Tuˈugë Jyobaa yˈanklës ojts tkuwäˈäny ja Ezequías

Ja rey Senaquerib diˈib Asiria të nety tjaˈabëky ja mäjkpë tribu diˈib Israel, ets nan jyaˈabëkaambyë nety ja majtskpë tribu diˈib Judá. Pääty ogäˈän tjaˈabëjky tuˈuk tuˈuk ja nax käjpn diˈib yajpatp Judá, per diˈibë nety mas jyaˈabëkaampy yëˈë Jerusalén. Senaquerib kyaj nety tnijawë ko Jyobaa yëˈë diˈib kyuwaambyë Jerusalén käjpn.

Ta ja Ezequías, diˈib anaˈamp Judá, jantsy kajaa tmooyë meeny ja Senaquerib parë kyaj tnibëdëˈëgëdë Jerusalén käjpn. Senaquerib ta ojts tˈaxäjë ja meeny, per kyaj tkuytyuuny ja yˈayuk, kyajx ja syoldäädëtëjk parë dyajkutëgoytyët ja Jerusalén. Jantsy tsëˈkëdë ja jäˈäyëty diˈib Jerusalén mët ko ja Asiria jäˈäy niˈigyë nety myëwingonëdë. Ta Ezequías yˈanmääyëdë: “Këdii mtsëˈëgëdë. Yëˈë Asiria jäˈäy kumëjääwëty, per ëtsäjtëm niˈigyë Jyobaa xypyudëkëyäˈänëm”.

Senaquerib, ta tkejxyë Rabsaqué diˈib yajkugajpxyˈajtypy, parë nëjkx tnëxiˈiky ttukxiˈiky ja jäˈäyëty diˈib Jerusalén. Ko jyajty mä ja käjpndëjkˈääw, ta yaxkeky: “Jyobaa kyaj mbäät mbudëkëdë. Këdii Ezequías mnaytyukwinˈëënëdë. Ni diˈibë dios mbäät mgayajtsoˈogëdë”.

Ezequías ta dyajtëëyë Jyobaa ti tyunëp, ets ta yˈatsoowë: “Këdii mˈatsëˈëgëtyë Rabsaqué yˈääw yˈayuk. Senaquerib kyaj tjaˈabëkäˈänyë Jerusalén käjpn”. Ok, ta Ezequías tyuknigajxë Senaquerib kanäägë neky, mä yaˈˈanëëmë: “Naygyëyakëdë. Jyobaa kyaj mbäät myajtsoˈogëdë”. Ta netë Ezequías tˈanmääyë Jyobaa: “Tunë mayˈäjtën, yajnitsoktëgëts parë niˈamukë jäˈäy tnijawëdët ko mijts tukpäjkë Dios diˈib tëyˈäjtën”. Etsë Jyobaa, ta yˈatsooy: “Yëˈë rey diˈib Asiria kyaj tyëkëyaˈany Jerusalén. Ëjts nguwäˈänaambyë ngäjpn”.

Senaquerib seguurë nety yˈity ko tim tsojk tjaˈabëkäˈänyë Jerusalén. Per mä tuˈugë koots, ta Jyobaa tkejxy tuˈugë yˈanklës mä nety ja Asiria jäˈäy të nyaynyikojëdë käjpnbëˈam. ¡Ets mä tadë koots dyaˈoˈky 185,000 ja soldäädëty! Duˈun ja Senaquerib yˈoˈktääy ja syoldäädëtëjk, ets kuanë ko net ojts jyëmbijnë mä tyëjk. Jyobaa ojts tkuwäˈäny ja Ezequías ets ja Jerusalén käjpn, extëmë nety të twandaˈaky. Koxyëp mijts mjukyˈajty jam Jerusalén, ¿ojtsxyëp xymyëbëkyë Jyobaa?