Samuel xëmë ttuuny diˈibë Jyobaa tsyejpy

Samuel mutsknëmë nety ko ojts yajwoonëjkxy mä Diosë tyëjk parë jam tsyëënët ets jam tyunët. Mä tyäˈädë lugäär jam ijtyë jäˈäy tˈawdattë Jyobaa. ¿Mnijäˈäwëp tiko Samuel ojts yajwoonëjkxy mä Diosë tyëjk? Parë nnijäˈäwëm, min jawyiin nˈokˈijxëm wiˈix yajnimaytyaˈagyë tyääk, diˈib xëˈäjt Ana.

Ana tsyejpyë nety tuˈugë yˈuˈunk, per kyaj nety mbäät yˈuˈunkpääty. Pääty tmënuˈkxtakyë Jyobaa ets tˈamdooy tpëjktsooy parë pyudëkëdët. Ta ttukwandaky: Pën xymyoobyëts tuˈugë nˈuˈunk, jamëts ngëyakët mä mdëjk parë jam tsyëënët ets mëdunëdët. Jyobaa yˈatsoojëmbijt extëmë Ana myënuˈkxtakë, ta tmooy tuˈugë mixyuˈunk, diˈib xyëëmooy Samuel. Ana ta tkuytyuuny extëmë nety të twandaˈaky, pesë Samuel ja netyë jyëmëjt naa tëgëëk o taxkën ko ojts yajwoonëjkxy mä ja Diosë tyëjk parë jam tyunët.

Elí yëˈë nety tuump saserdotë wintsën mä ja Diosë tyëjk. Ets nan jamë nety tyundë nimajtskë yˈuˈunk diˈib mëjjäˈäy mëˈˈënäˈknë. Mä tyäˈädë lugäär jamë jäˈäy tˈawdattë Jyobaa, ets pënaty jam tsënääytyëp kyajxyëp axëëk yˈadëˈëtstë, per ja Elí yˈuˈunk yˈënäˈk yëˈë nety jam tyuundëbë axëkˈäjtën. Etsë Samuel yˈijxypyë nety tijaty tyuundëp. ¿Ojtsë Samuel axëëk yˈadëˈëtsy extëm ja yˈuˈunk yˈënäˈkë Elí? ¿Wiˈix mˈokwinmay?... Kyaj, yëˈë xëmë ttuuny diˈibë Jyobaa tsyejpy, extëmë nety ja tyääk tyeety të tyukniˈˈixëdë.

¿Wiˈixxyëbë Elí ttuuny ja nimajtskpë yˈuˈunk?... Ojtsxyëp tjëjwijtsëmbity ets kyajxyëp dyajtuunˈadëtsy mä ja Diosë tyëjk. Perë Elí kyaj duˈun ttuuny. Päätyë Jyobaa tyukjotˈambëjkë mët ja yˈuˈunk yˈënäˈk, ets ta jyënany ko ttukumëdowäˈäny.

Tëgok mä netyë Samuel myaˈay, ta tmëdooy ko yajmëgajpxy: ¡Samuel! Ta ojts nyijkxy pëyeˈegyë mä Elí, perë Elí ta yˈanmääyë: ¡Kyaj të nmëgajpxy! Tëgëkˈok duˈun ojts yajmëgajpxy, ets ta Elí yˈanmääyë ko pën yajmëgäjpxp jatëgok ta yˈatsowët: Käjpx Jyobaa, tyamëts nmëdooˈity. Ta Samuel duˈun ttuuny extëm yaˈˈanmääy. Ta Jyobaa yˈanmääyë: Anëëmë Elí ko ndukumëdowaambyëts mëdë fyamilyë ko axëk të yˈadëˈëtstë. ¿Ojtsëdaa Samuel tsyëˈëgë dyajnaxëdë tyäˈädë ayuk?... Ojts tsyëˈëgë. Per tyuun extëmë netyë Jyobaa të yˈanëˈëmxëty. Ets ok, ta duˈun tyuun jyäjtë. Ja nimajtskpë Elí yˈuˈunk, ta yˈoˈktë, ets ok ta nanduˈunë Elí yˈoˈky.

Samuel xymyoˈoyëmë oybyë ijxpajtën. Yëˈë tyuun diˈib oy, oyë wiink jäˈäy ttuundë axëkˈäjtën. ¿Ets mijts? ¿Mˈitäämp extëmë Samuel ets mdunaampy xëmë ti Jyobaa tsyejpy? Pën mduumpy duˈun, ta agujk jotkujk nyayjawëyaˈanyëtyë Jyobaa etsë mdääk mdeety.