Esdras tyukniˈˈijxë Diosë yˈanaˈamën ja nax käjpn

Të nety nyaxy naa 70 jëmëjt mä nimay ja israelitëty jyëmbijttë Jerusalén, ets niwaanë nety yˈaktsëënëdë Persia. Niduˈuk yëˈë Esdras, tuˈugë saserdotë diˈib tukniˈˈijxë Jyobaa yˈanaˈamën. Esdras ta tnijäˈäwë ko ja israelitëty diˈib Jerusalén kyaj nety jam tmëmëdowdë ja Diosë anaˈamën, pääty tsyoonany parë nëjkx tpudëkëyaˈany. Artajerjes, ja rey diˈib Persia, duˈun yˈanmääyë: “Dios yëˈë të mmoˈoyëtyë wijyˈäjtën parë jäˈäy xytyukniˈˈixët ja Diosë yˈanaˈamën. Pääty, nëjkx ets wow pën mdimpatsoonanëp”. Esdras ta dyajtuˈukmujky niˈamukë pënatyë nety jëmbitandëp Jerusalén. Ta tmënuˈkxtakyë Jyobaa parë kyuentˈatëdët nëˈääy tuˈääy ets ta tyuˈudëjkëdë.

Kyum mäjtaxk poˈo jyäjttë Jerusalén. Ta ja prinsipes diˈib Jerusalén tˈanmääytyë Esdras: “Yëˈë israelitëty kyaj të tmëmëdowdë Jyobaa ets të tpëktë toxytyëjk diˈib yˈawdäjttëbë dios diˈib kyaj tyëyˈäjtënëty”. ¿Ti tyuunë Esdras? Ta nyaygyoxtënääytyakë mayjyaˈay wyinduuy ets nyuˈkxtaky: “Jyobaa, mëjwiin kajaats tijaty të xytyukmëdundë, per të nmëbokytyundë”. Ta ja israelitëty jyodëmbijttë, per duˈunyëm ttuundë diˈibë nety kyaj yˈoyëty. Päätyë Esdras twinˈijxyë mëjjäˈäytyëjk etsë fesëty parë tpayoˈoytyët ja jotmay. Kyumdëgëëk poˈo, ta niˈamukë yaˈëxkajxtë pënaty nety kyaj tˈawdatäˈändë Jyobaa.

Ja nyajxy mäjmajtsk jëmëjt. Ko yajnabojtstääyë Jerusalén käjpn. Ta Esdras dyajtuˈukmuky ja nax käjpn mä mayjyaˈay tyuˈukmuktë ets ta ojts tkajpxy ja Diosë Lyey. Ko ojts tˈayaˈpwaˈkxy ja liibrë mä myinyë Diosë yˈanaˈamën, ta tyënääyëˈktë ja israelitëty. Esdras ta tmëjkumääyë Jyobaa, ets ja israelitëty ta tkonëˈktë ja kyëˈë parë dyajnigëxëˈktë ko kyupëjktëp. Ta netë Esdras ojts tkajpxy ja Ley ets tnimaytyaky. Ja israelitëty myëdoowˈijttë. Kyupëjktë ko të nety jatëgok tmëjagamgaˈaktë Jyobaa ets ta tyëjkëdë jëëy yaxpë. Jakumbom, ta jatëgokë Esdras ojts tyukwingugäjpxëdë ja Ley. Ja israelitëty pyëjktë kuentë ko tsojkëbë nety tnixëwdundët ja Tëjk diˈib nikemy nixoˈomy. Ets ta netyë ttukniwinmäˈäyëdë wiˈix ttunäˈändë.

Ja israelitëty jantsy jotkujk nyayjäˈäwëdë ko xyëwduundë jëxtujk xëëw. Myooytyë dyoskujuyëmë Jyobaa ko yˈijty wyindëëy ja kyojy pyëjtaˈagyëty. Desde ko Josué yˈoˈky, kyaj nety tˈoknixëwduunëdë ja Tëjk diˈib nikemy nixoˈomy. Ko ja xëëw jyëjpkuwatsë, ta tyuˈukmujktë ets nyuˈkxtaktë: “Jyobaa, mijtsëts të xyyaˈˈawäˈätspëtsëmdë mätsë nety nyajtuumbëˈattë. Xymyooytyëtsë ngäˈäy nˈukën mä ja lugäärë äänëˈëk tëtsëˈëkpë etsë tyäˈädë oybyë nax. Kyaj kanäkˈok të nmëmëdowdë. Ets oyëts nimay xyjatuknigajxtë mgugajpxy kyajts nmëjpëjtaktë. Per xëmëts xymyëmaˈkxtujktë. Ninäˈä xykyajäˈäytyëgooy ti mdukwandakë Abrahán. Tyamëts nwandäˈäktë ko nmëmëdowandëp”. Ta yajjääybyejty diˈibë nety të twandäˈäktë, ets ta tfirmaräjttë ja prinsipes, lebitëty etsë saserdotëty.