Jesús yˈaˈuxˈattë mä tuˈugë kuartë

JA NETY jueebës, myajtsk xëëbë netyë Jesús të myaytyäˈäktë mä Oliivʉs kopk, ko ojts tyuˈukmuktë mëdë yˈapostëlëty mä tyäˈädë mëj kuartë ets yˈaˈuxˈatäˈändë mä ja Paskë xëë. Tadë jäˈäy diˈib jam pëtsëëmp yëˈë Juudʉs Iskaryotʉ. Yëˈë nëjx tˈawanëyaˈanyë saserdotëty wiˈix tmatstëdë Jesús.

Të nety ëxëˈëyë Juudʉs tˈanëëmë ja saserdotëty: ¿Tits xymyoˈoytyëp pën nbudëjkëdëp ets xymyatstëdë Jesús? Ta yaˈanmääjy: 30 platë meeny. Päätyë Juudʉs yëˈë mëët nëjx nyaybyäädäˈänëdë ets tmënëjxäˈäny mä ja Jesús. ¡Mëk axëëk dëˈën yˈadëtsy!, ¿këdii?

Ko yˈaˈuxˈäjtääytyë mä ja Paskë xëë. Ta Jesús dyajtsondaky ja tuˈugë aˈuxë jëjpˈambë. Ta tmooytyë yˈapostëlëty tuˈugë tsäjkaaky ets tˈanmääytyë: Kaytyë, tyäˈädë yëˈë nikajp ja niniˈx ngëbäjkëts diˈib yajkëyakäämp miitskyëjxm. Ta net tmooytyë tuk basë binë, ets tˈanmääytyë: Uuktë, tyäˈädë yëˈë nikajpëtsë neˈpyny diˈib yajtamäämp yajˈyokäämp miitskyëjxm. Biiblyë ja ttijˈyë tyäˈädë aˈux ja nWintsënˈäjtëmë yˈAˈux.

Ko ijty ja israelitë yˈaˈuxˈattë mä ja Paskë xëë, yëˈë jyamyajtstëp ko ja yˈuˈunk yˈënäˈk tsyoktë jap Ejiptʉ netpë ja Diosë yˈanklës nyajxy ets dyaˈoˈktääjy ja Ejiptʉ jäˈäyë kyaˈaxkopk uˈunk. Perë Jesús yëˈë nety tsyojkypy etsë yˈëxpëjkpëty jyamyatsëdët ets wiˈixë nety të kyuˈoogëdë. Pääty ojts tˈanëëmë ets dëˈën ttundët jëmëjt jëmëjt.

Ko ttuundääytyë ja nWintsënˈäjtëmë yˈAˈux, ta Jesús tˈanmääyë yˈapostëlëty ets jotmëk yˈittët ets tmëdattët mëkë mëbëjkën. Tim ok, ta net tkuyˈëëdë Dios ta tsyoˈondë. Ja nety naa tsuˈpën. ¿Mä ojts nyëjxtë?