Wiˈix xytyuˈumoˈoyëdë mˈuˈunk mˈënäˈk

Ko Jyobaa ojts tpëjtaˈagyë familyë, yëˈë tyuknipëjkë tääk teety parë tkuentˈatëdë yˈuˈunk yˈënäˈk (Kolosʉ 3:20). Mijts uˈunkteety, yëˈë mnikëjxmˈäjtypy etsë mˈuˈunk mˈënäˈk xytyukniˈˈixët parë ttsoktëdë Jyobaa, net ko yaˈkˈabattët, tapë netyë jyot wyinmäˈäny (2 Timotee 1:5; 3:15). Nan tsojkëp xypyëkëdë kuentë ti japˈäjtp mä kyorasoon. Ets diˈib niˈigyë pudëkëdëp yëˈë ja mˈijxpajtën. Ko mijts xymyëdatët mä mjot mgorasoon ja Diosë yˈayuk, ta mas oy nëjkx xytyukniˈˈixë ja mˈuˈunk mˈënäˈk (Salmo 40:8).

1 TI MDUNËP PARË MˈUˈUNK MˈËNÄˈK MMËTMAYTYÄˈÄGËDËT

BIIBLYË JYËNAˈANY: “Niˈamukë tsojkëp netyë tmëdooˈittët, kyaj netyë kyäjpxët” (Santiago 1:19, Traducción del Nuevo Mundo [TNM]). Seguurë ko mtsojkënyëˈajtypy etsë mˈuˈunk mˈënäˈk mmëtmaytyäˈägëdët. Pääty jëjpˈam ets xytyukˈixët ko mmëdooˈitaampy näˈä mdimmëtmaytyäˈägäˈänyëty. Ko jyamˈatëdë jotkujkˈäjtën mä mjëën mdëjk, mbäät oy nyayjawëdë parë tijaty mdukmëtmaytyäˈägëdët (Santya̱ˈa̱gʉ 3:18). Pën ja mˈuˈunk mˈënäˈk yˈijxypy ko mëk xyjëjwijtsëmbitäˈäny o ko mjotˈambëkäämp, mbäät kyaj tëyˈäjtën tijaty mnekytyukmëtmaytyaˈagyëty. Mmëdatë maˈkxtujkën ets anëëmë janääm jatsojk ko mtsejpy (Matewʉ 3:17; 1 Korintʉ 8:1).

DIˈIB MBÄÄT XYTYUNY:

• Juudë tiempë ko mˈuˈunk mmëtmaytyäˈägäˈänëdët

• Käjpx mmaytyäˈäk mëët janääm jatsojk, kyaj jyaayëty ko kyëxëˈëgëdë jotmay

2 PËKË KUENTË TI MDUKJAYGYUKËYANËP

BIIBLYË JYËNAˈANY: “Diˈib yajnigëxëˈkypy ko jyaygyujkëp këkpäät tuˈugë jotmay, oy wyimbëtsëmäˈäny” (Proverbios 16:20). Näˈäty, tsojkëp mas kajaa mwinmayët parë xypyëkëdë kuentë wiˈixën meerë ja mˈuˈunk nyayjawëty. Yëˈë ënäˈktëjk yajniˈigyëdëp tijaty, o yajpëtsëëmdëbë ää ayuk diˈib kyaj të twinmaytyë. “Ko pën tˈatsoojëmbity tuˈugë jotmay mä tkamëdoynyëm, tsuuˈat lokëˈat yëˈë.” (Proverbios 18:13.) Pääty, kyaj pojënë mjotˈambëkët (Proverbios 19:11).

DIˈIB MBÄÄT XYTYUNY:

• Mmaˈkxtuk parë kyaj xykyajpxypyotët ja mˈuˈunk ets kyaj mnayˈatsëˈëgëdët ko mdukmëtmaytyäˈägëdët oytyim tiijëty

• Jamyats wiˈix mnayjäˈäwë ko mduˈunˈäjty extëm yëˈë ets ti diˈib ijty jëjpˈam mbëjtakypy

3 YAJTUˈUGYËDË JA MWINMÄˈÄNY

BIIBLYË JYËNAˈANY: “Mëdow, uˈunk jaˈa, ja mdeetyë jyëjwijtsëmbijtën ets kyaj xyjaˈaytyëgoyëdë mdäägë yˈanaˈamën” (Proverbios 1:8). Jyobaa yëˈë të ttuknipëkyë tääk teety parë tˈanaˈamdëdë yˈuˈunk yˈënäˈk. Nimajtsk mbäät ttukniˈˈixëdë parë myëmëdowëdët ets wyintsëˈëgëdët (Éfesʉ 6:1-3). Uˈunk ënäˈk pyëjktëbë kuentë ko tääk teety kyaj tmëdattë “tiˈigyë jot winmäˈäny” (1 Korintʉ 1:10). Pääty, pën jam kyaj mnayjaygyukëdë, këdii xyajtsiptäˈäktë mˈuˈunk mˈënäˈk wyinduuy, pes mbäät kyaj mnekywyintsëˈëgëdë.

DIˈIB MBÄÄT XYTYUNY:

• Naygyäjpxëdë wiˈix ja mˈuˈunk mˈënäˈk xyjëjwijtsëmbitäˈändë

• Pën kyaj tyuˈugyëdë mwinmäˈäny mä wiˈix xyjëjwijtsëmbitäˈändë ja mˈuˈunk, tunë mëjää parë xyjaygyukët wiˈix ja mjamyëët wyinmay

4 TUKNIWITSË WIˈIX XYTYUNÄˈÄNY

BIIBLYË JYËNAˈANY: “Tukniˈˈixë ja mixyuˈunk ja nëˈë tuˈu diˈib mbäät tˈyoˈoy” (Proverbios 22:6). Pën mtsejpy ets oy wyimbëtsëmët wiˈix ja mˈuˈunk xyajˈyeeky xyajpety, kyaj duˈunyë xynyaˈixët. Tsojkëp yajxon xytyukniwitsët tijaty mdukniˈˈixëyaampy ets wiˈix xyjëjwijtsëmbitäˈäny (Salmo 127:4; Proverbios 29:17). Ko njëjwijtsëmbijtëm, kyaj yëˈëyë tˈandijy ko ti ndukkumëdoˈojëm, nan yëˈë yˈandijpy ndukjaygyujkëm tiko kyaj tijaty ttunët (Proverbios 28:7). Tukniˈˈixëdë nanduˈun parë ttsojkënyëˈattëdë Diosë yˈAyuk ets wiˈix yajjaygyukëyaˈany ja käjpxwijën diˈib myëmiimpy (Salmo 1:2). Duˈuntsoo dyajtundët yajxonë jyot wyinmäˈäny (Ebreeʉsʉty 5:14).

DIˈIB MBÄÄT XYTYUNY:

• Tunë mëjää parë mˈuˈunk mˈënäˈk tˈixtëdë Dios extëm tuˈugë jäˈäy diˈib mbäät ndukˈijxpajtëm

• Pudëkë mˈuˈunk mˈënäˈk parë tpëktëdë kuentë tijaty yajmäˈädanëdëp ets tjëjpkudijëdët, extëm tijaty pëtsëëmp mä Internet o mä redes sociales. Tukniˈˈixë wiˈix nyaygyuwäˈänëdët mä jäˈäy diˈib yˈaguanëˈäjttëbë ënäˈkuˈunk