Espiritë santë winmäˈänymyooyëdë
“Mët ko kyaj ja Diosë kyugäjxpëty tyukjäjtëdë tii jäˈäy wyinmäˈänygyëjxm, ja Espiritë Santë winmäˈänymyooyëdë.” (2 PEED. 1:21)
PARË NBAWINMÄˈÄYËM
¿Wiˈixë Dios dyajtuunyë myëjää parë ttuknijäˈäwë ja yetyëjkëty tijaty kyujayëdëp mä Biiblyë?
¿Tiko mbäät nmëbëjkëm ko Biiblyë yëˈë Dios yˈAyuk?
¿Ti mbäät xytyuny jabom jabom parë xëmë xytsyojkënyëˈatëdë Dios yˈAyuk?
1. ¿Tiko nyajtëgoyˈäjtëmë Diosë yˈAyuk?
¿MÄ TË ntsoˈonëm? ¿Tiko yä nyajpatëm? ¿Mä nëjkxëm? ¿Tiko tyam duˈunë jukyˈäjtënë yˈixëty? ¿Wiˈix njäjtëm ko nˈoˈkëm? Duˈun mayë jäˈäy nyayajtëwëdë abëtsemy nyaxwinyëdë. Koxyëbë Diosë yˈAyuk kyajaaty, kyajxyëp mbäät nˈatsoˈojëmbijtëmë tyäˈädë yajtëˈëwën etsë wiinkpë. Koxyëp kyaj Biiblyë, yëˈëyëxyëp nnaytyuktuˈumoˈoyëm tijaty nnijäˈäwëm. Ets koxyëp dyuˈunëty, ¿wiˈixxyëp mbäät njäˈäwëmë “Jyobaa lyey” extëm diˈib jyaayë Salmo? (Käjpxë Salmo 19:7.)a
2. ¿Ti xypyudëkëyäˈänëm parë xëmë nmëjjäˈäwëmë Biiblyë ets nˈijxëm extëm tuˈugë regalë diˈibë Dios të xymyoˈoyëm?
2 Per ta nääk diˈib të dyajxaamdë tsyojkënë mä ja tëyˈäjtënë diˈibë Biiblyë myëmiimpy (ixë Diˈibʉ Jatanʉp 2:4). Ets kyaj duˈun nyekyjukyˈattë extëmë Jyobaa ttukjotkëdaˈaky (Isa. 30:21). Per ëtsäjtëm kyaj tiko nanduˈun njäjtëm. Mbäät nduˈunëmë mëjää ets duˈunyëm nmëdäjtëm ja tsojkën mä Diosë jyaaybyajtën ets tijaty tukniˈˈijxëp, pesë Biiblyë yëˈë diˈibë Jyobaa të xynyamoˈoyëm (Sant. 1:17). ¿Ti xypyudëkëyäˈänëm parë niˈigyë nmëjjäˈäwëmë “Dios ja yˈayuk”? Tuk peky, yëˈë ko nwinmäˈäyëm wiˈix ja yetyëjkëty yajwinmäˈänymyooytyë ko tjääytyë Biiblyë, ets nanduˈun ko nˈijxëm tuk peky majtsk peky tiko mbäät nmëbëjkëm ko Biiblyë yëˈë Diosë yˈAyuk. Tyäˈädë yëˈë xypyudëkëyäˈänëm parë xëmë ngäjpxëmë Biiblyë ets nbaduˈunëmë kyäjpxwijën (Ebre. 4:12).
¿WIˈIXË ESPIRITË SANTË WYINMÄˈÄNYMYOOYËDË?
3. ¿Wiˈix ja kugajpxyëty ets pënaty jyaaytyë Biiblyë wyinmäˈänymyooyëdë espiritë santë?
