Jesus yˈakˈaˈuxˈattë

Ja judiyëtëjk jëmëjt jëmëjt ijty tmëjtundë Paskë ko 14 yˈanyë nisán poˈo. Duˈun ijty tjamyatstë ko Jyobaa yajpëtsëëmëdë Egipto mä nety yajtuumbëˈat yajmosëˈattë ets ko ojts myoˈoyëdë ja Nax diˈib Yajtukwandaktë. Mä jëmëjt 33, ja mä Jesus mëdë yˈapostëlëty ttuundë ja Paskë jam Jerusalén mä tuˈugë tëjk diˈib tuknikëˈëy. Ko yˈaˈuxˈäjtääytyë, ta Jesus jyënany: “Niduˈuk miitsëty xykyëyakäˈändëts”. Ja apostëlëty mëjˈixy mëjmëdoy tjäˈäwëdë ets ta dyajtëëwdë: “¿Pënëˈë?”. Jesus ta yˈatsooy: “Yëˈë tadë yetyëjk diˈibëts nmoopy tuk pedasë tsäjpkaaky”. Ta net tmooyë Judas Iscariote tuk pedasë ja tsäjpkaaky, ta Judas netyë pyëdëˈky ets pyëtsëëmy.

Ta netë Jesus nyuˈkxtaky, ojts ttujkwaˈkxy ja tsäjpkaaky ets tmooyë ja yˈapostëlëty diˈibë nety mëët të wyëˈëmdë. Ta net tˈanmääy: “Kaytyë tyäˈädë tsäjpkaaky. Yëˈë yˈandijpy ja nniniˈkxëts, diˈibëts nyakaampy mijtskyëjxmëty”. Ta jatëgok ojts nyuˈkxtaˈaky ko ja yˈapostëlëty tmooytyë ja binë ets tˈanmääy: “Uuktë tyäˈädë binë. Yëˈë yˈandijpy ja nneˈpynyëts diˈibëts nyakaampy parë myajpokymyaˈkxtët. Ndukwandaktëp ko jam tsäjpotm mdunäˈändë rey mët ëjts. Tundë duˈun jëmëjt jëmëjt parëts xyjamyatstët”. Tyam, pënaty pyanëjkxtëbë Jesus duˈunyëm tyuˈukmuktë jëmëjt jëmëjt ko ja xëëw kyëdaknë, ja yajtijy ja nWintsënˈäjtëmë yˈAˈux.

Ko yˈaˈuxˈäjtääytyë, ta ja apostëlëty dyajtsiptaktë pën diˈib ijtp mas mëj mä yëˈëjëty. Perë Jesus ta yˈanmääyëdë: “Ja diˈib mas mëj itäämp mä miitsëty, tsojkëp jyaˈayˈatët extëm tuˈugë ënäˈkuˈunk diˈib kyaj myëjpëtsëmäˈäny”.

Jesus nanduˈun yˈanmääyëdë: “Miitsëty nmëtnaymyaayëbëˈäjttëp. Pääty tukëˈëyë ndukmëtmaytyäˈäktë diˈibëts nDeety tsyojkypy. Tim tsojkëts njëmbitäˈäny tsäjpotm mätsë nDeety yajpääty. Per miitsëty yä mwëˈëmäˈändë etsë jäˈäy nyijawëyandëp ko miitsëty nˈëxpëjkpëˈattë mët ko mnaytsyokëdë. Pääty, naytsyokëdë nixim niyam duˈun extëm të ntsoktë”.

Ok, ta Jesus yˈaknuˈkxtaky ets tˈanmääyë Jyobaa parë tkuentˈatët niˈamukë ja yˈëxpëjkpëty ets tpudëkëdët parë tuˈugyë tyundët ets agujk jotkujk. Nan nuˈkxtak parë Jyobaa xyëëw wyäˈätsët. Tim ok, ta Jesus mëdë yˈapostëlëty tˈakkuyˈëëwdë Jyobaa ets ta ojts tsyoˈonëdë. Të nety ja tiempë tpatnë parë Jesus yajmatsët.