Tukëˈëyë relijyonk mëdiˈibë kyaj tyëyˈäjtënëty yajnibaxëtëjkëdëbë Dios

¿Tiko mayë relijyonk axëëk yˈadëˈëtstë pën yëˈë kyudënääytyëbë Dios mëdiˈibë tsojkpën? Yëˈko kyaj tyëyˈäjtënëty. Yajnibaxëtëjkëbë Dios extëm yˈadëˈëtstë ets ko jäˈäy twinˈëën twinxäjtë. ¿Wiˈix dyajnibaxëtëkëdë? ¿Wiˈixëdaa Dios yˈoknayjyawëty? ¿Ets tidaa net yëˈë tyunaampy?

1. ¿Wiˈix dyajnibaxëtëkëdë Dios extëm tijatyë jäˈäy ttukniˈˈixëdë?

Tukëˈëyë relijyonk mëdiˈibë kyaj tyëyˈäjtënëty ‘käˈäp ja Diosë tyiyˈäjtën të tmëjpëjktakëdë, niˈigyë ja ënëëmëtyaˈaky të dyajmëjtëkëdë’ (Romanos 1:25, TY). Extëm nˈokpëjktakëm, kyaj tyukniˈˈixëdë ti Dios txëwˈaty, perë Biiblyë jyënaˈany ko tsojkëp ndukmëgäjpxëmë Diosë xyëëw (Romanos 10:13, 14, TNM). Ets ko ti ayoˈon tyuny jyatyëty, ta mëdiˈibë nyiwintsënˈäjttëbë relijyonk jyënäˈändë ko Diosën duˈun yajnigutujkëp. ¿Per tëyˈäjtën? Kyaj, Dios ninäˈä tkakaxët tuˈugë ayoˈon (käjpxë Santiago 1:13, TNM). Ko duˈunë Dios yajniwäämbety, ta mayë jäˈäy tmëjagamgaˈaktë.

2. ¿Wiˈix dyajnibaxëtëkëdë Dios mët tijaty tyuundëp?

Relijyonk mëdiˈibë kyaj tyëyˈäjtënëty kyaj ttsoktë jäˈäy extëmë Dios. Biiblyë jyënaˈany ko ja pyoky të “jyantsy nyipajnë, axtë myëbatnëp ja tsäjp” (Diˈibʉ Jatanʉp o Apocalipsis 18:5). Nuˈun kujkë tiempë nyaxy, tyuktëjk tyukwäˈkëdëbë politikë, tsip ets kyupëjktëp parë mayjyaˈay jyäämˈook nyääxˈooktët. Pënaty nyiwintsënˈäjttëbë relijyonk nayajkumeenytyakëdëp ets yˈamdoowdëbë meeny sentääbë parë jyukyˈattë extëmë kumeenyjyaˈay. Ko duˈun yˈadëˈëtstë, ta dyajnigëxëˈëktë ko ninuˈunën tkaˈixyˈattë Dios. Pääty, kyaj mbäät njënäˈänëm ko yëˈë kyudënääytyëp (käjpxë 1 Fwank 4:8).

3. ¿Wiˈixë Dios nyayjyawëty ko tˈixy tijaty tyuundëbë relijyonk mëdiˈibë kyaj tyëyˈäjtënëty?

Pën mijts axëëk mnayjyawëty ko xyˈixy tijatyë relijyonk tyuundëp, okwinmayë net wiˈix nyayjyawëtyë Jyobaa. Yëˈë tsyojkypyë jäˈäy, per tyukjotˈambëjkypy pënaty nyiwintsënˈäjttëbë relijyonk mët ko yajnibaxëtëkëdë ets mët ko tˈaxëktundë jyaˈay. Dios të twandaˈaky ko dyajkutëgoyaˈany tukëˈëyë relijyonk mëdiˈibë kyaj tyëyˈäjtënëty ets ninäˈä jatëgok kyanekykyëxëˈëgäˈäny (Diˈibʉ Jatanʉp 18:21). Tim tsojk dyajkutëgoyaˈany (Diˈibʉ Jatanʉp 18:8).

AK NIJAWË NIˈIGYË

4. Dios kyaj tkupëjktäˈäy tukëˈëyë relijyonk

Mayë jäˈäy wyinmaytyë ko tukëˈëyë relijyonk ak oy ets ko kyupëjktaabyë Dios. ¿Per tëyˈäjtëndaa? Käjpxtë Matewʉ 7:13, 14 ets nimaytyäˈäktë mëdiˈibë yä yajtëëpy:

• Extëm jyënaˈanyë yäˈädë tekstë, ¿wiˈixëk yˈixëty ja tuˈu mëdiˈibë mënëjkxp mä ja jukyˈäjtën?

Ixtë BIDEO ets nimaytyäˈäktë mëdiˈibë yä yajtëëpy:

BIDEO: ¿Kyupëjkypyë Dios tukëˈëyë relijyonk? (jeˈeyë tuk pëky yaˈixy) (3:22)

• ¿Jënäämbë Biiblyë ko Dios kyupëjktaabyë relijyonk?

