Jesús myaxuˈunkˈaty Belén

¿MNIJÄˈÄP pënë tyäˈädë maxuˈunk? Yëˈë Jesús. Tam tyim maxuˈunkˈäjtäˈäy mä jëyujk tsäjkää yˈity. Ets tamë Mariiʉ tkëxkoˈogäˈäny mä yajpëjtaˈagyë jëyujk tsäjkää jyeˈxy. Per ¿tiko yamë Josee mëdë Mariiʉ yajpäättë mä jëyujk animal tyanëdë? Tyäˈädë lugäär kyaj yˈoyëty ets jam myaxuˈunkˈatët tuˈugë uˈunk, ¿këdii?

Kyaj, kyaj yˈoyëty. Per yëˈëjëty jam të jyäˈttë Belén yëˈko Sésʉr Augustʉ diˈib anaˈamp jam Romʉ, ojts tniˈanaˈamë ets jyäjtäˈäytyët niˈamukë jäˈäy mä nety të myaxuˈunkˈattë ets yajkujayëdët. Ets komë Josee jam myaxuˈunkˈäjty Belén ta jam ojts nyejxy mëdë Mariiʉ. Per ko jam jyäjttë, kyaj mä tpattë jyäjtakn. Ta jap ojts nyëjxtë mä yˈityë jëyujk animal. ¡Ets meerë mä tadë xëë ojts myaxuˈunkˈatyë Jesús! Per extëm yam xyˈixy oy mëk jamë tadë maxuˈunk.

¿Mˈijxypy tadë borreegë kuentˈäjtpë diˈib jam të tnimindë Jesús? Jamë nety aamyoty koots byorreegë kuentˈattë ko tuˈugë jäjënë ojts tyëˈxwaˈxy. ¡Yëˈë nety tuˈugë anklës! Ja borreegë kuentˈäjtpë ta jyantsy nyayˈatsëˈkëdë. Per ja anklës ta yˈanmääyëdë: ¡Katë mtsëˈëgëdë! Yëˈëjëts nyajmiimbyë oybyë ää ayuk. Yëˈë nˈawanëyandëp ko jam Belén të myaxuˈunkˈaty ja nWintsënˈäjtëmë Kristʉ. ¡Diˈib yajnitsoˈogaambyë nax käjpn! Jap xypyäädäˈändë wit abity kyoˈknë mä jëyujk tsäjkää yajpëjtaˈagyë jyeˈxy. Ta net ajotkumonë myiindë may anklës ets tˈawdäjttë Dios. Ta ko ojts nyëjxtääynyëdë, ta ja borreegë kuentˈäjtpë tsyoˈondë jotëgoy. Ets extëm yam xyˈixy tam të tpäättë Jesús.

¿Mnijäˈäp tiko ojts yajmëjjawë Jesús? ¿Mnijäˈäp pënë dëˈënë tyäˈädë maxuˈunk? Ok jamyats ko mä tadë maytyaˈagyë myëduˈukpë jap ojts yajnimaytyaˈaky tyäˈädë tim jawyiimbë Diosë yˈUˈunk. Yëˈë pyudëjkë Jyobaa mä ojts dyajkojˈyë tsäjp etsë Naxwinyëdë ets tëgekyë diˈib jaˈäjtp. Pes, ¡yëˈë dëˈënë tyäˈädë Jesús diˈib ojts myaxuˈunkˈaty!

Jyobaa yajtëgäjts ja yˈUˈungë jyukyˈäjtënë ets ta ojts tpëjtaˈaky mä Mariiʉ yˈuˈunk tëjk. Ta ja uˈunk ojts yeeky extëmë ënäˈkuˈunk yaaktë tyääk jodoty. Jeˈeyë ko tyäˈädë maxuˈunk yëˈë Diosë yˈUˈunk. Ets ko ja tiempë tpaty ta myaxuˈunkˈäjty jam Belén mä jëyujk tsäjkää yˈity. ¿Mbejkypyë netë kuentë tidën ko xyondaktë ja anklësëty ko tˈanmääytyë ja jäˈäy ko të myaxuˈunkˈatyë Jesús?