Të jyembyëtsemy Diˈib Xytyukˈawäˈänëm mä ingles diˈib kyaj tsyipëty

NDUKXONDAKTËBËTS ko mä tyäˈädë poˈo të pyëtsemy Diˈib Xytyukˈawäˈänëm mä ingles diˈib kyaj tsyipëty, naa tuk jëmëjtën duˈun yaˈijxmatsäˈäny ets tuˈugyë pyëtsëmäˈäny mët diˈib jaayëm pëtsëëmp. Yëˈëyë myëminaambyë artikulo diˈib yaˈëxpëkäämp, per näˈäty mbäät tmëminyë wiinkpë artikulo. Tyäˈädë rebistë pyudëkëyaampy mayë nmëguˈukˈäjtëm parë yajxon tjaygyukëdët ja Diosë yˈayuk. ¿Tiko?

Yëˈko mä paˈis extëm Fiyi, Ghana, Kenia, Liberia, Nigeria, Papúa Nueva Guinea etsë las islas Salomón, yëˈë niˈigyë jäˈäy kyäjpxtëbë ingles. Etsë nmëguˈukˈäjtëm oy mä tyëjk tkäjpxtë wiink ayuk, yëˈë yajtuundëbë ingles mä naymyujkën ets ko nyëjkxtë käjpxwäˈkxpë. Perë ingles diˈib kyäjpxtëp wingëjxy, kyaj dyuˈunëty diˈib myëmiimbyë ëxpëjkpajn. Ja tuk peky, mayë Dios mëduumbë tsyëënëdë wiink paˈis mä jeˈeyë yajkajpxyë ingles, ets kuanë ko tkäjpxtët oy yajxon tkajattë. Nan taaˈäjtp diˈib kyaj mbäät nyëjkxtë mä ja naymyujkënë diˈib tuunëp mä yˈayuk.

Extëm nnijäˈäjëm, Diˈib Xytyukˈawäˈänëm myëmiimbyë artikulo diˈib sëmään sëmään nˈëxpëjkëm, ets yëˈë diˈib jëjpˈam tuump parë nˈaxäjëm ja käˈäy ukën diˈibë Dios yajkypy mä meerë nyajtëgoyˈäjtëm. Pääty të pyëtsemy Diˈib Xytyukˈawäˈänëm mä wingëjxypyë ingles parë nmëguˈukˈäjtëm mëjwiin kajaa pyudëkëdët. Pes myëmiimbyë ayuk diˈib kyaj tsyipëty ets extëm myaytyaˈaky pojënë yajjaygyukë. Kyaj tuknax kyëxëˈëgäˈänyë nyiˈak, per tuknax tmëminäˈäny subtitulo, parrafo, yajtëˈëwën, rekuäädrë etsë dibujë. Duˈuntsoo mbäät dyajtundë ja rebistë diˈibë tsyojkënyëˈäjttëp. Pën mijts mgajpxypyë ingles, ¿mˈixaampy wiˈix tyëgatsyëty? Ta abatkëˈëy myiny tuˈugë ijxpajtën diˈib të yajjuuty mä tim jawyiimbë artikulo parrafo 2 diˈib yaˈëxpëkäämp mä tyäˈädë rebistë.

Tyäˈädë jembyë rebistë yëˈë yˈatsoojëmbitaampy extëm mayë nmëguˈukˈäjtëm tˈanëëmëdë Jyobaa: “Tukjaygyujkëts, parëts njat nnijawëdë mˈanaˈamën” (Sal. 119:73). Nˈawijxtëbëts etsë ënäˈktëjk o pënaty kyaj yajxon tkäjpxtë ingles, tjaygyukëdët wäˈäts ko tniˈëxpëkëdët semään sëmään diˈib yaˈëxpëkäämp mä naymyujkën. Nmooytyëbëtsë dyoskujuyëmë Jyobaa ko dyaˈixyëtyë tsyojkënë mä niˈamukë nmëguˈukˈäjtëm ets ko dyajtunyë tuumbë diˈib kuwijy parë dyaky jantsy kanäk pekyë ëxpëjkpajn (1 Ped. 2:17, Traducción del Nuevo Mundo; Mat. 24:45.)

Diˈib wyooyoˈoytyëbë Jyobaa tyestiigëty