¿Waˈan të myajwinˈëëny?

NITII mëk kyayajawë extëm ko xywyinˈëˈënëm tuˈugë jäˈäy diˈibë nety ndukjotkujkˈäjtëm. Mbäät njotˈambëjkëm, njäˈäwëm ko nitii ngatsooˈäjtëm o ko të nyajtukxikëm. Anëë yajjëjpkejxypyë naymyayë, yajnaymyastutëbë kasäädë jäˈäy ets yajpëjkëbë jäˈäy miyonkˈamë myeeny syentääbë.

Ko xynyijawët ko kyaj tyëyˈäjtënëty extëm të myajtukniˈˈixë mä pënën Dios, ¿wiˈix mnayjawëdët? Pën mtsejpyë Dios, mbäät jantsy axëëk mnayjawëty extëmë tyäˈädë jäˈäyëty:

● “Jantsy axëëgëts xyajnayjäˈäwë ja nrelijyonk.” (DEANNE.)

● “Jantsy jotˈambëjkëts kojëts nnijäˈäjë të nyajwinˈëëny ets ko kyaj nety nyekytsyobääty tijatyëts nduknibëjtakëp ets nˈawijxy njëjpˈijxypyëts.” (LUIS.)

Waˈan kyaj mdimwinmay ko tijaty mnijäˈäp mä Dios kyaj tyëyˈäjtënëty. Pes waˈan ja jäˈäy diˈib ojts mdukniˈˈixëty, yëˈë diˈib mdukjotkukˈäjtypy ets diˈib ninäˈä tkatseky axëëk mnayjawëdët, extëmë mdääk mdeety, tuˈugë saserdotë, pastoor o tuˈugë mëtnaymyaayëbë. Mbäät jantsy jeky kujk xymyëbeky diˈib myajtukniˈˈijxë. Per ¿këdii mbäät kyaj tyëyˈäjtënëty axtë diˈib mayë jäˈäy myëbëjktëp? Extëm jyënany diˈib tuun presidentë Estados Unidos Franklin D. Roosevelt, “tuˈugë anëë kyaj jyëmbity tëyˈäjtën oy janääm jatsojk jyayajnigajpxy”.

¿Wiˈix mbäät nnijäˈäjëm pën të nyajwinˈëˈënëm o kyaj? Jesus duˈun tëgok tˈanmääyë Dios: “Jaˈa mˈayuuk ja jaˈa tëyˈäjtëny” (Juan 17:17, Nuevo Testamento de Mazatlán). Ets duˈunë duˈun, mä Diosë yˈAyuk jap yajpääty diˈib xytyuknijäˈäjëm ti tëyˈäjtën ets ti kyaj.

Pääty oy ko xynyijawët wiˈixë Biiblyë dyajnidëˈkxy mëgoxk peky mä Dios yajniwäämbety. Ets mbëkaambyë kuentë ko ja tëyˈäjtën mbäät dyajtëgatsyë mjukyˈäjtën.