3 Ja naa 40 yetyëjk tjääytyë Biiblyë ets ja jyejky 1,610 jëmëjt parë yajjääytyaay. Ja yajjääytsyondaky 1513 mä kyajnëm myinyë Jesus ets yajjääytyaay mä jëmëjt 98 mä Jesus të myiny. Tam diˈib jyaaytyë Biiblyë diˈib tuundë kugajpxy ets yëˈë “Espiritë Santë winmäˈänymyooyëdë” (käjpxë 2 Peedrʉ 1:20, 21). Diˈib mä ayuk Biiblyë të yajkäjpxnaxy “winmäˈänymyooyëdë”, mä ayuk grieegë yëˈë yˈandijpy ko “yajmënëjkxy xitsoo yatsoo” ets nan mbäät yajkäjpxnaxy ko ti “yajmënëjkxy” o “yajtuktuny”.b Mä Apostʉlʉty 27:15 jap tmaytyaˈaky tuˈugë barkë diˈibë poj mënëjkxëp mä tyimmënëjkxäˈänyëty. Duˈun ja kugajpxyëty ets duˈun ja yetyëjkëty diˈib jyaaytyë Biiblyë, yëˈë “Espiritë Santë winmäˈänymyooyëdë”, jaˈa njënäˈänëm, ko Dios tuknijäˈäwëdë, yajtuunëdë ets tuˈumooyëdë mët yëˈëgyëjxmë myëjää. Pääty, kyaj tkujäˈäyëdë kyëˈëm winmäˈäny, yëˈë duˈun ja Diosë wyinmäˈäny. Näˈäty, kyaj tnijäˈäwëdë wiˈix nyikejy diˈib nyaskäjpxëdë o diˈib kyujäˈäyëdë (Dan. 12:8, 9). Pääty nˈijtëm seguurë ko Dios yëˈë “wyinmäˈänymyooy ja jyaˈayëty es tkëxjäˈäyët tëgekyë ja Diosë jyaaybyajtën” ets kyaj yajkujäˈäyë naxwinyëdë jäˈäyë wyinmäˈäny (2 Tim. 3:16).
4-6. ¿Wiˈixë Jyobaa dyajnäjxyë yˈayuk mä pënaty jyaaytyë Biiblyë? Pëjtäˈäk tuˈugë ijxpajtën.
4 ¿Wiˈix wyinmäˈänymyooyëdë Diosë myëjää pënaty jyaaytyë Biiblyë? ¿Tuk ayukaty ojts yajnaskäjpxë ti kyëxjäˈäytyëp o jeˈeyë yajwinmäˈänymyooytyë parë twääptët këˈëm ja ää ayuk? Parë njaygyujkëm, nˈokpëjtakëm tuˈugë ijxpajtën: Tuˈugë wintsën dyajkojy tuˈugë neky. Këˈëm tjäˈäy ko ttseky nyëjkxëdë ää ayuk diˈib mas jëjpˈam, o tˈanëëmë ja syekretaaryë diˈibë ayuk tsyejpy yajkujayët, ets ok, ta tfirmaraty. Per näˈäty jeˈeyë ttukmëtmaytyaky ja syekretaaryë ti tsyejpy yajkujayët, ta ja sekretaaryë këˈëm tmaˈkxy ja ää ayuk. Ok, ta ttukˈixy ja wyintsën parë yˈanëˈëmxëdët mäjaty ttseky yajwijtsˈoyët. Ja wintsën ta tfirmaraty ets nyaxy extëmxyëp yëˈë të tjäˈäy.
5 Mä Biiblyë tap myiny diˈibë Dios mëdë “kyëˈë ojts tjäˈäy” (Éxo. 31:18). Ets näˈäty këˈëmë Jyobaa ojts tnaskäjpxë diˈibë ayuk tunëp. Extëm nˈokpëjtakëm, mä Éxodo 34:27, jyënaˈany: “Jyobaa tˈanmääyë Moisés: Këxjäˈäyë tyäˈädë ayuk, mët ko duˈun extëmë tyäˈädë ayuk duˈunëts ëjts ngajpxyˈaty mët mijts ets mëdë Israel”. Dios nanduˈun tˈanmääy ja kugajpxy Jeremías: “Këxjäˈäy parë mijts mä tuˈugë liibrë, tukëˈëyë ää ayuk diˈibëts mijts ndukˈawanëyaampy” (Jer. 30:2).