5. Kyaj dyajnigëxëˈëktë ja tsojkën extëmë Dios

Relijyonk mëdiˈibë kyaj tyëyˈäjtënëty yajnibaxëtëjkëdëp ja Dios, extëm ko ttuktëkëdë tsip. Min nˈokˈijxëm tuˈugë ijxpajtën, ixtë BIDEO. Ta net xynyimaytyäˈäktët mëdiˈibë yä yajtëëpy:

BIDEO: ¿Wiˈixë relijyonk ttuktëjkëdë tsip mä Segunda Guerra Mundial? (2:22)

• ¿Ti tyuundë mayë relijyonk mä Segunda Guerra Mundial?

• ¿Wiˈix mijts xyˈokˈixy extëm yˈadëtstë?

Käjpxtë Fwank 13:34, 35 etsë Juan 17:16, TNM. Ta net xynyimaytyäˈäktët mëdiˈibë yä yajtëëpy:

• ¿Wiˈixëdaa Jyobaa nyayjyawëty ko relijyonk ttuktëkëdë tsip?

• Relijyonk mëdiˈibë kyaj tyëyˈäjtënëty nëgooyë axëëk të yˈadëtsnëdë ets kyaj dyajnigëxëˈëktë ja tsojkën mëdiˈibë Dios myëdäjtypy. ¿Tijaty mijts të xyˈixy ttundë ets pääty mjënäˈäny ko jantsy duˈun?

6. Dios yaˈˈawäˈätspëtsëmaambyë jäˈäy mä relijyonk mëdiˈibë kyaj tyëyˈäjtënëty

Käjpxtë Diˈibʉ Jatanʉp 18:4a ets nimaytyäˈäktë mëdiˈibë yä yajtëëpy:

• Dios tsyojkypy etsë jäˈäy ttukpëtsëëmduˈudëdë relijyonk mëdiˈibë kyaj tyëyˈäjtënëty. ¿Wiˈix mijts xyˈokˈixy?

7. Ixyˈäjtˈadëˈëts ja Dios mëdiˈibë tëyˈäjtën

Ko xyˈixy xymyëdoy tijaty tyuundëbë relijyonk mëdiˈibë kyaj tyëyˈäjtënëty, ¿mbäät yëˈë xypyokyˈixyë Dios? Okwinmay ko tuˈugë mixy o kiixy kyaj tkupëky ja ëwij käjpxwijën mëdiˈibë tyeety mooyëp, ta tsyoˈonë mä tyëjk ets axëëgë net ja jyukyˈäjtën dyajnëjkxnë. Ja uˈunkteety kyaj tˈoyˈixy extëm ja yˈuˈunk jyukyˈaty. Pääty, ¿oyëdaa ko yëˈë nbokyˈijxëm ko ja yˈuˈunk axëëk yˈadëˈëtsy?

• Extëm yˈadëˈëtstë relijyonk mëdiˈibë kyaj tyëyˈäjtënëty, ¿oyëdaa ko Jyobaa nbokyˈijxëm etsë net kyaj nekyˈixyˈatäˈänëm?

TI TË NJÄJTËM

Tukëˈëyë relijyonk mëdiˈibë kyaj tyëyˈäjtënëty të dyajnibaxëtëkëdë Diosë xyëëw ko jäˈäy twinˈëën twinxäjtë ets ko axëëk të yˈadëˈëtstë. Päätyë Dios tim tsojk dyajkutëgoyaˈany.

Ajamyatsë

• ¿Wiˈix mijts xyˈokˈixy tijaty tyuundëbë relijyonk mëdiˈibë kyaj tyëyˈäjtënëty ets tijaty tukniˈˈijxëdëp?

• ¿Wiˈixë Jyobaa tˈixy tukëˈëyë relijyonk mëdiˈibë kyaj tyëyˈäjtënëty?

• ¿Wiˈixë Dios ttunäˈäny tukëˈëyë relijyonk mëdiˈibë kyaj tyëyˈäjtënëty?

AK PAYEˈEY

Taaˈäjtp majtsk pëky tiko Dios kyaj tkupëkyë relijyonk mëdiˈibë kyaj tyëyˈäjtënëty. Min nˈokˈijxëm.

“¿Xytyukmëwingoˈonëmë Dios oytyim mëdiˈibëtyë relijyonk?” (Myiny mä jw.org)

¿Tiko Jyobaa ttsoky ets nduˈukmujkëm mëdë jäˈäy mëdiˈibë yëˈë nanduˈun awdäjtëdëp?

“¿Tim jëjpˈamëdaa ndukˈijtëm tuˈugë relijyonk?” (Myiny mä jw.org)

Tuˈugë teety kyaj nety yˈity seguurë pën oy tijaty tyuumpy ja ryelijyonk. Per duˈunyëm tˈëxtääyˈadëtsy ja tëyˈäjtën parë tnijawëyany pënën Dios.

“Tuˈugë teety tmastuˈuty ja tsäjptëjk” (¡Despertad!, febreerë 2015)

Kanäk mëgoˈpx jëmëjt kujkë relijyonk tniwäämbattë Dios ets të jäˈäy ttukmëbëktë ko yëˈë kyaj xymyëmäˈäy xymyëdäjëm ets ko axëkjäˈäy. Nijawë tëgëk pëky wiˈix jyënäˈändë.

“¿Tiko näägë jäˈäy tsyiptakxëty ets ttsokëdë Dios?” (Diˈib Xytyukˈawäˈänëm, 1 äämbë nobiembrë 2013)