Ëxpëjkën 13

Wiˈix xypyäädëdë relijyongë tëyˈäjtënbë

¿Tyukjotkëdakypyë Dios tëgekyë relijyonk, o jeˈeyë tuˈuk? (1)

¿Tiko jyaˈaty mayë relijyonk diˈib jënandëp ko tpanëjxtë Kristʉ? (2)

¿Wiˈix mbäät xyˈëxkapy pënaty jyantsy pyanëjxtëbë Kristʉ? (3-7)

1. Jesús jeˈeyë dyajnaxkëdaky tuˈugë relijyongë tëyˈäjtënbë. Pääty tyam jeˈeyë jyaˈaty tuˈugë relijyonk diˈib jyantsy myëduundëbë Jyobaa Dios (Fwank 4:23, 24; Éfesʉ 4:4, 5). Tadë Biiblyë tyukniˈixë ko niwaanë jäˈäy diˈib nëjxtëp mä ja tuˈujë xuˈutspë diˈib mënëjxp mä jukyˈäjtën (Matewʉ 7:13, 14).

2. Biiblyë të nety jyënaˈany, ko ja apostëlëty yˈoˈktääynyëdët tyëkëyaˈany mä ja Jesusë yˈëxpëjkpëty wanaty wanatyë tukniˈijxënë etsë tuˈunënë diˈibë Kristʉ kyaj tyukniˈijxë. Ets ko jamˈatäämp ja jäˈäyëty diˈib yajtëgoyandëp ja ëxpëjkpëty ets ttukmastuˈudäˈändë ja Kristʉ (Matewʉ 7:15, 21-23; Apostʉlʉty 20:29, 30). Pääty nˈijxëm mayë relijyongë tëgatsyatypyë diˈib naynyigäjxëp ko tpanëjxtë Kristʉ. ¿Wiˈix mbäät nˈëxkäjpëm pënaty jyantsy pyanëjxtëbë Kristʉ?

3. Ko nyaytsyokëdë nixim niyam yëˈë diˈib mas yajnigëxëˈkëdëp ko tjantsy pyanëjxtë Kristʉ (Fwank 13:34, 35). Kyaj të yajtukniˈixëdë ets nyayjawëdët mëj këjxm mä jäˈäy diˈib wiink koloor ixˈäjtp. Nan kyaj të yajtukniˈixëdë tˈaxëkˈixtëdë jäˈäy diˈib wiink nax wiink käjpn tsoˈomp (Apostʉlʉty 10:34, 35). Pääty kyaj ttuktëkëdë tsip. Pënaty jyantsy pyanëjxtëbë Kristʉ dëˈën nyayjawëdë tukjiiky tukmëguˈukpëm nixim niyam (1 Fwank 4:20, 21).

4. Ja tukpeky diˈib yajtukˈëxkäjpë tadë relijyongë tëyˈäjtënbë, yëˈko tadë jäˈäy diˈib tyukˈijtëdëp wyintsëˈkëdëp mëkë Biiblyë, ets yˈaxäjëdëp extëmë Diosë yˈää yˈAyuk ets myëbëjktëp wiˈix jyënaˈany (Fwank 17:17; 2 Timotee 3:16, 17). Parë yëˈëjëty, niˈigyë jyëjpˈamëtyë Diosë yˈAyuk ets kyaj dyëˈënëtyë naxwinyëdë jäˈäyë jyot wyinmäˈäny o kyostumbrë (Matewʉ 15:1-3, 7-9). Tyuundëbë mëjää ets jyukyˈattë tuˈuk tuˈugë xëë nyaxy extëmë Biiblyë jyënaˈany. Pääty, kyaj tëgatsy yˈëwäˈx kyäjxwäˈxtë ets tëgatsyë net yˈadëˈëtstë (Titʉ 1:15, 16).

5. Pënaty tyukˈijtëdëbë relijyongë tëyˈäjtënbë nan tsojkëp tmëjˈixtëdë Diosë xyëë (Matewʉ 6:9). Jesús tyukˈixyˈäjtë jäˈäyëtyë Diosë xyëë, Jyobaa, ets pënaty tyam jyantsy pyanëjxtëbë Kristʉ tsojkëp nandëˈën ttundët (Fwank 17:6, 26; Romanʉs 10:13, 14). ¿Pënaty mä mnax mgäjpn kyäjxwäˈxtëbë Diosë xyëë?

6. Pënaty jyantsy pyanëjxtëbë Kristʉ tsojkëp tˈëwäˈx tkäjxwäˈxtëdë Diosë yˈAnaˈamënë. Jesús dëˈën ttuuny. Yëˈë xëmë ojts tnigajxy tnimaytyaˈagyë tadë Anaˈamënë (Lukʉs 8:1). Nandëˈën ojts ttukˈaneˈemy ja yˈëxpëjkpëty parë abëtsemy Nyaxwinyëdë nandëˈën tˈëwäˈx tkäjxwäˈxtët (Matewʉ 24:14; 28:19, 20). Pënaty jyantsy pyanëjxtëbë Kristʉ myëbëjktëp ko Diosë yˈAnaˈam Kyutujkën yëˈë jeˈeyë diˈib yajminaambyë tuˈugyëˈäjtënë ets dyajjëgaˈagäˈänyë tsëˈk jäˈän yä Naxwiiny (Salmo 146:3-5).

7. Jesusë yˈëxpëjkpëty kyaj ttuktëk ttukwäˈägëdë axëkˈäjtënë diˈib tyuundëbë naxwinyëdë jäˈäy (Fwank 15:19). Kyaj ttuktëk ttukwäˈägëdë politikë winmäˈäny ets nan kyaj ttuktëkëdë ko jäˈäy nyaynyibëdëˈëgëdë mä tijaty dyajtsiptäˈäktë. Oy jyaˈayˈattë ets kyaj ttundë axëkˈäjtënë diˈibë naxwinyëdë jäˈäy tyukjukyˈäjttëp (Santya̱ˈa̱gʉ 1:27; 4:4). ¿Mˈixyˈajtypy tuˈugë relijyonk diˈib kyuytyuumpy extëm yä të yajnigajxy ets dyaˈixëdë ko tjantsy pyanëjxtë Kristʉ?

[Letrë diˈib miimp mä dibujë mä pajina 26, 27]

Pënaty jyantsy pyanëjxtëbë Kristʉ naytsyojkëdëp nixim niyam, myëjˈijxtëbë Biiblyë ets yˈëwäˈx kyäjxwäˈxtëbë Diosë yˈAnaˈamënë