6 Per kajaabë diˈib yajkujäˈäyë mä Biiblyë, yëˈë ja winmäˈäny diˈib mëjˈäjtëngyëjxm tukmiinëdë parë këˈëm twääptët ja ää ayuk, kyaj tyim yajpëjtaky mä wyinmäˈäny ets mä kyorasoon diˈibë ayuk kyëxjäˈäytyëp. Duˈuntsoo yajnasˈijxëdë parë këˈëm twinˈixtëdë ää ayuk diˈib kyëxjäˈäytyëp. Mä Eclesiastés 12:10 jyënaˈany: “Ja yajtuˈukmujkpë ojts tˈëxtäˈäyë tsujpë ää ayuk ets wiˈix tjäˈäyët tëyˈäjtën mëët ja ää ayuk”. Lucas nan ojts tnigajpxy ti tyuun ko ojts tjäˈäyë lyiibrë, jyënaˈany: “Es ëj nandëˈën, nbayoˈoyëts yajxon tëgekyë axtë mä tsyondaky, es [...] extëm tyimjäjtë niduˈuk niduˈuk” (Luk. 1:3). Diosë myëjää yëˈë jyëjpkuwäˈkë parë kyaj myäˈädëdë Diosë yˈayuk, oyë naxwinyëdë jäˈäy tjääytyë diˈib pokyjyaˈay.
7. ¿Tiko yˈoyëty ko Dios dyajtuunyë naxwinyëdë jäˈäy parë tjääytyë Biiblyë?
7 Ko Dios dyajtuunyë naxwinyëdë jäˈäy parë tjääytyë Biiblyë, yëˈë yajnigëxeˈkypy ko mëjwiin kajaa tmëdatyë wijyˈäjtën. Pes kyaj jeˈeyë ja ää ayuk tkujäˈäyëdë, nanduˈunën tjääybyajttë wiˈix nyayjawëdë naxwinyëdë jäˈäy. Nˈokwinmäˈäyëm koxyëbë Jyobaa dyajtuunyë anklës parë tjäˈäytyëdë Biiblyë, ¿wiˈixxyëp tkujäˈäyëdë extëmë naxwinyëdë jäˈäy nyayjawëdë ko tsyëˈëgëdë, ko myay tyäjtë o mä wiˈix nyayjawëdë ko kyaˈoyë ti jyatunandëp? Per ko Dios tnasˈijxë ets ja yetyëjkëty diˈib pokyjyaˈay twääptët ja ayuk diˈibë espiritë santë tuknijäˈäwëdë, ta xyjotjäjtëmë Diosë yˈayuk.
NˈOKˈIJXËM KANÄK PEKY TIKO MBÄÄT NMËBËJKËM
8. ¿Tiko mbäät njënäˈänëm ko nituˈugë liibrë diˈib myëdäjttëbë relijyonk kyaduˈunëty extëmë Biiblyë?
8 Ta kanäk peky tiko mbäät nmëbëjkëm ko Biiblyë yëˈë Dios yˈAyuk. Tuk peky, yëˈë ko ni diˈibë liibrë duˈun tkanimaytyaˈagyë Dios extëmë Biiblyë. Extëm nˈokpëjtakëm, liibrë diˈib yˈëxpëjktëbë hindú, yëˈë myaytyakypy wiˈix tijaty ttundë mä ryelijyonk, tijaty myëbëjktëp, tijaty nyimaytyaktëp ets wiˈix mbäät jyukyˈattë. Liibrë diˈib yˈëxpëjktëbë budista, yëˈë nyimaytyakypy wiˈix mbäät jyukyˈattë yetyëjk etsë toxytyëjk diˈib tuundëp mä tsyäjptëjk. Nan nyimaytyakypy tijaty myëbëjktëp ets tijaty tukniˈˈijxëbë Buda. Perë Buda kyaj jyënany ko yëˈë diosëty, ets nan wanaty tmaytyakyë Dios. Nanduˈunë lyiibrë pënaty pyanëjkxtëbë Confucio, yëˈë nyimaytyakypy tijaty tëëyëp tuun jäjtë, wiˈix mbäät jyukyˈattë, magia etsë ëy yaˈaxy. Etsë lyiibrë Islam tyukniˈˈixë ko jeˈeyë tuˈugë Dios ets ko nyijäˈäp tijaty miin këdakp ets ko yëˈë tijaty yajtuun yajjäjtëp, per ni jeˈeyë tkamaytyaˈaky ko txëˈaty Jyobaa, diˈib mä Biiblyë miimp kanäk milˈok.
