¿Ti mbäädaampy ko mnëjkxët mäjëts nnaymyukëdë?

Mayë jäʼäy diʼib myëdäjttëbë ryelijyonk kyaj yʼoknëjkxnëdë mä nyaymyukëdë, mët ko kyaj pën jyotkujkmoʼoyëdë o kyaj yaʼʼatsoojëmbity tijaty jyanijawëyandëp. Per, ¿tidaa ko mbäät mnëjkxy mä nyaymyukëdë Jyobaa tyestiigëty? ¿Ti jap mbäädaampy?

Jotkujkʼäjtën mët ko myajpäädët mëdë jäʼäy diʼib ajiiky amëguʼuk ets oyjyaʼay. Pënaty ojts tpanëjkxtë Kristë mä primer siiglë, ojts nyaymyukëdë mäjaty ojts yajtukniwitsë, jap tyuʼukmujktë parë tʼawdäjttë Dios, tʼëxpëjktë Diosë yʼAyuk ets nyaymyëjämooyëdë nixim niyam (Ebreeʉsʉty 10:24, 25). Ko tyuʼukmujktë duʼun nyayjäʼäwëdë tuk jiiky tukmëguʼukpën, pes tapʼäjtë tsojkën (2 Tesalónikʉ 1:3; 3 Fwank 14). Ëëtsëty, nanduʼunëts tyam nduʼukmuktë ets nan nbattëbëtsë jotkujkʼäjtën.

Mbudëkëdëp ko xynyijawët wiʼix yajkuytyunyë Biiblyë kyäjpxwijën. Duʼun extëm tëëyëbë jäʼäy tyuʼukmujktë diʼibë Biiblyë myaytyakypy, nanduʼunëts tyam nduʼukmuktë, yetyëjk, toxytyëjk etsë ënäʼkuʼunk. Tapʼäjtpë jäʼäyëty diʼibëts xyaʼëxpëjktëp etsëts xypyudëkëdë parëts njaygyukëdët wiʼixëts nbadundëdë Biiblyë kyäjpxwijën (Deuteronomio 31:12; Nehemías 8:8). Pënaty nëjkxtëp mäjëts nnaymyukëdë, mbäät yʼëwdë, mbäät tʼatsoojëmbittë tijaty yajtëëpy ja diʼib jam yaʼëxpëjkp ets duʼun dyajnigëxëʼëktët ja myëbëjkën (Ebreeʉsʉty 10:23).

Nëjkxëp xyajkëktëkë mëbëjkën mä Dios. Apostëlë Pablo ojts tnijayë ja myëguʼuktëjk diʼib mä tuʼugë naymyujkën, duʼun tʼanmääy: “Mët ko nwinʼixandëp es [...] nnayaʼijt nnayajxoʼonëm nigijpxy mëdë tyäʼädë mëbëjkën diʼibë nmëdäjtëm” (Romanʉs 1:11, 12). Kojëts nduʼukmuktë mëdëtsë nmëguʼuktëjk, yëʼëjëts xypyudëjkëdëp parëts nyajkëktëkëdë nmëbëjkën etsëts niʼigyë nbëjtäʼäktëdë njot nwinmäʼäny parëts njukyʼattët extëmë Biiblyë jyënaʼany.

Oyxyëp ko mnëjkxy kojëts jatëgok nduʼukmuktët parë këʼëm xyʼixët. Jantsy oy nʼaxäjëyäʼändë. Kyaj pënë meeny sentääbë tʼamdoy, namayʼäjtënëts jap nduʼukmuktë.

• ¿Pën yajpanëjkxpë yʼijxpajtën kojëts nduʼukmuktë?

• ¿Wiʼix mbäät ndukʼoyʼäjtëm ko nduʼukmujkëm?