¿Wiʼixë mëjjäʼäytyëjk tpudëkë naymyujkën?

Mä Diosë kyäjpn diʼibëts ndukʼijtëdëp kyaj jyapʼatyë pastoor o saserdotë diʼib yajmëjuuytyëp. Duʼun yajtuny extëm ko tëëyëp tsyondaky ja naymyujkën, yajwinʼijxtëp pën mbäät “tkuentʼattë ja mëbëjkpëtëjk” diʼib yajpattëp mä naymyujkën (Apostʉlʉty 20:28). Tyäʼädë mëjjäʼäytyëjk diʼib oy ijttëp mëdë Dios, yëʼë diʼib wyooyoʼoytyëp ets tkuentʼattë ja diʼib yajpattëp mä naymyujkën, ets “tundë dëʼën xondaʼakyʼää xondaʼakyjyot extëmë Dios ttseky” ets kyaj mët ko të yajtukʼanaʼamdë o mët ko ttsoktë myeeny sentääbë (1 Peedrʉ 5:1-3). ¿Wiʼixëts xypyudëkëdë?

Xyʼijxʼijt xykyuentʼäjttëbëts. Mëjjäʼäytyëjk nyëʼëmooy tyuʼumooytyëp ja naymyujkën mët yëʼëgyëjxmë Biiblyë ets pyudëjkëdëp parë tmëwingondëdë Jyobaa. Kom nyijäʼäwëdëp ko Dios të tyuknipëkëdë tyäʼädë tuunk diʼib jëjpʼam, kyajts xytyuktundë ti tyimtsojktëp, niʼigyëts xypyudëkëdë parëts nʼittët oy ets agujk jotkujk (2 Korintʉ 1:24). Duʼun extëm tuʼugë borreegë kuentʼäjtpë tkuentʼaty tuʼuk tuʼugë byorreegë, nanduʼunë mëjjäʼäytyëjk tkuentʼaty niduʼuk niduʼugë Dios mëduumbë (Proverbios 27:23).

Xytyukniʼʼijxëdëbëts parëts ndundëdë Diosë tyuunk. Sëmään sëmäänë mëjjäʼäytyëjk dyajnaxtë ëxpëjkën mä naymyujkën ets yëʼë diʼibëtsë nmëbëjkën yajkëktëjkëdëp (Apostʉlʉty 15:32). Nan yëʼë myënëjkxtëbë jëjpʼamʼäjtën mäjëts ngäjpxwäʼkxtë, xytyukniʼʼijxëdëbëts wiʼixëts ndundëdë Diosë tyuunk ets nan käjpxwäʼkxtëbëts mëët.

Xyjotkujkmooytyëbëts niduʼuk niduʼuk. Parëts oy nʼittët niduʼuk niduʼuk mëdë Jyobaa, yëʼë mëjjäʼäytyëjk xynyinëjkxtëbëts mätsë njëën ndëjk ets xymyëtkäjpx xymyëtmaytyaktëbëts mä ja Tëjk mäjëts nʼëxpëktë. Nan xyjotkujkmooytyëbëts ets xypyudëjkëdëbëts mët yëʼëgyëjxmë Biiblyë (Santya̱ʼa̱gʉ 5:14, 15).

Mayë mëjjäʼäytyëjk nan myëdäjttëbë tyuunk etsë fyamilyë diʼib tsojkëp tkuentʼattët, abëkyë net ja tuunk diʼib nyikëjxmʼäjttëp mä naymyujkën. Tyäʼädë nmëguʼukʼäjtëm tsojkëp yajwintsëʼëgëdët mët ko mëk tyundë (1 Tesalónikʉ 5:12, 13).

• ¿Ti tuunk nyikëjxmʼäjttëbë mëjjäʼäytyëjk diʼib mä naymyujkën?

• ¿Wiʼix dyaʼixëdë tsojkën mä ëtsäjtëm niduʼuk niduʼuk?