Peedrʉ tninejxyë Kornelyʉ

TYÄˈÄDË yëˈë apostëlë Peedrʉ diˈib yam tënaapy, ets diˈib jam pyëˈääjy yëˈë myëtnaymyaayëbëty. Per ¿tiko tyäˈädë yetyëjk yam nyaygyoxtënääytyaˈagyëty Peedrʉ wyinduujy? ¿Oyëdaa dëˈën jam yˈadëˈëtsy? ¿Mnijäˈäp pënëˈë?

Tadë yetyëjk yëˈë Kornelyʉ, diˈib tuun soldäädë wintsën Romʉ. Kornelyʉ kyaj nety tˈixyˈatyë Peedrʉ, per ta ojts yaˈanëëmë ets twowët mä tyëjk. Min nˈokˈijxëm wiˈix jyajty.

Pënatyë Jesús jawyiin ojts pyanëjxëdë yëˈë judiyëty, perë Kornelyʉ kyaj jyudiyëty. Per oy kyaj judiyëty, yëˈë tsyojkypyë Dios, myënuˈkxtakypy ets tyukmëduumbyë oyˈäjtënë jäˈäy. Pääty tëgok tuˈugë anklës yˈanmääyë: Mdukjotkëdakëbë Dios, ets yˈatsoojëmbitaambyë mnuˈkxtakënë. Pääty nigaxë tuˈugë yetyëjk diˈib xyëˈäjtypy Peedrʉ, jam yˈity Jope mä tyëjkë Simonk diˈib tsënaapy mejnybyëˈääjy.

Ta netyë Kornelyʉ tnigajxë Peedrʉ. Ja kum bom tamë netyë Peedrʉ tyëjknikëjxyë Simonk. Ko Dios tyukˈijxë dëˈën extëmë mëj wit kyëdaˈaky tsäjpotm. Ets mä tadë wit kyëxeˈky kexy kaˈpxy jëyujk animal. Ja Diosë yˈanaˈamënë jyënaˈany ko tyäˈädë jëyujk animal kyaj wyäˈätsëty ets yajtsuˈutsët. Per ta Peedrʉ ojts yajmëgajxy ets yaˈanmääjy: Pëdëˈëk, yaˈook ets tsuˈuts.

Peedrʉ ta yˈatsoojy: ¡Kyaj! Ninäˈänëmëts ngatsuˈutsy diˈib kyaj wyäˈätsëty. Per ta yaˈanmääjy: Katë mjënäˈäny ko kyaj wyäˈätsëty diˈibë Dios tyam yˈijxypy wäˈäts. Ets tëgëk ok dëˈën yaˈanmääjy. Tamë netyë Peedrʉ nyayajtëyëty tidën yˈandijpy diˈibë të tˈixy, ko jyäjttë jäˈäy diˈibë netyë Kornelyʉ të tkexy.

Peedrʉ ta jyënajky ets jyënany: Ëjtsë tadë yetyëjk diˈib myajtëëdëp. ¿Tikots xyˈëxtäˈäytyë? Ta ja yetyëjkëty tyukmëtmaytyakëdë ko tuˈugë anklësë nety të tˈanëëmë Kornelyʉ ets twowëdë Peedrʉ mä tyëjk. Peedrʉ ta jyënany ko oy nyëjxët. Ja kum bom, ta Peedrʉ mëdë myëtnaymyaayëbëty ojts nyëjxtë mä ja Kornelyʉ tsyëënë jam Sesareeʉ.

Kornelyʉ të nety dyajnaymyukyëtyë jyiiky myëguˈuk etsë myëtnaymyaayëbëty. Ta ko Peedrʉ jyajty, ta Kornelyʉ nyaygyoxtënääytyakë extëm yam xyˈixy. Perë Peedrʉ ta tˈanmääjy: Pëdëˈëk, ëjts nandëˈënëts njäˈäyëty extëm mijts. Tëyˈäjtën yaˈanmääjy, pesë Biiblyë jyënaˈany ko kyaj yˈoyëty ets niwindakëm tuˈugë jäˈäy ets nˈawdäjtëm. Yëˈëyë Jyobaa naytyuˈuk diˈib mbäät nˈawdäjtëm.

Peedrʉ ta tmëtmaytyaky niˈamukë jäˈäy. Ta net jyënany: Nˈijxypyëtsë net ko Dios yˈaxäjëtyaapy niˈamukë jäˈäy diˈib mëdunanëp. Tamë nety ja Peedrʉ myaytyaˈaky ko Dios tkejxyë yˈespiritë santë, ta ja jäˈäy kyäjxpëjktääytyë wiingaty ayuk. Ta ja judiyëty diˈibë nety të myindë mëdë Peedrʉ myonyˈijx myonyjäˈäjëdë, yëˈko dëˈënë nety wyinmaytyë ko Dios yëˈëyë yˈagupejkypyë judiyëty. Tyäˈädë yëˈë tukniˈijxëdë ko Dios kyaj dyajnaxy mëj tuˈugë käjpn ets jatuˈuk kyaj. ¿Këdii oy ko niˈamukë tyäˈädë njamyajtsëm?