9, 10. ¿Tijatyë Biiblyë xytyukniˈˈijxëm mä Dios?
9 Mayë liibrë diˈib myëdäjttëbë relijyonk wanaty tmaytyaˈagyë Dios o nääk kyaj ttimmaytyaˈaky. Perë Biiblyë xytyukˈixyˈäjtëmë Jyobaa ets xytyuknijäˈäwëm tijaty tyuumpy. Nan xytyuknijäˈäwëm wiˈix jyaˈayˈaty, nyigajpxypy ko yëˈë tuˈugë Dios diˈib tyuumbyë tëyˈäjtën, diˈib myëdäjtypyë wijyˈäjtën etsë mëjää, ets ko xytsyojkëm nanduˈun (käjpxë Fwank 3:16 etsë 1 Fwank 4:19). Nan xyˈanmäˈäyëm ko “Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty diˈibë wintsëˈkëdëp es tmëduny” (Apos. 10:34, 35). Ko Biiblyë të yajkäjpxnaxy kanäk ayuk, yëˈë xytyukˈijxëm ko Dios kyaj ttsekyë jäˈäy winˈixy wingexy. Pënaty yˈëxpëjkpëtsëëmdëbë ayuk, jyënäˈändë ko tyam jaa yajkajpxy 6,700 ayuk. Per naa 100 tyäˈädë ayuk, ja 90% jäˈäy tkajpxy. Etsë Biiblyë ja të yajkäjpxnaxy 2,400 ayuk naxy, ta diˈib kaˈpxy ets diˈib jeˈeyë tukpeky. Pääty, mbäät njënäˈänëm ko abëtsemy nyaxwinyëdë, mbäät niˈamukë jäˈäy tkäjpxtë oy jeˈeyë tuk pekyë Biiblyë mä kyëˈëm ayuk.
10 Jesus jyënany: “Yëˈë nDeetyëts tuumpnëm tyambäät, es ëj nandëˈën tuumbëts” (Fwank 5:17). Jyobaa nan ijtp “winë xëë winë tiempë axtë winë xëë winë tiempë”. Pääty, ¡okwinmay tijaty yëˈë të ttuny! (Sal. 90:2.) Per yëˈëyë Biiblyë diˈib nyimaytyakypy tijatyë Jyobaa tyuumpy, duˈun diˈib tëëyëp, diˈib tyam ets diˈib miin këdakp. Nan xytyukniˈˈijxëm tijaty yˈoyˈijxypy ets tijaty kyaj ets xyˈanmäˈäyëm wiˈix mbäät nmëwingoˈonëm (Sant. 4:8). Pääty, nˈoknaygyuentˈäjtëm parë nitii xykyatukmëjagamgakëmë Dios.
11. ¿Tijaty käjpxwijën yajpatp mä Biiblyë diˈib mëjwiin kajaa yˈoyëty?
