Yajkäjxwaˈxy ja oybyë ayuk jagambäät

KO PÄÄBLË tmëbejkyë Kristë, ta tyëjkë ëwäˈx käjxwäˈxpë. Per nanduˈunë naty yajpajëditäˈäny extëm tpajëdijtyë Jesusë yˈëxpëjkpëty. Pääblë ninuˈun ojts tkamëˈanuˈxë Diosë tyuunk, jagambäät ojts jyaˈty parë jäˈäy tnijawët ko Kristë yˈAnaˈamën yëˈë diˈib yaˈˈadëwaampy tijatyë Dios ojts ttuknibëjtäägë parë naxwinyëdë jäˈäy.

Ko tim jawyiinë Pääblë tsyoˈony, ta nyajxy Listrë mëdë Bernabee, jam dyaˈˈagëdaktë tuˈugë yetyëjk diˈib maxuˈunkˈäjt tekymyäˈät. Ta ja mayjyaˈay yajnäjxëdë extëmë dios ets apenë tjaygyujkëdë ko kyaj diosˈattë parë tijaty yajtukwintsëˈëgëdët. Per ko jyäjttë ja jäˈäyëty diˈibë Pääblë axëkˈijxëp, ta jyantsy tsyäägäˈtsëdë axtë wyinmääytyë ko të naty yˈooky, per kyaj yˈoˈky. Ko ja tiempë nyajxy ta jyëmbijty Listrë parë tjotmëkmooy ja Jesusë yˈëxpëjkpëty.

Ok, ta näägë judiyë diˈib ojts tpanëjxtë Kristë mëktaˈaky jyënandë ets ja myëguˈuktëjk diˈib kyaj jyudiyëty tmëmëdowdët kanäk peky ja Ley diˈibë Moises yajmooy. Parë yˈoyëdë tyäˈädë jotmay, ta Pääblë ojts nyejxy Jerusalen ets ttukmëtmaytyaky ja apostëlëty ets ja mëjjäˈäytyëjk. Ta ko tˈëxpëjktë yajxon wiˈixë Diosë yˈAyuk jyënaˈany ets tˈamdoodë Diosë nyaybyudëkë, ta tnijäˈäyëdë tukëˈëyë ja naymyujkën ets tˈanmääytyë parë kyaj tˈawdattëdë wiink dios, kyaj tjëˈxtëdë neˈpyny, kyaj ttsuˈutstët ja tsuˈutsy diˈib neˈpyny tyukˈoogë ets twintsëˈëgëdët ja tsënäˈäy jukyˈäjtën. Tyäˈädë anaˈamën jëjpˈamë naty tkuytyundët, per kyaj naty yëˈë tˈandijy ko pyanëjxtëp ja Ley diˈibë Moises yajmooy (Apostʉlʉty 15:28, 29).

Mä myëmajtskˈokpë Pääblë tsyoony, ta nyajxy Bereeë, diˈib tyam yajpatp Gresyë. Ja judiyëty diˈib jam tsënääytyë yˈaxäjëdë Diosë yˈayuk, ets jabom jabom tˈëxpëjktë ja Diosë Jyaaybyajtën parë tˈijxtë pën tëyˈäjtën diˈibë naty yajtukmëtmaytyaktëp. Ok, ta jamë Pääblë tkugekyë myëtsipëty ets ta ojts nyejxy Atenës, jam tuk grupë ëxpekyjyaˈay tmëtmaytyaky jantsy oy ets mëdë mayˈäjt wintsëˈkën.

Mä myëdëgëkˈokpë Pääblë tsyoony, ta ojts nyejxy Jerusalen. Ko jyajty mä ja templë, ta mayjyaˈay nyibëdëˈkë ets jyayaˈooganë. Per ja soldäädëty diˈib Romë ta tmäjtstë Pääblë ets dyajtëëdë tiko naty ja jäˈäy yaˈoogäˈänyëty. Ets komë Pääblë romanë jäˈäy, ta yaˈˈanmääy ko mbäät tkëyaky ja tyëyˈäjtën mä gobernadoor Felës. Ja judiyëty kyaj dyajtëyˈäjtëndëjkëdë ti naty të ttukniwäämbattë Pääblë. Ok, ta Festë diˈib yajnitëgäjtsë Felës, tjakëyakanyë Pääblë mä judiyëtëjk. Perë Pääblë ta jyënany ets yajpayoˈoyët mä ja “yajkutujkpë kopk”, ta ja gobernadoor yˈanmääyë ko oy yajmënëjxët (Apostʉlʉty 25:11, 12).

Pääblë jamë naty jyustisëpäädäˈäny Romë, ta ojts yajmëtsoˈonë barkoty ets ojts yajmënejxy Italiatsoo. Per ta yˈayoˈonbattë mejnyoty, päätyë Pääblë dyajnäjxyë xux poˈo jam Maltë. Ok, ta yajmëjäjty Romë ets majtsk jëmëjt yˈijty mä tuˈugë tëjk. Ets oyë naty kuentˈaty yˈity, duˈunyëm ojts ttukmëtmaytyaˈaky ja Diosë yˈAnaˈam Kyutujkën pënaty ojts kyuˈixëdë.

(Jap yajnimaytyaˈaky mä Apostʉlʉty 11:22–28:31.)