¿Ti yˈandijpy Diosë yˈAnaˈam Kyutujkën?

1. ¿Ti yˈandijpy Diosë yˈAnaˈam Kyutujkën?

Yëˈë tuˈugë gobiernë diˈib itäämp tsäjpotm, diˈib yajnitëgatsaampy tukëˈëyë gobiernë diˈib yä Naxwiiny ets ttunäˈänyë Diosë tsyojkën yä Naxwiiny duˈun extëm jam tsäjpotm. Diosë yˈAnaˈam Kyutujkën, yëˈë diˈibë naxwinyëdë jäˈäy yajtëgoyˈajtypy ets yëˈë yajtuˈukmukaambyë jäˈäy abëtsemy nyaxwinyëdë. ¿Këdii yëˈë oybyë ayuk? Käjpxë Daniel 2:44; Matewʉ 6:9, 10, etsë 24:14.

Tukëˈëyë gobiernë yˈakmëdäjtypyë ryey. Jyobaa Dios yëˈë të twinˈixyë yˈUˈunk Jesukristë parë tyunët Rey mä Kyutujkën. Käjpxë Diˈibʉ Jatanʉp (Apocalipsis) 11:15.

Ixë bideo ¿Ti yˈandijpy Diosë yˈAnaˈam Kyutujkën?

2. ¿Tiko Jesus yëˈë diˈib mas oy anaˈamp?

Diosë yˈUˈunk yëˈë diˈib mas oy anaˈamp, yëˈë ko oyjyaˈay ets xëmë tijaty ttuny tëyˈäjtën myëët (Fwank 1:14). Nan myëdäjtypyë mëjää parë jäˈäy tpudëkët ets yëˈë yajtunaampy ko yˈanaˈamët tsäjpotm. Ko Jesus jyukypyejky, ta ojts nyijkxy tsäjpotm, jam yˈawijxy Tyeety pyëˈääy parë tˈaxäjëyaˈany ja kutujkën (Ebreeʉsʉty 10:12, 13). Taanëmë net yajmooy ja kutujkën parë yˈanaˈamët. Käjpxë Daniel 7:13, 14.

3. ¿Pënaty mëdë Jesus yˈanaˈamäˈäny?

Biiblyë jyënaˈany ko tuk grupë Dios mëduumbë yˈanaˈamäˈändë mëdë Jesus. Mä Daniel 7:27 yajtijtë tyäˈädë jäˈäyëty “wäˈäts”. Diˈib tim jawyiinë Dios wyinˈijx yëˈë Jesusë yˈapostëlëty. Tyam, duˈunyëmë Jyobaa twinˈixyë yetyëjk etsë toxytyëjk diˈib myëdäjttëp ja mëbëjkën ets jyëmbittët wäˈäts. Ets duˈun extëmë Jesus, ko yˈooktë ta nyëjkxtë tsäjpotm mëdë nyiniˈkx kyëbäjk diˈib kyaj yaˈixy. Käjpxë Fwank 14:1-3 etsë 1 Korintʉ 15:42-44.

¿Ninääk nyëjkxäˈändë tsäjpotm? Biiblyë jyënaˈany ko niwaanë, Jesus ojts ttijy “tuk mutsk kajpëˈëgë borreegë” (Lucas 12:32, NM). Ja wyinëˈattë 144,000 diˈib mëdë Jesus yˈanaˈamäˈändë yä Naxwiiny. Käjpxë Diˈibʉ Jatanʉp 14:1.

4. ¿Ti tuun jäjtë ko Jesus tyëjkë anaˈambë?

Jesus ja tyëjkë anaˈambë 1914, diˈib tim jawyiin tyuun, yëˈë tˈëxkejxyë Satanás jam tsäjpotm mëdë kyaˈoybyëty ets tkujëbijpnäjxtë yä Naxwiiny.a Ta kyëdaky mëk awäˈän ets dyajjaˈˈatyë amay jotmay abëtsemy nyaxwinyëdë (Diˈibʉ Jatanʉp 12:7-10, 12). Desde mä tadë tiempë, niˈigyë axëëk jyattë naxwinyëdë jäˈäy. Ets ko jyaˈˈatyë tsip, mëk ujx, päˈäm etsë yuu, yëˈë xytyukˈijxëm ko tim tsojkë Dios dyajminäˈänyë yˈAnaˈam Kyutujkën yä Naxwiiny. Käjpxë Lukʉs 21:7, 10, 11, 31.

5. ¿Ti tyam tyuumbyë Diosë yˈAnaˈam Kyutujkën ets ti tyunaampy mä tiempë myiny kyëdaˈaky?

Ko abëtsemy nyaxwinyëdë yajkäjpxwaˈkxyë Diosë yˈAnaˈam Kyutujkën, ta tyuˈukmuky “tëgoy myay ja jäˈäy” oy mä tsyoondë. Ets miyonkˈamë yetyëjk etsë toxytyëjk diˈib yujy tudaˈaky, tpuwäˈägëdë Jesusë yˈanaˈamën ets tmëmëdowdë. Tyäˈädë jäˈäyëty, yëˈë diˈib nitsoˈogandëp ko ja Diosë yˈAnaˈam Kyutujkën dyajkutëgoyët ja axëkjäˈäytyëjk. Pääty, pën ndukˈoyˈatäˈänëm tijaty tyunaambyë Diosë Kyutujkën, tsojkëp nmëmëdoˈojëmë Jesus. Käjpxë Diˈibʉ Jatanʉp 7:9, 14, 16, 17.

Mä tyuˈuyoˈoyaˈany tuk mil jëmëjt, jaa mä Diosë Kyutujkën dyaˈˈadëwäˈäny diˈib të ttuknibëjtäägë parë naxwinyëdë jäˈäy. Ta net ja Naxwinyëdë jyëmbitäˈäny extëm tuˈugë lugäärë tsujpë. Taanëmë netë Jesus tkëyakäˈäny ja Kutujkën mä Tyeety (1 Korintʉ 15:24-26). ¿Mdukmëtmaytyäˈägaambyë jäˈäy mä tijaty tyunaambyë Diosë Kyutujkën? Käjpxë Salmo 37:10, 11, 29.