11 Ja tuk peky diˈib xytyukˈijxëm ko Biiblyë yëˈë Diosë yˈAyuk, yëˈë ko jantsy oyë kyäjpxwijën. Apostëlë Pablo ojts tkujayë: “¿Pën të tˈokwinmäˈänyˈijxpë ja Nintsënˈäjtëm? ¿Pën mbäät dyaˈëxpeky ja Nintsënˈäjtëm Dios?” (1 Kor. 2:16). Tyäˈädë bersikulo yëˈë tyukwäˈkpejtypy extëmë Isaías dyajtëëy ja myëgugäjpn: “¿Pën të tpëjkwëˈëmë Jyobaa myëjää, ets pën yetyëjk diˈib käjpxwijp mbäät ti tyuknijawëty?” (Isa. 40:13). Nipën. Pääty, jantsy oy wyimbëtsemy ko nbaduˈunëmë Biiblyë kyäjpxwijën extëm diˈib yajkypy mä pëjk ukën, mä uˈunk ënäˈk, ixy jawë, mëtnaymyaayëbë, nˈijtëm tuumbë jäˈäy, njukyˈäjtëm wäˈäts ets kyaj nˈandakëm. Biiblyë kyaj dyakyë axëëkpë käjpxwijën. Kyaj dyuˈunëty extëmë naxwinyëdë jäˈäy diˈib kyaj yˈoybyëtsemy extëm dyakyë käjpxwijën (Jer. 10:23). Janäämëty dyajtëgatstë kyäjpxwijën ko tpëktë kuentë ko kyajtëm yˈoyëty. Päätyë Biiblyë jyënaˈany: “Naxwinyëdë jäˈäy duˈunë wyinmäˈäny extëm jeˈeyë tëgok nmëkxajëm” (Sal. 94:11).
12. ¿Ti jäˈäy të tjatundë kanäk siiglë parë Biiblyë jyëjptëgoyët?
12 Nuˈun kujkë xëë tiempë nyaxy, të jäˈäy tjayajëjptëgoyäˈändë Biiblyë, per kyaj të tmëmadäˈäktë. Tyäˈädë yëˈë ja tuk peky xytyukˈijxëm ko yëˈë Dios jyaˈäjtypy. Mä jëmëjt 168 mä kyajnëm myinyë Jesus, ja rey diˈib Siria Antíoco 4 ojts tniˈanaˈamë parë myujktäˈäyëdë Diosë jyaaybyajtën ets yajnoˈktäˈäyët. Ets mä jëmëjt 303 mä Jesus të myiny, netë Diocleciano diˈib yajkutujkp Roma ojts tniˈanaˈamë ets yajjijtäˈäyët mäjaty nyaymyukëdë pënaty pyanëjkxtëbë Kristë ets yajnoˈktäˈäyëdë Diosë jyaaybyajtën, mäjk jëmëjt duˈun tpajëdijttë. Etsë teety wyintsënëty, kanäk siiglë të tjëjpkuwäˈägëdë parë kyaj yajkäjpxnaxëdë Biiblyë kanäk ayuk diˈibë jäˈäy kyäjpxtëp, pes kyaj ttsoktë etsë jäˈäy tnijawëdët tijaty miimp mä Biiblyë. Per oyë Satanás mëdë jyaˈay të tjayajëjptëgoyäˈändë Biiblyë, kyaj tmëmadäˈäktë axtë tyambäät. Jyobaa kyaj të tnasˈixë parë Biiblyë kyutëgoyët diˈibë naxwinyëdë jäˈäy të tnamoˈoy.
¿TIKO MAYË JÄˈÄY TË TMËBËKTË BIIBLYË?
13. ¿Tijaty xytyukˈijxëm ko Biiblyë yëˈë Dios jyantsy yajjääyë?
13 Ta kanäk peky tiko mbäät nmëbëjkëm ko Biiblyë yëˈë Dios yajjääyë: tuˈugyëp tijaty myaytyakypy, tëyˈäjtën tmaytyaˈaky tijatyë ëxpekyjyaˈay yˈëxpëjkpëtsëëmdëp, adëëp tijaty nyaskäjpxë, ets pënaty jyaaytyë nitii ojts tkakuyuˈutstë, nan myëdäjtypyë mëkˈäjtën parë dyajtëgatsëdë jukyˈäjtën, tëyˈäjtën tmaytyaˈaky tijaty tuun jäjtë ets yˈatsoojëmbijtypyë yajtëˈëwën extëm diˈib miimp mä parrafo 1. Nˈokˈijxëm kanäk peky tiko näägë jäˈäy të tmëbëktë ko Biiblyë yëˈë Diosë jyaˈa.
