Jonatán ijt amëk jotmëk ets kyaj tmastutyë David

Jonatán, ja kyaˈaxkopkˈuˈungë Saúl, yëˈë ijty tuˈugë tsiptuumbë diˈib jotmëk. David jyënany ko Jonatán mas peˈtypy ets kyaj dyuˈunëtyë witsn, ets ko niˈigyë myëkëty ets kyaj dyuˈunëtyë kää. Tëgok, ta Jonatán tˈijxy jëdungëjxy tyanëdë soldäädëty diˈib tsoˈondëp filistee. Pääty tˈanmääy ja tyuumbë diˈib pagëˈëyxyëp tijaty: “Net nibëdëˈkëm pënë Jyobaa yajkypy tuˈugë ijxwëˈëmën. Pënë filisteety jënandëp parë nibatëjkëm, yëˈë nety yˈandijpy ko mbäät mëët ntsiptuˈunëm”. Ta ja filisteety tyëjkëdë yax jojkpë: “¡Kuˈttë yam parë ntsiptuˈunëm!”. Ta netë Jonatán ets ja tyuumbë pyatëjkëdë jëdungëjxy ets ja dyaˈoˈktë 20 soldäädë.

Saúl yëˈë nety kyaˈaxkopkˈuˈunkˈäjtypyë Jonatán, pääty yëˈë nety tunäämp rey ko yˈoogëdë tyeety. Jonatán nyijäˈäwëbë nety ko Jyobaa yëˈë të twinˈixyë David parë tyunët rey jam Israel, per kyaj tˈaxëkˈijxy. Niˈigyë mëdë David nyaymyaaybyëjkë. Ojts nyaygyäjpxëdë ko nyaygyuentˈatäˈänëdë nixim niyam ets nyaynyitsiptunäˈänëdë. Ets parë Jonatán ttukˈijxyë David ko yëˈë mëët jyantsy nyaymyayëty, ta tmooyë wyit, yˈespäädë, yˈarkë etsë wyëën.

Ko netyë David kyeˈekyjëdity, ta Jonatán ojts nyinëjkxyëty ets yˈanmääyë: “Tsojkëp mˈitët amëk jotmëk. Jyobaa të mwinˈixyëty ets mdunët rey etsë ndeetyëts wäˈäts tnijawë”. ¿Mmëdataampy duˈunë mëtnaymyaayëbë diˈib jantsy oyjyaˈay extëmë Jonatán?

Jonatán kanäkˈokë jyukyˈäjtën tpëjtaky oˈkën jëjpˈam parë tpudëjkë myëtnaymyaayëbë. Nyijäˈäwëbë nety ko tyeety yaˈoogaambyë David, pääty tˈanmääy: “Pën myaˈoˈkypyë David, kajaa nety të mbokytyuny, yëˈë kyaj ti të ttuundëgoy”. Saúl ta jyantsy jyotˈambëjky. Ok, ta Saúl mëdë Jonatán yˈoˈky mä nety jam tsyiptundë.

Ko Jonatán yˈoˈky, ta David tˈëxtääyë Mefibóset, myäängë Jonatán. Ko tpaty ta tˈanmääy: “Nguentˈataampy nuˈunë mxëëw mjukyˈäjtën, mët ko jantsy oyëts naymyaayë mëdë mdeety. Jam mtsëënët mäts nˈaneˈemy ets mgayët mätsë nmeesë”. David ninäˈä tkajäˈäytyëgooy ja myëtnaymyaayëbë Jonatán.