Timotee tpudëkë Pa̱a̱blʉ

TYÄˈÄDË mixy diˈib yam mˈijxypy mëdë apostëlë Pa̱a̱blʉ ja txëˈäjty Timotee. Timotee mëdë fyamilyë jam tsyënääytyë Listrʉ. Ja tyääk txëˈäjty Eunisʉ etsë nyanwelë Loydʉ.

Myëdëgëkˈokpë kujkë Pa̱a̱blʉ jyaˈty Listrʉ. Naa tyuk jëmëjtëbë nety të yˈokˈojtspë mëdë Bernabee, netpë nyäjxtë käjxwäˈxpë. Ets mä ja myëdëgëkˈokpë ta jyëmbijty mëdë myëtnaymyaayëbë Silʉs.

¿Mnijäˈäp wiˈix jamë Pa̱a̱blʉ tˈanëëmë Timotee? Mijts mbäädëts xyjapudëkëdë ets joˈom ngäjxwäˈxëm ja “oybyë ää ayuk” jagambäät. Ta dyajtëëjy: ¿Mtsojkënyëˈajtypy njoˈomëm mëdë Silʉs?

Timotee ta yˈatsoojy: Tiko këdii ntsojkënyëˈajtypyëts. Pääty ko waanë yˈijty ta Timotee tnikekyë fyamilyë ets ojts tpanejxyë Pa̱a̱blʉ mëdë Silʉs. Per min jawyiin nˈoknijäˈäjëm ti netyë Pa̱a̱blʉ të jyaty të kyëbetyëty, ets ok ta nijäˈäjëm wiˈix jyëdijttë. Ja nety kujk nyaxy 17 jëmëjt mä Jesús ojts tmëgajxyë Pa̱a̱blʉ ko nety nyejxy Damaskʉ.

Jamyats ko Pa̱a̱blʉ ojts nyejxy Damaskʉ ets tˈaxëktunäˈänyë Jesusë yˈëxpëjkpë, ¡per tyam yëˈë nan të jyëmbity Jesusë yˈëxpëjkpë! Ko waanë yˈijty ta jäˈäy tˈëxtääytyë Pa̱a̱blʉ ets dyaˈoogäˈändë, yëˈko ja Pa̱a̱blʉ tˈëwaˈxy tkäjxwaˈxy ja “oybyë ää ayuk”. Per ta ja ëxpëjkpë pyudëjkëdë ets kyaˈagët. Pyëjtakëdë mä tuˈugë mëj katsy, ta kyutëëynyäjxëdë mä ja käjpnë nyabots ets ta kyeky.

Ok ta Pa̱a̱blʉ ojts kyäjxwaˈxy Antyokiiʉ. Jam mä tim jawyiin ja ëxpëjkpëty ojts yajtijtë kristianë. Ta netë Pa̱a̱blʉ mëdë Bernabee yajkajxtë ets kyäjxwäˈxtët nëˈënë Antyokiiʉ ets axtë nëˈënë it lugäärë jagamatypyë. Tuˈugë käjpn diˈib ojts tkuˈixtë yëˈë Listrʉ mä nety tsyëënë Timotee.

Ta nyajxy naa tuk jëmëjtën, ets ta jatëgok jyajty Listrʉ mä ja myëmajtskˈokpë nyaxy ëwäˈx käjxwäˈxpë. Ets netë Timotee tpatsoˈonyë Pa̱a̱blʉ mëdë Silʉs, ¿mnijäˈäp mä ojts nyëjxtë? Ok ixë tadë mapë ets nijäˈäjëm.

Tim jawyiin ojts nyëjxtë Ikoñʉ diˈib wingon wëˈëmp, ta net ojts nyëjxtë Antyokiiʉ. Ok ta ojts nyëjxtë Troʉs, ta net nyäjxtë Filipʉs, Tesalónikʉ, ets Bereeʉ. Ok ixë mapë, ¿mˈijxypy mä wyeˈemyë Atenʉs? Jam nandëˈënë Pa̱a̱blʉ ojts kyäjxwaˈxy. Ta net tuk jëmëjt ja kujm yˈijty Korintʉ ets ojts yˈëwaˈxy kyäjxwaˈxy. Ok ta waanë yˈakˈijty Éfesʉ. Ta net ojts nyëjxtë barkoty Sesareeʉ, ta net pyajttë Antyokiiʉ ets jamë Pa̱a̱blʉ ojts wyeˈemy.

Dëˈënë Timotee jyëdijty jekyˈam, tpudëjkë Pa̱a̱blʉ mä tˈëwaˈxy tkäjxwaˈxy ja “oybyë ää ayuk” ets dyajnaxkëdaky kanäägë naymyujkën. Ko mijts myaagët, ¿mëdunaampy nandëˈënë Dios xëmë extëmë Timotee?