MYËDËGËK PËKY
Wiˈixë jotmay xyaˈoyëdët
“Waˈan tˈity naniˈigyë tsojkën mä miitsëty, mët ko mä jäˈäy nyaytsyokëdë, may ja peky nyaytyuknimaˈxëdë.” (1 Peedrʉ 4:8)
Ko jäˈäy pyëktë, myëdäjttëbë amay jotmay mët ko wiˈixëm wyinmaytyë, wiˈixëm nyayjawëdë ets wiˈixëm të yaak të pyattë. Nan mbäät wiinktsoo tsyoonyë amay jotmay o ajotkumonë ti jotmay tpäättët.
Mbäät kyaj nmëjpëjtakëmë tyäˈädë jotmay, perë Biiblyë xyˈanmäˈäyëm ets nyaˈoˈoyëm (Matewʉ 5:23, 24). Ets mbäät yˈoyë ko nbaduˈunëmë Biiblyë kyäjpxwijën.
1 NIMAYTYÄˈÄKTË JA JOTMAY
BIIBLYË JYËNAˈANY: Ta tuˈugë tiempë parë ngäjpxëm (Eclesiastés 3:1, 7). Juuttë tiempë parë xynyimaytyäˈäktët ja jotmay; tukmëtmaytyaktäˈäy ja mjamyëët wiˈix mnayjawëty ets wiˈix xyˈixy ja jotmay. Mmaytyäˈäk xëmë tëyˈäjtën (Éfesʉ 4:25). Kyaj mtsiptunët oyë nety të mjajotˈambëky. Ets ko yuunk naxypy mˈatsowët, mbäät kyaj myëjwiinë ja jotmay diˈib yiˈin waanë (Proverbios 15:4; 26:20).
Axtë ko kyatuˈugyëdë mwinmäˈäny mët ja mjamyëët, duˈunyëm xywyintsëˈëgët, xytsyokët ets mˈitët oyjyaˈay (Kolosʉ 4:6). Yaˈoyë tsojkˈam ja mjotmay, ets kyaj yˈoyëty ko kyaj mnekynyaymyëgäjpxëdët (Éfesʉ 4:26).
DIˈIB MBÄÄT XYTYUNY:
Ix näˈä mbäät xynyimaytyäˈäktë ja jotmay
Kyaj xykyajpxypyotët ja mjamyëët. Mmaˈkxtuk axtë koonëm myaytyaktäˈäyët
2 MMËDOOˈIT ETS JAYGYUKË
BIIBLYË JYËNAˈANY: “Mnaytsyokëdëp nixim niyam extëm tukkaˈaxpën. Wintsëˈëgëdë wiingatypyë niˈigyë es kyaj mij këˈëm” (Romanʉs 12:10). Jëjpˈam ets xymyëdooˈitët wiˈix ja mjamyëët jyënaˈany ets xytyunëdë mëjää parë xyjaygyukët extëm wyinmay, “naymyëmaˈxtukëdë nixim niyam” ets “tudaˈakyˈattë” (1 Peedrʉ 3:8; Santya̱ˈa̱gʉ 1:19). Kyaj mnaybyëjtäˈägëdët ko mmëdooˈijtypy jyawë wiˈix ja mjamyëët jam mˈanëˈëmxëty. Mastuˈut ti jam mduumpy parë xymyëdooˈitët o yajtëw pën mbäät ok mmaytyäˈäktë. Pën mˈijxypy ja mjamyëët ko yëˈë diˈib mëët mnaybyudëkëty ets kyaj diˈib mëët xytyunyë kompetensyë, ta kyaj pojënë tijaty xyajpokët (Eclesiastés 7:9).
DIˈIB MBÄÄT XYTYUNY:
Yaˈˈawäˈätsë mjot mwinmäˈäny ets xymyëdooˈitët wiˈix ja mjamyëët jyënaˈany, oy xykyaˈoymyëdoy
Winmay ti yajjaygyukëyanëp ja mjamyëët. Ix wiˈixë wyiin jyëjp ttuny ets wiˈix ja yˈää yoˈkn yajmëdoy
3 TUUNˈADËˈËTSË MËJÄÄ
BIIBLYË JYËNAˈANY: “Yajtukˈoyˈäjtp oytyim diˈibë tuungëty diˈib mëk, per ko jeˈeyë ngäjpxëm yaˈˈayodëjkëp” (Proverbios 14:23). Kyaj jeˈeyë tsyekyëty nwinmäˈäyëm wiˈix yˈoyët ja jotmay, jëjpˈam ets nyaˈoˈoyëm. Mbäät tsyiptaˈaky, per nëjkxëp ndukˈoyˈäjtëm (Proverbios 10:4). Pën mnaybyudëjkëdëp nimajtsk, nëjkxëp xyˈaxäjëdë “oybyë kumäˈäyën” (Eclesiastés 4:9).
DIˈIB MBÄÄT XYTYUNY:
Winmay ti mbäät xytyundë niduˈuk niduˈuk parë xyaˈoyëdët ja jotmay
Ix näˈäganäˈäty nuˈun kujk xyaˈoyëdë ja mjotmay