¿Wiˈix mbäät yajtukˈixyˈattë Dios? ¿Ti mbäät pyudëkëdë?

“Jäjtäˈä tëgokyë mëdiˈibë yam të ndukˈëwäänën, ets xytyukniˈˈixëty xëmë ja mˈuˈunk mˈënäˈk, mdukmëmëtyäˈägëp oy jyapëty jëënjoty tëgoty, ëgë nëëˈam tuˈam, nenduˈun ko mäˈäjän mboˈkxänëty, ets ko mäˈäybyëdëˈëgëty.” (DEUTERONOMIO 6:6, 7, MɄGOXPɄ JA̱ NOKY MɄDIˈIBɄ JYAAYɄN MOISÉS)

MBÄÄT näˈätyë tääk teety tmëkjawëdë ko yëˈë tnikëjxmˈattë parë yˈuˈunk yˈënäˈk dyaˈëxpëktët. Ets ko net tjaˈëxtäˈäytyë naybyudëkë, ta kanäk peky tpäättë käjpxwijën ets axtë mbäädë net niˈigyë kyujoˈobëdë diˈib myëdoodëp o kyäjpxtëp. Mbäädë myëguˈuktëjk etsë myëtnaymyaayëbë yˈëwij kyäjpxwijëdë. Ets nan mbäät tpäättë mä liibrë, rebistë ets mä Internet, per näˈäty niˈigyë kyujoˈobëdë.

Perë Biiblyë kyaj jeˈeyë dyakyë käjpxwijën ti mbäädë uˈunk ënäˈk ndukniˈˈijxëm, nan nyigajpxypy wiˈix mbäät nduˈunëm. Extëmë tekstë të tnigajpxy anikëjxy, ja tääk teety tsojkëp tˈëxtäˈäytyët ja winmäˈäny parë yˈuˈunk yˈënäˈk xëmë ttukmëtmaytyäˈäktët mä pënën Dios. Mä tyäˈädë artikulo nˈixäˈänëm taxk peky diˈib nyigajpxypyë Biiblyë diˈib milˈamë tääk teety të pyudëkëdë.

1. Tukniˈˈixë kyojy pyëjtaˈagyë Dios. Apostëlë Pablo duˈun tkujäˈäyë: “Dios dyajkojy ja naxwinyëdë [...] tëgekyë tyäˈädë mbäät xytyukjaygyujkëm wiˈix yëˈë ja Diosˈäjtën, es ko Dios mbäät ttuny oytyiity winë xëë winë tiempë” (Romanʉs 1:20). Ja tääk teety mbäät tpudëkë yˈuˈunk yˈënäˈk parë ttukniˈˈixëdët ko jantsy tamë Dios, ko mëët tˈixtët tijatyë Dios të dyajkojy ets dyajwinmaytyët wiˈix dyajnigëxeˈegyë jyaˈayˈäjtën.

Jesus duˈun ojts ttukniˈˈixë yˈëxpëjkpëty. Yëˈë tˈanmääy: “Ixtë yëˈë joon jëyujkëty. Kyaj nyiˈiptë es ni kyatsiktë, es ni tkapëjkëˈëktë ja pyëjtaˈaky mä yëˈë mok tëjk. Pes yëˈë mDeetyë tsäjpotmëdë mooyëdëp yëˈë jyeˈxy pyeky. Dios mtsojkëdëp miitsëty niˈigyë këdiinëm ja joon jëyujkëty” (Matewʉ 6:26). Jesus tyukniˈˈijxë yˈëxpëjkpëty ja Jyobaa jyaˈayˈäjtën, tsojkën etsë paˈˈayoˈojën, nan ojts tpudëkë parë tjaygyukëdët wiˈixë Jyobaa dyaˈixyëtyë jyaˈayˈäjtën mä ja yˈuˈunk yˈënäˈk.

Rey Salomón nyimaytyak tuˈugë oybyë ijxpajtën mä wiˈixë Dios të tmoˈoyë wijyˈäjtënë jantyukts. Yëˈë tkujäˈäyë: “Nuux plojë, nëjkx mä ja jantyukts; ix ja nyëë tyuˈu ets mˈitët wijy. Oy tkamëdatyë wyintsën, yˈanaˈambë, ni yëˈë yajkutujkpë, nyipëjkpejtypyë jyeˈxy pyeky mä ambë poˈo; të dyajtuˈukmuky ja jyeˈxy pyeky mä ja pëjktaˈaky myuky” (Proverbios 6:6-8). Salomón tim wingëjxy ojts tnigajpxy ko jëjpˈam ndukniwinmäˈäyëm ti ndunäˈänëm ets nduˈunëmë mëjää parë duˈun nduˈunëm.

Uˈunktääk uˈunkteety, ¿wiˈix mbäät xypyanëjkxëdë yˈijxpajtënë Jesus ets ja rey Salomón ko ja mˈuˈunk mˈënäˈk xyaˈëxpëktët? Tuk peky, yajtëwdë diˈibë jëyujk animal o ääy ujts mas yˈoyˈijxtëp. Myëmajtsk, ëxtäˈäy mä yajnimaytyaˈagyë diˈibë nety të tˈoyˈixtë. Ets myëdëgëëk, ti diˈib tukniˈˈijxëdëp mä Dios.

