Ja letrë diˈib yajkëxjääy potsykyëjxy

Ko tiempë nyajxy, ta Beltsasar tyëjkë anaˈambë Babilonia. Ta mä tuˈugë ux, ttuknibëjtakë mëj käˈäy mëj ukën ets twooy milˈamë jäˈäy diˈib jëjpˈam ijttëp mä ja paˈis. Ta ojts ttukˈaneˈemy ja tyuumbëty ets tjuuttët ja basë diˈib oorë, diˈibë Nabucodonosor yajtsoˈon mä Jyobaa tyemplë. Ets yëˈë tyukˈukëdë ja basë ets tˈawdäjttë ja diosëty. Ko ajotkumonë tˈijxpattë ko tuˈugë këˈë tkëxjäˈäy potsykyëjxyë ääw ayuk diˈib kyaj yajjaygyukë.

Belsasar ta jyantsy tsyëˈkë, ets ta ojts tnigaxë ja xyëwëj xyëmaabyë ets ttukwandaktë: “Pënëts xytyukmëtmaytyakp wiˈix nyikejˈyë tyäˈädë ääw ayuk, yëˈëts nikäjpxpatëp extëm ja myëdëgëëkpë yetyëjk diˈib mas mëj ijtp Babilonia”. Ta tjayajniwijan tjayajnikajandë, per kyaj tmëwinmäˈänybyattë. Ta myiiny ja reyë tyääk ets yˈanmääyë: “Ta tuˈugë yetyëjk diˈib xyëwˈäjtypy Daniel diˈib ijty nyimaytyakëp ja kyumäˈäyë Nabucodonosor. Mbäät yëˈë mdukˈawanëty wiˈix nyikejˈyë tyäˈädë ääw ayuk”.

Ta ja Daniel yajnigajxë, ets ko jyajty, ta ja Belsasar yˈanmääyë: “Pën mbäät xykyajpxy ets xyyajnikejˈyë tyäˈädë ääw ayuk, ta nmoˈoyët tuˈugë oorë yoˈktëy ets nikäjpxpatët extëm ja myëdëgëëkpë yetyëjk diˈib mas mëj ijtp Babilonia”. Daniel ta yˈatsooy: “Kyajts ntsoky ti xynyamoˈoyët. Per ndukˈawanëyaampy wiˈix nyikejˈyë tyäˈädë ääw ayuk. Nabucodonosor, diˈib mdeetyˈäjt, mëj këjxm nyayjäˈäwë ets ojtsë Jyobaa yajˈyujy yajtudaˈagyëty. Ets oy mijts wäˈäts të xyjanijawë wiˈix jyajty kyëbejty, kyaj të xywyingutsëˈëgë Jyobaa. Pes yëˈë të xytyukˈuugë ja basë diˈib oorë diˈibë nety yajpatp mä tyemplë. Päätyë Dios të tkëxjäˈäyë tyäˈädë ayuk: MENÉ, MENÉ, TEQUEL ets PARSÍN. Tyäˈädë yëˈë yˈandijpy ko jäˈäyëty diˈib Media ets Persia tjaˈabëkäˈändë Babilonia käjpn, ets ko mijts kyaj mnekytyunäˈäny rey”.

Duˈunë nety kyëxëˈëky ko tsip ets pën tjaˈabëkëdë Babilonia käjpn. Pes jantsy këjxmë nety nyabotsyëty ets yajnadukyëty tuˈugë mëj nëë diˈib jantsy këk. Per mä tadë koots, ta ja jäˈäyëty diˈib Media ets Persia tyëjkëdë mä ja Babilonia käjpn. Ciro, ja rey diˈib persia, yëˈë wyoowdëts ja nëë parë mbäät ja syoldäädëtëjk ttuknaxtë ets jyäˈttët mä ja käjpndëjkˈääw. Ets ko jam jyäjttë, ¡awäˈäts ja tëjkˈääw tpattë! Ta pojënë ja soldäädëtëjk tyëjkëdë ets tjaˈabëjktë ja käjpn ets nan yaˈoˈktë ja rey. Ta Ciro tyëjkë anaˈambë jam Babilonia.

Mä myëduk jëmëjtpë Ciro yˈaneˈemy, ta ojts jyënaˈany: “Duˈunëtsë Jyobaa të xyˈanëëmë parëts nˈagojˈoyët ja tyemplë jam Jerusalén. Mbäät nyijkxy oytyim pën israelitëty diˈib yakaambyë naybyudëkë”. Pääty nimay ja israelitëty jyëmbijttë mä ja nyax kyäjpn, të nety nyäjxnë 70 jëmëjt mä kyutëgoyë Jerusalén. Duˈun yˈadëëy diˈibë netyë Jyobaa të tnaskäjpxë. Ciro nan ojts dyajjëmbijtäˈäy ja basë diˈib oorë ets platë, ets tijaty ja Nabucodonosor yajpëtsëëm mä ja templë. ¿Mbëjkypyë kuentë ko Jyobaa yëˈë yajtuun ja Ciro parë tpudëjkë ja kyäjpn?