Pënaty kyäjpxtëbë ëxpëjkpajn yëˈë nyijawëyandëp
¿Jantsy tëyˈäjtën ko niˈamukë Dios mëduumbë nëjkxtëp tsäjpotm?
▪ Mayë jäˈäy të tkäjpxtë tyäˈädë Jesusë yˈää yˈayuk: “Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë winë tiempë es kyaj kyutëgoytyët” (Fwank 3:16). ¿Yëˈë Jesus myaytyäˈägan ko niˈamukë Dios mëduumbë nëjkxandëp tsäjpotm parë jam jyukyˈattët winë xëë ets agujk jotkujk?
Okpëkë kuentë wiˈixë Jesus yä jyënany: “Ni pënëm kyapatëkë tsäjpotm, ëjtsë dëˈën jeˈeyë, ja Naxwinyëdë Jäˈäyëtyë Kyudënaabyë, es yä naxwiiny ngëdaˈagyëts” (Fwank 3:13). Tyäˈädë yëˈë xytyukjaygyujkëm ko pënaty tëëyëp Dios mëduundë kyaj pyatëjkëdë tsäjpotm, extëmë Noé, Abrahán, Moisés o David (Apostʉlʉty 2:34). Pääty, ¿mä ojts nyëjkxtë? Jutoty, duˈun jap yajpäättë extëmxyëp myäˈädë, kyaj ti tjawëdë axtë ko jyäˈtët ja tiempë parë pyëdëˈëktët (Eclesiastés 9:5, 6; Apostʉlʉty 24:15).
Ko ngäjpxëmë Biiblyë, ta nbëjkëmë kuentë ko Jesus yëˈë diˈib jayëjp myaytyak ko mbäädë jäˈäy nyëjkxtë tsäjpotm ko yˈooktët. Tyukwandak ja yˈapostëlëty ko jam tˈixäˈäny tuˈugë lugäär parë yëˈëjëty (Fwank 14:2, 3). Tyäˈädë tukniˈˈijxënë kyajnëmë nety ttimmëdowdë ja Dios mëduumbë. Ok, ta apostëlë Pablo jyënany ko ja Jesus yˈoˈky, jukypyëjk ets pyatëjkë tsäjpotm, ta “dyaˈˈawatsy” ja jembyë nëˈë tuˈu parë ja yˈëxpëjkpëty, tuˈugë tuˈu diˈib nipënnëmë nety tkayoˈoy (Ebreeʉsʉty 10:19, 20).
¿Yëˈë duˈun yˈandijpy ko mä tyäˈädë tiempë mbäädë nety niˈamukë Dios mëduumbë nyëjkxtë tsäjpotm? Kyaj. Pes pënaty nëjkxtëp tsäjpotm të yajtuknipëktë tuˈugë tuunk ets niwaanë jeˈeyë të yajwinˈixtë. Ja ux mä Jesus yˈakˈyajpaty mëdë yˈapostëlëty, ojts tˈanëëmëdë: “Es nbëjtäˈäktët miitsëty extëmë gobernadoorëty es mˈanaˈamët” mä Diosë yˈAnaˈamën. Yëˈë nety diˈib tyunandëp: yˈanaˈamdët tsäjpotm mëdë Jesus (Lukʉs 22:28-30).
Per kyaj nety yëˈëyë ja apostëlëty duˈun tyunäˈändë. Pesë Juan yajtukˈijx ko Jesus yajpääty tsäjpotm mët tuk grupë naxwinyëdë jäˈäy diˈibë nety të jyukypyëktë, ets jyënany ko të nety yajpëjtäˈäktë anaˈambëty ets saserdotëty parë “yajkutuktët naxwiiny” (Diˈibʉ Jatanʉp [Apocalipsis] 3:21; 5:10). ¿Ninääk tˈijxy? Duˈun extëm oytyim määjëty, jeˈeyë niwaanë jäˈäy yˈanaˈamdë, nanduˈun jyaty mëdë Anaˈamënë diˈib tsäjpotm: Jesus ja Diosë Byorreegë, yˈanaˈamäˈäny mët 144,000 diˈib të yajwinˈixy ets diˈib të “yajjuytyë mä naxwinyëdë jäˈäy” (Diˈibʉ Jat. 14:1, 4, 5, Traducción del Nuevo Mundo).
Ko yaˈijxkijpxyë 144,000 mëdë Dios mëduumbëty diˈib tëëyëp ets diˈib tyam, niwaanë jeˈeyë. Ets oy ko niwaanë, mët ko wäˈäts diˈib tyunandëp ets kyaj oy nyatituungëty. Nˈokpëjtakëm tuˈugë ijxpajtën: okwinmay ko xykyojäˈänët tuˈugë mdëjk. ¿Mˈanuˈkxëp niˈamukë pojtspë? Pes kyaj. Jeˈeyë xyˈanuˈkxët ninääk xyajtunäˈäny. Nanduˈun jyaty mëdë Dios, kyaj niˈamukë pënaty mëduunëp dyajnëjkxäˈäny tsäjpotm parë yˈanaˈamët mëdë Kristë.
Tyäˈädë gobiernë diˈib tsäjpotm, yëˈë diˈib yaˈˈadëwaampy tijatyë Dios tyuknibëjtakë parë naxwinyëdë jäˈäy. Jesus mët 144,000, yˈanaˈamäˈändë tsäjpotm parë tyäˈädë Naxwinyëdë jyëmbitët extëm tuˈugë lugäärë tsujpë, mä jyukyˈatäˈändë jantsy nimayë Dios mëduumbë agujk jotkujk ets winë xëë winë tiempë (Isaías 45:18; Diˈibʉ Jatanʉp 21:3, 4). Ets nan jam jyukypyëkäˈändë oˈkpë diˈibë Dios yaˈijtypy wyinmäˈänyoty (Fwank 5:28, 29).
Niˈamukë pënatyë Jyobaa Dios myëduundëp duˈun diˈib tëëyëp ets diˈib tyam, tˈaxäjëyäˈändë ja tsujpë kumäˈäyën: ja jukyˈäjtënë winë xëë winë tiempë (Romanʉs 6:23). Jeˈeyë niwaanë diˈib nëjkxandëp tsäjpotm parë ttunäˈändë tuˈugë tuungë jëjpˈambë, per ja nimaybyë jyukyˈatäˈändë mä ja Naxwinyëdë jyëmbitäˈäny extëm tuˈugë tsujpë lugäär.