tyunaampy ti Jyobaa tsyojkypy ttunët. Ets ko Babiloñʉ tyëjkˈää awäˈäts wyëˈëmäˈäny ets tjaˈabëkët ja käjpn. Ets dëˈën tyuun jyäjtë extëmë nety të yajnaskäjxë. Awäˈäts ja tëjkˈää yajnikeky. Ets koots tyëjkëdë ja medos etsë persas, etsë Siro yëˈë diˈib nyiwintsënˈäjt.

Per nandëˈën ja Isaiiʉ ojts tnaskäjxë ko Siro yëˈë nyiˈanaˈamëyaampy etsë Jerusalén käjpn yˈoyët mëdë Jyobaa tyëjk. ¿Ojts dëˈënë Siro tniˈanaˈamë? Ojts. Pes dëˈën tˈanmääyë israelitëty: Nëjxtë Jerusalén, ets kojtë jamë Jyobaa tyëjk diˈib mDiosˈäjttëp. Pääty jam tsyoˈonëdë Babiloñʉ.

Per kyaj niˈamukë israelitë tsyoˈondë. Tam diˈib tijaty myëwëˈëmëdë ets nan tam diˈibë nety të myëjäˈäyëndë ets pëjkënëdëp, ets kyaj mbäät jeky nyekytyuˈuyoˈoytyë, pes ja nety tyuˈuyoˈoyäˈändë naa taxk poˈojën. Siro ta tˈanmääjy niˈamukë ja israelitë diˈib ojts wyëˈëmdë ets tmoˈoytyëdë oorë etsë platë pënatyë nety nëjx dyaˈoyëyäˈändë ja käjpn ets tkojäˈändë Diosë tyëjk.

Pääty ja israelitëty diˈib nëjxtë Jerusalén ojts jyantsy yajnamoˈoytyë tijaty. Nandëˈënë Siro dyajky tëgekyë ja kopë diˈibë Nabukodonosoor jyuˈt mä Jyobaa tyëjk ko dyajkutëgooyë Jerusalén. Pääty ja israelitëty may tijaty tjantsy myëtsoˈondë.

Naa taxk poˈo nety kujk ja israelitëty të tyuˈuyoˈoytyë, ko jyäjttë Jerusalén. Ja tiempë mä nety meerë yˈabety 70 jëmëjt mä kyutëgooyë Jerusalén käjpn, mä ni tuˈugë jäˈäy ojts kyaweˈemy. Per oy ja israelitë yˈokjëmbijttë mä kyäjpn, ojtsë net tmëdattë amay jotmay, extëm ok nijawëyäˈänëm.