Jesus yoˈoy nëëwingëjxy

Jesus yaˈˈagëdakë päˈäm jäˈäy ets yajjukypyëjkë oˈkpë. Nan yˈanaˈamë poj etsë tuu. Ko netyë Jesus të nyuˈkxtaktäˈäy mä ja kopk, ta kyuˈijxnäjxy mä ja mejny diˈib Galilea ets tˈijxy ja mëk poj tuu. Ja yˈapostëlëty tapë nety jyantsy nyëëgääptë mët ko amëjääw myiny ja poj tuu. Ta Jesus jyënajky kopkkëjxy ets tyëjkë yeˈebyë nëëwingëjxy parë jyäˈtäˈäny mä ja barkë. Ko ja apostëlëty tˈijxtë ko tam tuˈugë jäˈäy myiny nëëwingëjxy, ta jyantsy tsyëˈkëdë. Perë Jesus ta yˈanmääyëdë: “Këdii mtsëˈëgëdë, ëjts miimp”.

Pedro ta jyënany: “Wintsën, pën mijts mjantsy myiimp anmaagyëts parë ninëjkxët”. Jesus ta yˈanmääyë: “¡Min!”. Ta ja Pedro jyënajky mä ja barkë ets tyëjkë yeˈebyë nëëwingëjxy mä meerë jyantsy pyojtuˈuy. Per ko netyë Pedro tmëwingoonë Jesus, ta tˈijxy ja mëk poj tuu ets ta tsyëˈkë. Ko tjäˈäwë ko tap kyiintsondaknë, ta yaxkeky: “¡Wintsën, pudëjkëgëts!”. Jesus ta kyëˈëmëmäjtsë ets yˈanmääyë: “¿Tiko të mˈamajtsk të mjotmajtskë? ¿Yëˈë ko kyaj xymyëdatyë mëbëjkën?”.

Ta Jesus mëdë Pedro pyajttë mä ja barkë ets ja poj tuu netyë myoongëdaky. ¿Mbawinmaapy wiˈix nyayjäˈäwëdë ja apostëlëty? Jyënandë: “Tëyˈäjtën ko jantsy mijtsënë Diosë yˈUˈunk”.

Kyaj jeˈeyë tëgokë Jesus tmëmadaky ja mëk poj tuu. Pes tëgok ko nety nyëjkxtë mëdë yˈapostëlëty wiinktsoo barkoty, të netyë Jesus myanaxy barkë ëxkëˈëy. Tapë nety myaˈay ko ja mëk poj tuu myiiny. Ja nëë jyantsy myëjjaˈtspety mä ja barkë ets ta yˈujtspejty mëdë kom nëë. Ta ja apostëlëty dyujxtë Jesus ets tˈanmääytyë: “¡Wintsën, oˈkëmë net! ¡Pudëjkëdëgëts!”. Ta Jesus pyëdëˈky ets tˈanmääy ja mejny: “¡Amonyë! ¡Moongëdaˈak!”. Ta myoongëdaktääy ja poj ets ja mejny. Ta netë Jesus dyajtëëy ja yˈapostëlëty: “¿Ti kyaj xymyëdattë mëbëjkën?”. Ets yëˈëjëty ta nyayˈanmääyëdë: “¡Axtë poj etsë mejny mëmëdoowëp!”. Ta ja apostëlëty tpëjktë kuentë ko pën myëbëjktëp amumduˈukjotë Jesus, ta kyaj ti ttsëˈëgëyäˈändë.