Ëxpëjkën 6

¿Tidën yˈandijpy Diosë yˈAnaˈamënë?

¿Mä yajpäätyë Diosë yˈAnaˈamënë? (1) ¿Pën yajtunaampy Rey? (2)

¿Jaˈäjtpë jäˈäy diˈib anaˈamandëp mëdë tyäˈädë Rey? Pën jaˈäjtp, ¿ninääk? (3)

¿Ti nduknijäˈäm ko tyam yëˈë ndukjukyˈäjtëmë tiempë diˈib kugëxëyanëp? (4)

1. Ko Jesús yˈijty yä Naxwiiny, ojts tˈanëëmë ja yˈëxpëjkpëty, ets tˈamdowdëdë Dios parë dyajminëdë yˈAnaˈamënë. Tadë ayuk anaˈamënë yëˈë yˈandijpy tuˈugë gobiernë, mä yˈaneˈemy tuˈugë rey. Tadë Diosë yˈAnaˈamënë yëˈë tuˈugë gobiernë diˈib tim tëgatsy. Yajpääty tsäjpotm ets tˈanaˈamäˈänyë Naxwinyëdë. Nandëˈën dyajwäˈätsäˈänyë Diosë xyëë ets dyajmëjpëtsëmäˈäny. Tyunanëbë Diosë tsyojkënë yä Naxwiiny dëˈën extëm jam tsäjpotm (Matewʉ 6:9, 10).

2. Dios twandaky ko mä yˈAnaˈamënë yëˈë yajReyˈataambyë Jesús (Lukʉs 1:30-33). Ko Jesús yˈijty yä Naxwiiny, yaˈijxë ko yëˈë yˈitäˈäny tuˈugë Anaˈambë diˈib oyjyaˈay, wäˈätsjäˈäy ets diˈib tyuumbyë tëyˈäjtën. Ko jyëmbijty tsäjpotm, kyaj netyë yajmooyë kutujkënë ets tyunët Rey mä ja Diosë yˈAnaˈamën (Ebreeʉsʉty 10:12, 13). Mä jëmëjt 1914, ja mä Jyobaa tmoojy ja kutujkënë Jesús diˈibë nety të tˈawanë. Ets mä tadë tiempë, Jesús tyëjkë anaˈambë jam tsäjpotm extëmë Rey diˈib të yajnikäjxpety. (Filipʉs 2:9).

3. Jyobaa të twinˈixyë yetyëjk etsë toxytyëjkëty diˈib xëmë mëmëdoojëp ets nyëjxtët tsäjpotm. Tyäˈädë jäˈäyëty tˈanaˈamäˈändë naxwinyëdë jäˈäy mëdë Jesús ets tyunäˈändë extëmë rey ets nandëˈën jyustisë tunäˈändë (Lukʉs 22:28-30; Diˈibʉ Jatanʉp 5:9, 10). Jesús ojts ttijy tuk «mutsk kajpëˈëgë borreegë» pënaty mëët yˈanaˈamäˈändë. Ja wyinëty 144,000 (Lucas 12:32, NM; Diˈibʉ Jatanʉp 14:1-3).

4. Ko Jesús tyim naa tëjkë Rey jam tsäjpotm, ta tkujëbijpnäjxyë Satanás mët niˈamukë yˈaxëk anklësëty yä Naxwiiny. Pääty mä tsyondakyë jëmëjt 1914 waanë niˈigyë myäˈtˈadëtsnë tiempë (Diˈibʉ Jatanʉp 12:9, 12). Myëjwindëkë axëkˈäjtënë, tsip, yuu, päˈäm..., tëgekyë tyäˈädë yëˈë yajkypyë ijxwëˈëmën diˈib xytyuknijäˈäm ko Jesús tamën yˈaneˈemy ets ko tyäˈädë ndiempëˈäjtëm tëdën kugëxëyanëp (Matewʉ 24:3, 7, 8, 12; Lukʉs 21:10, 11; 2 Timotee 3:1-5).

5. Tim tsojkë Jesús ttunäˈänyë tëyˈäjtënë ets dyajnaywyäˈxäˈänyëtyë jäˈäy, dëˈën extëm tuˈugë tsyiip kuentˈäjtpë dyajnaywyaˈxyëtyë tsyiip mëdë borreegë. Dyajnaxäˈäny extëmë «borreegë» pënatyë nety të tmëmëdoyë Diosë yˈAnaˈamënë, ets tmoˈoyaˈanyë jukyˈäjtënë winë xëë winë tiempë yä Naxwiiny. Ets dyajnaxäˈäny extëmë «tsyiip» pënatyë nety të tjëjpkudijë Diosë yˈAnaˈamënë (Matewʉ 25:31-34, 46). Mä tiempë myiny kyëdaˈaky Jesús yajkutëgoyaampy niˈamukë jäˈäy diˈib dëˈën extëmë «tsyiip» (2 Tesalónikʉ 1:6-9). Pën mijts mtsojkënyëˈajtypy etsë Jesús myajnaxëdët extëm tuˈugë «borreegë», tsojkëp xyˈëxpëkëdë Biiblyë etsë net xyajtunët diˈib mˈëxpejkypy (Matewʉ 24:14).

6. Tuˈuk tuˈugë paˈis diˈib jaˈäjtp yä Naxwiiny yˈakmëdäjttëbë gyobiernë. Ets näˈäty tsyiptundë ak yëˈëjëty. Perë tadë Diosë yˈAnaˈamënë yëˈë wyingudëgatsˈataampy tëgekyë gobiernë. Yëˈë naytyuˈuk diˈib anaˈamäämp abëtsemy Nyaxwinyëdë (Daniel 2:44). Kyaj nyeky jamˈatäˈänyë tsip, nayaˈoogë etsë naytsyiik naygyoxë. Niˈamukë jäˈäyëty jyukyˈatäˈändë yujy tudaˈaky ets tmëdatäˈändë tuˈugyëˈäjtën (Miqueas 4:3, 4).

7. Ko ja Jesús yˈanaˈamäˈäny 1,000 jëmëjt, ja jäˈäyëty diˈib xëmë të tmëdundë Dios jyëmbitanëdë wäˈätsjäˈäy ets tëgekyë ja Naxwinyëdë jyëmbitäˈäny extëm tuˈugë it lugäärë tsujpë. Ko yˈabatët 1,000 jëmëjt, të netyë Jesús ttuundäˈäy tëgekyë diˈibë Dios tsyojkypy ets ttunët. Ta net tmoˈoyanë Tyeety ja Anaˈamënë (1 Korintʉ 15:24). ¿Tiko xykyatukmëtmaytyaˈagyë mjiiky mëguˈuk etsë mëtnaymyaayëbëty tëgekyë diˈib tyunaambyë tyäˈädë Diosë yˈAnaˈamënë?

[Letrë diˈib miimp mä dibujë mä pajina 13]

Mä yˈanaˈamäˈänyë Jesús, kyaj pën nyayˈaxëkˈixäˈänyëty niˈamukë jäˈäy nyaytsyokäˈänëdë