Käjxwijën parë nmëbëjkëm, njukyˈäjtëm wäˈäts ets ntsojkëm

JESUS yëˈë kyuˈˈutsyˈäjtë Santyäˈägë mëdë Juudës, etsë Peedrë mëdë Fwank yëˈë yˈapostëlëˈäjt. Dios winmäˈänymyooyëdë parë tjääytyë jëxtujkë neky diˈib mä Escrituras Griegas Cristianas, tuˈuk tuˈuk yëˈë myënejxypyë xyëë diˈib jyaay. Ko tjääytyë ja neky, yëˈë parë tpudëjkëdë ja Dios mëduumbë ets kyaj tmastuˈuttëdë Jyobaa ets xëmë tjëjpˈixtët ja Diosë yˈAnaˈam Kyutujkën.

Nyaˈijxëmë mëbëjkën. Kyaj jeˈeyë tsyekyëty njënäˈänëm ko mëbëjkëm; jëjpˈam ets nyajnigëxëˈkëm. Extëmë Santyäˈägë jyënaˈany: “Yëˈë mëbëjkën yˈity extëmë oˈkpë, pën kyaj nduˈunëm ja oybyë” (Santya̱ˈa̱gʉ 2:26). Ko nmëdäjtëmë mëbëjkën, ta nmëmadakëmë amay jotmay, ets ta Jyobaa jantsy jotkujk nyayjawëty. Nan mbäät nˈijtëm seguurë ko pën nˈamdoˈojëmë Diosë wijyˈäjtën, yëˈë xymyoˈoyäˈänëm (Santya̱ˈa̱gʉ 1:2-6, 12). Dios pyudëjkëp pënaty xëmë mëduunëp ets kyaj myëdëgoyëty. Päätyë Santyäˈägë jyënaˈany: “Mëwingondë Dios, es yëˈë nandëˈën mëwingonëdëp miitsëty” (Santya̱ˈa̱gʉ 4:8).

Jëjpˈam etsë Dios mëduumbë dyajkëktëkët ja myëbëjkën parë tjëjpkudijët tijaty mbäät yajtëgoyëty ets yajmäˈätyëty. Juudës diˈibë naty tsënaapy mä jäˈäy jantsy axëëk jyukyˈattë, ojts jyënaˈany ets nduˈunëmë mëjää parë “kyaj pën dyajtëgatsët diˈibë nmëbëjkëm” (Juudʉs 3).

Njukyˈäjtëm wäˈäts. Jyobaa yˈawijxypy ets wäˈäts nayaˈijtëm mët oytyim tiijëty. Apostëlë Peedrë tkujäˈäyë: “Jikyˈattë wäˈäts [...] tyäˈädë dëˈën kyajxypyë Dios mä jyaaybyajtën: Mˈittëp miitsëty wäˈäts, mët kots ëj [Jyobaa] nwäˈätsëty” (1 Peedrʉ 1:15, 16). Pääty nˈokpanëjxëmë Kristë yˈijxpajtën, pesë Peedrë jyënaˈany ko të “xymyoˈoyëm tuˈugë ijxpajtën es nbaduˈunëm yëˈë” (1 Peedrʉ 2:21). Tsip nimëjää nmëmëdoˈojëmë Diosë yˈanaˈamën, per jëjpˈam ets nyaˈijtëmë jot winmäˈäny wäˈäts (1 Peedrʉ 3:16, 17). Peedrë ojts tnigajxy ko jëjpˈam ets njukyˈäjtëm wäˈäts ets nduˈunëm tijaty extëmë Dios ttseky, mientrës nˈawijxëm etsë Dios dyajminët ja kutëgoˈoyën ets ja jembyë jukyˈäjtën “mä tëgekyë yajtunët diˈibë tëyˈäjtën” (2 Peedrʉ 3:11-13).

Nyaˈijxëmë tsojkën. Fwank ojts tkujayë: “Dios yëˈë dëˈën ja tsojkën”. Jyobaa ojts dyaˈixyëty ko mëk xytsyojkëm, ko dyajkyë yˈUˈunk extëmë wintsëˈkën parë nyajpokymyaˈkxëm. ¿Ti net mbäät nduˈunëm? Fwank xyˈanmäˈäyëm: “Mëguˈugitëty, mët ko dëˈën ja Dios të xytsyojkëm, nandëˈën naytsyojkëm nixim niyam” (1 Fwank 4:8-11). Tuk peky wiˈix mbäät ntsojkëmë nmëguˈukˈäjtëm diˈib mëët nˈëxpëjkëm, net ko tsuj yajxon nˈaxäjëm mä jëën tëjk (3 Fwank 5-8).

¿Ets wiˈix mbäät nyaˈijxëm ko ntsojkëmë Jyobaa? Fwank jyënany: “Ko ntsojkëm ja Dios nguytyuˈunëmë naty yëˈë yˈanaˈamën. Es [...] kyaj mëk njäˈäjëm es nguytyuˈunëm diˈibë yëˈë xytyukˈanaˈamëm” (1 Fwank 5:3; 2  Fwank 6). Pënatyë Dios myëmëdoodëp ijttëp seguurë ko xëmë Dios tsyokäˈänëdë ets jyëjpˈijxtëp “ja jikyˈäjtën winë xëë winë tiempë” (Juudʉs 21).

(Jap yajnimaytyaˈaky mä Santya̱ˈa̱gʉ, 1 Peedrʉ etsë 2 Peedrʉ, 1 Fwank, 2 Fwank etsë 3 Fwank ets mä Juudʉs.)