14-16. 1) ¿Tiko tmëbejky ko Biiblyë yëˈë Dios yˈAyuk tuˈugë musulmán, tuˈugë hindú ets tuˈuk diˈib kyaj tmëbekyë Dios? 2) Mä mgäjpxwaˈkxy, ¿tijaty mdukˈixaambyë jäˈäy parë tmëbëkët ko Biiblyë yëˈë Diosë yˈAyuk?
14 Anwarc yeˈky pyejty extëmë musulmán mä tuˈugë paˈis diˈib yajpatp Oriente Medio. Myentrësë nety tsyëënë Norteamérica, ta Jyobaa tyestiigëty ojts myëtmaytyaˈagyëty. Yëˈë jyënaˈany: “Kyajtsë nety ntsojkënyëˈatyë relijyonk diˈib kristianë, mët ko tëëyëp jantsy axëëk yˈadëtstë. Per kom njantsy pyayoˈoyaambyëts tijaty, tajëts ngupejky nˈëxpëkëdë Biiblyë”. Ko waanë ijty, ta Anwar ojts jyëmbity mä ja pyaˈis ets kyaj nyekynyaybyatë mëdë Testiigëty. Ok, ta ojts nyijkxy tsënaabyë Europa, ets jap jatëgok tyëjkë ëxpëjkpë. Anwar ta ok jyënany: “Diˈib yajnigëxeˈkypy ko Biiblyë yëˈë Diosë yˈAyuk, yëˈë ko yˈadëëdäˈäy tijaty ojts tnaskäjpxë, ko tuˈugyë myaytyaˈaky, ko ninäˈä kyanaywyinguwopëty tijaty myaytyakypy ets ko dyaˈixëdë tsojkën pënaty myëduundëbë Jyobaa”. Anwar ja nyëbejty mä jëmëjt 1998.
15 Asha diˈib 16 jyëmëjt, të yeeky mä tuˈugë familyë diˈib hindú. Yëˈë jyënaˈany: “Jaayëts ijty nnuˈkxtaˈaky kojëts nëjkxy mä templë o kojëts nmëdatyë amay jotmay, per kyajtsë Dios njamyetsy kojëts oy nyaˈixy nyajpääty. Per ko myiindë Jyobaa tyestiigëty mäjëtsë ndëjk, tajëtsë njukyˈäjtën mëjwiin kajaa tyëgäjtsy”. Ko Asha tˈëxpëjktsondakyë Biiblyë, ta nyaymyaaybyëjkë mëdë Jyobaa. ¿Tiko tmëbejky ko Biiblyë yëˈë Dios yajjääyë? Yëˈë jyënaˈany: “Mä Biiblyë yaˈˈatsoojëmbijty tijatyëtsë nety të nnayajtëyëty, ets ojtsëts xytyukniˈˈixë nmëbëkëdëtsë Dios oyëts ngaˈixy, ets oyëts nganëjkxët mä tuˈugë templë ets nwingoxtanëdëtsë awinax”.
16 Paula katolikë yeˈky pyejty, per ko ojts yaˈkˈabajnë, ta kyaj tnekymyëbejky pën jamë Dios. Ta tnimaytyaˈaky ti tuun jäjtë: “Tamë nety kanäk poˈo nyëjkxnë mäjëts kyaj nekyˈixy tuˈugë nmëtnaymyaayëbë kojëts mëët naybyatë. Mä tyäˈädë tiempë mayë netyë jäˈäy diˈib jantsy yenyë kuwääy tmëdattë ets dyajtundë droogë, ets yëˈë duˈunë nety. Per kojëts mëët nnaybyatë të nety tyëgatsy, të yajkeepy yajpeky ets jantsy jotkujk kyëxeˈeky, tajëts nyajtëëy: ¿Ti të mjatyëty? ¿Mä ojts të mˈity? Tajëts xyˈanmääy ko të nety tˈëxpekyë Biiblyë mëdë Jyobaa tyestiigëty ets tajëts xymyëtmaytyaky”. Ko Paula tˈijxy wiˈixë Biiblyë tmëdatyë mëkˈäjtënë parë dyajtëgatsyë jäˈäy, ta tˈoymyëdooy ets tmëbejky ko yëˈë Diosë yˈAyuk.
