Jyobaa tmëgajpxyë Samuel

Elí, ja saserdotë wintsën nimajtskë netyë myäänk: Hofní etsë Finehás. Yëˈë, saserdotë nety tyundë mä ja tabernakulo. Per kyaj nety tmëmëdowdë Jyobaa yˈanaˈamën ets axëëgë netyë jäˈäy ttundë. Ko ijty ja israelitëty tmënëjkxtë ja wintsëˈkën parë Jyobaa, Hofní mëdë Finehás yëˈë ijty myëwëˈëmëdëp ja tsuˈutsyë mas oybyë. Elí jyanijäˈäwëbë nety ko axëëk yˈadëˈëtstë ja yˈuˈunk yˈënäˈk, per kyaj tjëjwijtsëmbijty. Wiˈix mˈokwinmay, ¿waˈandaa Jyobaa ti ttuuny?

Samuel kyaj axëëk yˈadëtsy extëmë Hofní mëdë Finehás, oyë nety kajaa myutskëty. Päätyë Jyobaa tyukjotkëdakë. Mä tuˈugë ux, Samuel määbë nety, ta tmëdooy ko pën myëgajpxyëty. Ta pyëdëˈky ets ojts tninëjkxy pëyeˈegyë ja Elí ets tˈanmääy: “Tyäts të nminy”. Perë Elí, ta yˈatsoowë: “Kyaj të nmëgajpxy, nëjkx mmäˈäy”. Samuel ta jatëgok nyaygyoˈkë. Ta jatëgok yajmëgäjpxkojpë ets ko myëdëgëkˈokpë ojts yajmëgajpxyë Samuel, ta Elí tpëjkyë kuentë ko yëˈë Jyobaa mmëgäjpxëp. Elí ta tˈanmääyë Samuel parë ko jatëgok yajmëgäjpxët, duˈun yˈatsowët: “Käjpx Jyobaa. Tyamë mduumbë tmëdoowˈity”.

Samuel ta jatëgok nyaygyoˈkë ets ta tmëdooy ko yajmëgajpxy: “Samuel, Samuel”. Yëˈë ta yˈatsooy: “Käjpx Jyobaa. Tyamë mduumbë tmëdoowˈity”. Jyobaa ta jyënany: “Anëëmë Elí ko ndukumëdowaambyëts mëdë yˈuˈunk yˈënäˈk. Yëˈë nyijäˈäwëp ko yˈuˈunk yˈënäˈk axëëk yˈadëˈëtstë mätsë ndabernakulo, per kyaj wiˈix ttuny”. Jakumbom, ta Samuel dyaˈˈawatsy ja tëjkˈääw mä ja tabernakulo extëm xëmë ttuny. Tsëˈkë dyajnaxëdë Jyobaa yˈayuk mä ja saserdotë wintsën. Perë Elí ta ojts myëgajpxyëty ets yˈanmääyë: “Tsyulë, ¿wiˈixë Jyobaa të mˈanëˈëmxëty?”. Ta Samuel ttukmëtmaytyaktääy.

Ko yeˈky pyejtyë Samuel, duˈunyëm nyaymyaayë mëdë Jyobaa. Ets oyë nety mä tsyëënëdë ja israelitëty, niˈamukë tnijäˈäwëdë ko Jyobaa yëˈë nety të twinˈixyë Samuel parë tyunët kugajpxy ets fes.