Jesús yajpääty mä Diosë tyëjk

OK IXË tyäˈädë mixyuˈunk diˈib yam käjx maytyakp mëdë tyäˈädë mëjäˈäytyëjk diˈib yaˈëxpëjktëp mä Diosë tyëjk jam Jerusalén. Tyäˈädë mixyuˈunk yëˈë Jesús. Ix nëˈën kujk tyim yaˈknë, ja tyamë jyëmëjt mäjmajtsk.

Tadë yaˈëxpëjkpëty dëˈënyë myonyˈijx myonyjäˈäjëdë ko tˈijxtë wiˈix ja Jesús tijaty tnijawë diˈib mä Dios, ets diˈib ijtp kujayë mä Biiblyë. Per ¿tiko kyaj yam pënë Josee mëdë Mariiʉ? ¿Mä net jaˈajëty? Min nˈokˈijxëm.

Jëmëjt jëmëjt ja Josee tmënejxy ja yˈuˈunk yˈënäˈk mä ja paskë xëë jam Jerusalén. Ets kom jam tsyëënëdë Nazaret jeky jyantsy tyuˈuyoˈoytyë ets jyäˈttët Jerusalén, ja ojts tyuyoˈoytyë tëgëk xëë. Yëˈko mä tadë tiempë kyaj nety jyamëtyë karrë ets ni tren, pääty ja may jyaˈay dëˈënyë tyuˈuyoˈoytyë.

Ta ko ja paskë xëë ojts nyäjxnë ta ja Josee mëdë Mariiʉ ojts jyëmbijnëdë Nazaret. Ets kom niganääk ja yˈuˈunk yˈënäˈk, kyaj tpëjktë kuentë pën të netyë Jesús wyeˈemy, wyinmääytyë ko ja nety myiny mët ja may jyaˈay. Per ko ojts tsyuˈujënë ta tˈëxtääytyë Jesús mä ja myëguˈuktëjk etsë myëtnaymyaayëbë ets nimää tkapattë. Ta jyëmbijttë Jerusalén ets tˈëxtäˈäyäˈändë.

Ko tyëgëk xëbejty taanëm tpattë mä Diosë tyëjk. Tapë nety tmëdooˈity wiˈix myaytyäˈäktë ja yaˈëxpëjkpë ets dyajtëy tijatyëty. Ets niˈamukë ja jäˈäy dëˈënyë wyëˈëmëtyaaytyë mët ja Jesusë wyijyˈäjtënë. Net ja Mariiʉ tˈanmääyë Jesús: Uˈunk, ¿tikots dëˈën të xytyundë? Tëts mijts nˈëxtääytyaˈaytyë ets njantsy jotmayˈooktëts mëdë mdeety.

Net ja Jesús yˈatsoojy: ¿Tikots të xyˈëxtäˈäytyë? ¿Ti kyaj xynyijawëdë ko yäts nyajpäädäˈäny mätsë nDeetyë tyëjk?

Jesús extëm ojts tim tsojkënyëˈäjnë nyëjxäˈäny mä mbäät tjatyë Diosë yˈAyuk. Ëtsäjtëm nandëˈën mbäät ntsojkënyëˈäjtëm, ¿këdii? Jam Nazaret, Jesús sëmään sëmäänë nety nyejxy mä ja naymyujkënë mä yaˈawdatyë Jyobaa. Ets xëmë ijty tmëdooˈity ti yaˈëxpëjkp, pääty may tijaty ojts tjantsy jaty diˈib mä Biiblyë. Nˈokpajoˈomëmë yˈijxpajtënë Jesús.