“MˈAYUK YËˈË TUˈUGË LAMPRË PARËTSË NDEKY”
17. ¿Wiˈix xytyukˈoyˈatët ko jabom jabom xykyäjpxëdë Diosë yˈAyuk ets ko xypyawinmayët wiˈix jyënaˈany?
17 Biiblyë yëˈë të xynyamoˈoyëmë Jyobaa, diˈib yajjääy mët yëˈëgyëjxmë myëjää. Pääty, tukxondäˈäk ets xykyäjpxët jabom jabom, duˈuntsoo xyajmëjwiinëdë mtsojkënë mä Biiblyë ets mä Jyobaa diˈib yajjääyë (Sal. 1:1, 2). Koogoo xykyäjpxëdë Biiblyë jawyiin mnuˈkxtäˈägët ets xyˈamdowëdë Diosë myëjää parë xyjaygyukët diˈib mgäjpxaampy (Luk. 11:13). Biiblyë yëˈë myëmiimbyë Diosë wyinmäˈäny, pääty ko nbawinmäˈäyëm wiˈix jyënaˈany, ta nanduˈun nwinmäˈäyëm extëm yëˈë wyinmay.
18. ¿Tiko niˈigyë xynyijawëyaˈany ja tëyˈäjtënë diˈib mä Biiblyë?
18 Ko mas niˈigyë xynyijawëdë tëyˈäjtën diˈib yajpatp mä Biiblyë, ta xyajtunët mä mjukyˈäjtën (käjpxë Salmo 119:105).d Duˈun xyajtunëdë Biiblyë extëm tuˈugë ijxn mä mnayˈixyëty, pën mˈijxypy ko tsojkëp xyajtëgatsëdë mjukyˈäjtën, ta xyajtëgatsët (Sant. 1:23-25). Yajtunë Diosë yˈAyuk extëm tuˈugë espäädë parë yajxon xynyitsiptunët tijaty mmëbejkypy ets xyajjëgaˈagët mä jäˈäyë kyorasoon ja tukniˈˈijxënë diˈib kyaj tyëyˈäjtënëty (Éfe. 6:17). Ko duˈun xytyunët, ta xymyëjjawët ko espiritë santë “winmäˈänymyooyëdë”, duˈun ja kugajpxyëty ets duˈun ja yetyëjkëty diˈib jyaaytyë Biiblyë.
[Notë diˈib noky ëxˈääy]
a Salmo 19:7: “Jyobaa lyey wäˈäts yëˈë, yajjëmbijtypyë jukyˈäjtën. Diˈibë Jyobaa xytyukjamyajtsëm mbäät yajmëbeky, yajwijpy ja diˈib kyaj ti tnijawë”.
b Diccionario del griego bíblico, de Amador Ángel García Santos, etsë Biblia Comentada, de los profesores de Salamanca.
c Të xyëë tyëgatstë.
d Salmo 119:105: “Mˈayuk yëˈë tuˈugë lamprë parëtsë ndeky ets tuˈugë tëˈkx jäjën parëtsë nëˈë nduˈu”.
[Letrë diˈib miimp mä pajina 32]
Käjpxë Biiblyë jabom jabom ets xyajmëjwiinëdë mtsojkënë mä Jyobaa diˈib yajjääyë
[Letrë diˈib miimp mä dibujë mä pajina 29]
Yëˈë jyaˈa ja neky diˈib fyirmaräjtypy