2. Niˈˈijxtuˈuttë Jesusë jyaˈayˈäjtën mä wiˈixë jäˈäy dyaˈëxpejky. Nuˈun kujkë jäˈäy jyukyˈattë, nipënnëm duˈun tijaty tkamaytyaˈaky extëmë Jesus. Yëˈë kajaa tiempë dyajtuuny mä jäˈäy tijaty dyajtëy, pes jyantsy nyijawëyaambyë nety wiˈix wyinmaytyë ets wiˈix nyayjawëdë (Matewʉ 17:24, 25; Markʉs 8:27-29). Nanduˈun tyamë tääk teety kajaa tijaty tnijawëdë parë ttukniˈˈixëdët ja yˈuˈunk yˈënäˈk, ets parë net yˈoybyëtsëmët, tsojkëp tpanëjkxtëdë Jesusë yˈijxpajtën ets tpudëkëdët ja yˈuˈunk yˈënäˈk parë tnigäjpxtët wiˈix wyinmaytyë.

Per, ¿ets pën ja uˈunk ënäˈk naa kujuundaktëp o naa tsiptakxëdëp tjaygyukëdët diˈib të yajtukniˈˈixëdë? Okˈix wiˈixë Jesus ttukniˈˈijxë yˈëxpëjkpëty. Näˈäty ojts nyaygyajpxytsyiigëdë ets kyaj tjaygyujkëdë tidën ko yˈittët tudaˈaky. Perë Jesus xëmë myëmaˈkxtujkëdë, janääm jatsojk ojts tˈanëëmëdë parë yˈittët tudaˈaky (Markʉs 9:33, 34; Lukʉs 9:46-48; 22:24, 25). Ko uˈunktääk uˈunkteety tpanëjkxtë Jesusë yˈijxpajtën, ta maˈkxtujkëny myëët tjëjwijtsëmbittë yˈuˈunk yˈënäˈk ets pën kyaj tjaygyukëdë, ta jatëgok ttukniˈˈixëdë axtë koonëm ttukjaygyukëdë diˈib jëjpˈam.

3. Tukniˈˈixëdë mëdë ijxpajtën. Oy ko uˈunktääk uˈunkteety tmëjpëjtäˈäktët diˈibë apostëlë Pablo tyuknijäˈäyë ja myëguˈuktëjk diˈib Roma: “Mij myaˈëxpejkypy ja wiinkpëty, ¿tiko mganayaˈëxpekyëty mij këˈëm? Mij mjënäämp ko kyaj nmaˈtsëm, ¿es mmaˈtsp mij?” (Romanʉs 2:21).

Jëjpˈam etsë tääk teety tjaygyukëdë tyäˈädë käjpxwijën, ko uˈunk ënäˈk yëˈë tyuundëp diˈib yˈijxtëp ets kyaj diˈib myëdoodëp. Ko tääk teety dyaktë ijxpajtën, ta ja uˈunk ënäˈk myëdowdë.

4. Tukniˈˈixëdë mä myutskˈattënëm. Timoteo, diˈib mëdë apostëlë Pablo jyëdijty, jantsy oy nyimaytyakëdë pënaty ixyˈäjtëdë (Apostʉlʉty 16:1, 2). Tuk peky diˈib pudëjkë, yëˈko tim mutsknëm ojts tnijawë “ja Diosë jyaaybyajtën”. Ja tyääk mëdë nyanwelë pudëjkë yajxon parë tjaygyukët ja Diosë jyaaybyajtën, kyaj jeˈeyë ojts tyukwingugäjpxëdë (2 Timotee 1:5; 3:14, 15).

¿Mä yajpäätyë naybyudëkë?

Jyobaa tyestiigëty të kanääk dyajpëtsëmdë ëxpëjkpajn diˈib të yajtuknigojë parë uˈunk ënäˈk yajtukniˈˈixët ja tëyˈäjtën mä pënën Dios. Nääk yëˈë të yajtuknigojë ja ënäˈkuˈunk, ets tap diˈib mbäät pyudëkëdë ja tääk teety parë kyäjpx myaytyäˈäktët mëdë yˈuˈunk yˈënäˈk diˈib yaˈkpëtsëëmnëm.a

Pääty, parë uˈunk ënäˈk yajtukmëtmaytyäˈägët pënën Dios, tsojkëp yajnijawët wiˈix mbäät yaˈˈatsoojëmbity ko dyajtëwëdë tsipatypyë. Extëm nˈokpëjtakëm, ¿wiˈix xyˈatsoojëmbitët ko myajtëwëdët tiko Dios tnasˈixë ayoˈon, wiˈix dyaˈitäˈänyë Naxwinyëdë o mä yajpäättë oˈkpë? Yëˈë Jyobaa tyestiigëty mbäät mbudëkëdë parë tˈatsoojëmbitëdë tyäˈädë yajtëˈëwën ets wiinkpë, ets parë xymyëwingonëdë Dios mëdë mfamilyë (Santya̱ˈa̱gʉ 4:8).

[Notë diˈib noky ëxˈääy]