Jyäˈttë oy mëk naxwingëjxy

¡OK IXË tadë barkë tam nyëpaˈatsanë! ¡Tam tyukjaˈanëtyaaynyë! ¿Mˈijxypyë tadë jäˈäyëty diˈib jam nëjoty? Nääk tam të jyäjnëdë naxwingëjxy. ¿Jamë Pa̱a̱blʉ? Min nˈokˈijxëm wiˈix të jyaty të kyëbety.

Jamyats ko majtsk jëmëjtë Pa̱a̱blʉ yˈijty pujxndëgoty jam Sesareeʉ. Ta net yajpëjtaky mëdë wiinkpë tsimy jyaˈay mä tuˈugë barkë diˈib mënëjxëdëp Romʉ. Ta tsyoˈondë, të nety nyaxtë Kretʉ ko myiinyë mëk poj tuu. Ja yetyëjkëty kyaj tnekymyëmadaktë ja barkë dyajˈyoˈoytyët. Ets xëëny kyaj nyekykyëxeˈkyë xëë ets ni ja mëtsäˈä koots. Ta ko ojts nyäjxnë kanäk xëë, ta ja jäˈäyëty wyinmääytyë ko tëdën kyajäˈttë juuky.

Ta Pa̱a̱blʉ pyëdeˈky ets jyënany: Nipën kyaˈoogäˈäny; yëˈëyë jeˈeyë barkë tëgoyäämp. Yëˈko tsuˈuytsë Diosë yˈanklës nˈijxy ets xyˈanmääyëts: ¡Katë mtsëˈëgë Pa̱a̱blʉ! Mjäˈtäämp mä ja yajkutujkpë kopk jam Romʉ. Etsë Dios yajtsoˈogaampy niˈamukë pënaty mëët mindë barkoty.

Myajtsk sëmäänëbë nety myiny ja poj tuu, ko naa tsuˈpën ja barkë yajˈyoˈobyëty tˈijxtë ko kyaj ja mejny nëgoo kyëkëty. Ta tsyëˈkëdë ko ja barkë kyotët mä mëj tsää, pääty tkujëduˈujëdë ja pujxn ajoˈkn ets wyëˈëmët ja barkë. Ets ko ojts xyëënyë ta tˈijxpattë naxwinyëdë. Ta tjaˈakˈyajnëjxandë ja barkë mejnybyëˈääjy.

Tamë nety tmëwingoonëdë mejnybyaˈa ko ja barkë tyäˈtspejky puˈujoty. Ta ja mejny jyantsy nyikajpy ets jyantsy myëjwojpety mä ja barkë, ta dëˈënyë tyukjaˈanëtyaajy. Ta ja soldäädë wintsën jyënany: Niˈamukë diˈib jyäjttëp nyëëwoondët o nyëëyundët, nëëdëkëdë ets xytyukpëtsëmdëdë mejny. Ets pënaty kyaj tjattë, kupujnaxtë ets matstë barkë pedasë ets mbäät mjäˈttë mejnybyëˈääjy. Ta dëˈën ttuundë, ets 276 jäˈäy diˈibë nety jap barkoty jyäjttë juuky jam mejnybyëˈääjy, extëmë nety ja anklës të jyënaˈany.

Ja lugäär mä jyäjttë ja txëˈaty Maltʉ. Ets ja jäˈäy diˈib jam tsënääytyëp jantsy oyjyaˈayëty, ojts tpudëkëdë jäˈäy diˈib nety miindëp barkoty. Ta ko ja tiempë ojts yˈoyë ta Pa̱a̱blʉ yajpëjtaky mä ja tuˈugë barkë ets ta ojts yajmënejxy Romʉ.