MYËDËGËK PËKY
Ko axëëk nnayjäˈäwëm: Ko tuˈugë nmëguˈukˈäjtëm axëëk xytyuˈunëm
Linda jyënaˈany: “Tuˈugë nmëguˈukˈäjtëm diˈibëts mëët tuˈugyë nduˈukmuktë, xynyiwäämbajtëts kojëtsë netyë myeeny syentääbë të ndoonë. Ko tnijäˈäwëdë näägë nmëguˈukˈäjtëm, tam diˈib puwäˈkëdë ets tam diˈibëts ojts xypyuwäˈägë. Ok, ta tpëjkyë kuentë ko kyajtsë nety ëjts duˈun të nˈadëˈëtsy. Oy tjaˈˈamdooyë maˈkxën, nwimääyëts ko ninäˈäjëts mbäät ngapokymyeˈkxy extëmtsë nety të xytyuny”.
¿WAˈAN duˈun të mjaty extëmë Linda? Yëˈë jantsy axëëk yajnayjäˈäwë extëm ja nmëguˈukˈäjtëm tyuunë. Jotmaymyëët njënäˈänëm ko nääk mëjwiin kajaa yˈaxëktunëdë ko myëdëgoyëdë myëguˈuktëjk, axtë myastuttëbë Dios. ¿Waˈan duˈun të mjaty?
¿Mbäät pën xytyukmastutëm parë kyaj nekytsyojkëmë Dios?
Ko tuˈugë nmëguˈukˈäjtëm axëëk xytyuˈunëm, mbäät tsyiptaˈaky nbokymyaˈkxëm. Ets kom Dios mëduump, niˈigyëxyëp mbäät dyajnigëxëˈëgyë tsojkën (Fwank 13:34, 35). Pääty ko nmëguˈukˈäjtëm axëëk xytyuˈunëm, niˈigyë xyajtsayujtëm ets mëk njäˈäwëm (Salmo 55:12).
Biiblyë jyënaˈany ko näˈäty, tam tiko nmëguˈukˈäjtëm nyaytyukjotˈambëkëdë (Kolosʉ 3:13). Per ko net ëtsäjtëm nbatëmë duˈumbë jotmay, mbäät xytsyiptakxëm nyaˈoˈoyëm. ¿Ti mbäät xypyudëjkëm? Min nˈokˈijxëm tëgëëgë käjpxwijën diˈibë Biiblyë yajkypy.
NDeetyˈäjtëmë tsäjpotmëdë yˈijxypy tukëˈëyë. Jyobaa yˈijxypy tukëˈëyë tijaty tuun jäjtëp, axtë ko kyayajtunyë tëyˈäjtën ets nguˈayoˈowëm (Ebreeʉsʉty 4:13). Jyobaa kyaj jeˈeyë tpëkyë kuentë, nan jyäˈäwëp ja jäj jëmuˈumën (Isaías 63:9). Dios mtsojkëp, pääty këdii xynyasˈixë etsë nmëguˈukˈäjtëm, jotmay o moˈon tujkën mdukmastuˈudëdët (Romanʉs 8:35, 38, 39). Ets kom yëˈë nbanëjkxëmë yˈijxpajtën, nan kyaj mbäät nasˈijxëm ets tii o ja pën xytyukmastutëm ja tsojkën diˈib nmëdäjtëm mä Jyobaa.
Ko pën nbokymyaˈkxëm, kyaj yëˈë tˈandijy ko ngupëjkëm ti të ttuny. Ko nbokymyaˈkxëm ja diˈib të xymyëdëgoˈoyëm, kyaj yëˈë tˈandijy ko kyaj axëëk të xyajnayjäˈäwëm o ko ngupëjkëm ti të ttuny. Jyobaa ninäˈä tkatukjotkëdaˈaky ko pën pyokytyuny, per pyokymyeˈkxypy ja jäˈäy pën yˈijxypy ko nitëjkëp (Salmo 103:12, 13; Habacuc 1:13). Jyobaa kyaj xëmë yˈakäˈänyëty ets kom tsyejpy nbanëjkxëmë yˈijxpajtën, ta xyˈanmäˈäyëm parë nanduˈun nbokymyaˈkxëmë nmëguˈukˈäjtëm (Salmo 103:9; Matewʉ 6:14).
Ndukˈoyˈäjtëm ko ngapëjkëˈkëmë akë. ¿Tiko? Okwinmay ko xykyoonˈity tuˈugë tsää diˈib jeˈemtsy tuk kilë. Waˈan xymyëmadäˈägët ko jeˈeyë tuk ratë, per ko jeky xykyoonˈijnët, naa tuk oorën o niˈigyë, ta mgëpäˈämanënë. Niˈigyë xyjawëyaˈany mas jeˈemtsy ko jeky xykyoonˈijnët. Nanduˈun jyaty ko nbëjkëˈkëmë akë, ko mas jeky nbëjkëˈkëm, oy kyamëjwiin kyakajaajëty, ta niˈigyë xyˈaxëktunäˈänëm. Päätyë Jyobaa xyˈanmäˈäyëm ets kyaj nbëjkëˈkëmë akë, pes yëˈë nyijäˈäwëp ti oy parë ëtsäjtëm (Proverbios 11:17).
Ndukˈoyˈäjtëm ko kyaj nbëjkëˈkëmë akë
“Duˈunxyëp extëmtsë Jyobaa këˈëm xymyëgajpxy”
¿Ti tyuunë Linda parë ojts tpokymyeˈkxy ja myëguˈuk diˈib niwäämbajtë? Pyawinmääy wiˈixë Biiblyë jyënaˈany tiko mbäät naybyokymyaˈkxëm (Salmo 130:3, 4). Diˈib niˈigyë pudëjkë, yëˈë ko tjamyejtsy ko pën nbokymyaˈkxëmë wiinkpë, ta nanduˈunë Jyobaa xypyokymyaˈkxäˈänëm (Éfesʉ 4:32–5:2). Ko Linda twinmääy wiˈixë tyäˈädë tekstë pyudëjkë, ta jyënaˈany: “Duˈunxyëp extëmtsë Jyobaa këˈëm xymyëgajpxy”.
Ok, ta Linda kyaj tnekypyëjkëˈkyë akë. Ojts tpokymyeˈkxy ja myëguˈuk ets tyam jantsy oy mëët nyaymyayëty. Linda duˈunyëm tmëdunyë Jyobaa etsë Jyobaa nan tsyejpy parë xymyëdunët winë xëë winë tiempë.