Nijawë Diosë yˈAyuk

¿Ti tukmiin tukëdakëbë relijyonk?

Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. ¿Ak oyëdaa relijyonk?

Mä tukëˈëyë relijyonk tapë jäˈäy diˈib oyjyaˈay ets tyunaampy ti Dios tsyejpy. Dios yajtsobatypyë duˈumbë jäˈäy ets naytyukjotmaytyuunëp. Per jotmaymyëët njënäˈänëm, ko të näägë jäˈäy ttundë axëkˈäjtënë xyëëgyëjxmë Dios. Extëm tëëyëp, pënaty nyiwintsënˈäjttë relijyonk tyëytyuundë jäˈäy diˈib kyaj ttunandë ti yëˈëjëty tsyojktëp (2 Korintʉ 4:3, 4; 11:13-15). Ets tyam yajmëdoop mä notisyë ko näägë wintsëndëjk diˈib mä relijyonk tyuktëjkëdëp tijatyë terroristë tyuundëp, tyuktëjkëdëbë tsip ets axtë yˈaguanëˈäjttëbë ënäˈkuˈunk. (Käjpxë Matewʉ 24:3-5, 11, 12.)

Biiblyë jyënaˈany ko jeˈeyë jyaˈˈaty tuˈugë relijyonk diˈib tëyˈäjtën, ets tukëˈëyë diˈib kyaj tyëyˈäjtënëty, kyaj tnimaytyäˈäktë Jyobaa Dios tëyˈäjtën myëët. Perë Jyobaa tsyejpy etsë jäˈäy tnijawëdët ja tëyˈäjtën. (Käjpxë 1 Timotee 2:3-5.)

2. ¿Ti tukmiin tukëdakëbë relijyonk diˈib kyaj tyëyˈäjtënëty?

Dios kyaj ttukjotkëdaˈagyë relijyonk diˈib jënandëp ko tsyojktëbë Dios, per kyaj tnimaytyäˈäktë tëyˈäjtën myëët. Axtë näägë jyaˈay jyantsy tsyojktëp tijaty yajjaˈäjtypyë Satanás mëdë jyaˈay (Santya̱ˈa̱gʉ 4:4; 1 Fwank 5:19). Mä Biiblyë yaˈijxkijpxyë tukëˈëyë relijyonk diˈib kyaj tyëyˈäjtënëty, mët tuˈugë kujenytyoˈoxy, diˈib pyuwäˈkëbë gobiernë en lugäärë Dios, ets ja yajxëëmoˈoy “Babilonyë mëj käjpn”. Duˈun txëˈäjty tuˈugë käjpn mä tsyondakyë relijyonk diˈib kyaj tyëyˈäjtënëty ko nyajxy ja Ayoˈonduu. Tim tsojkë Dios dyajkutëgoyaˈanyë relijyonk diˈib wyinˈëˈëmbyë naxwinyëdë jäˈäy ets dyaˈˈayoy. (Käjpxë Diˈibʉ Jatanʉp (Apocalipsis) 17:1, 2, 5, 17 etsë 18:8, 23, 24.)

3. ¿Näˈä jyaˈˈatäˈänyë jotkujkˈäjtën abëtsemy nyaxwinyëdë?

Ko Jyobaa dyajkutëgooytyaˈayëdë relijyonk diˈib kyaj tyëyˈäjtënëty, ta dyajminäˈänyë jotkujkˈäjtën yä Naxwiiny. Kyaj nyekyjaˈˈatäˈänyë relijyonk diˈibë jäˈäy wyinˈëënëp ets diˈib yajnaywyäˈkxëdëp. Niˈamukë jäˈäy yëˈëyë yˈawdatandëbë Dios diˈib tëyˈäjtën. (Käjpxë Isaías 11:9; Diˈibʉ Jatanʉp 18:20, 21 etsë 21:3, 4.)

4. ¿Ti mbäädë jäˈäy ttuny diˈib oyë jyot kyorasoon?

Jyobaa myëmääy myëdajpyë oyjyaˈay diˈib yajpattëp mä relijyonk diˈib kyaj tyëyˈäjtënëty. Pääty tyam dyajtuˈukmuky mët ko ttukniˈˈixë ja tëyˈäjtën diˈib yajpatp mä Biiblyë. (Käjpxë Miqueas 4:2, 5.)

Jyobaa yˈaxäjëp xondaˈakyˈää xondaˈakyjyot mä nyax kyäjpn pënaty mëdunanëp. Jiiky mëguˈuk o mëtnaymyaayëbë mbäät kyaj tˈoyˈixtë ko nmëdunäˈänëmë Jyobaa, per nˈaxäjëyäˈänëm mëjwiin kajaa kunuˈkxën: nˈijtëm oy mëdë Dios, njäˈäwëm ja nmëguˈukˈäjtëm diˈib mëët nˈëxpëjkëm extëmë familyë ets nˈawijx njëjpˈijxëm ja jukyˈäjtënë winë xëëbë. (Käjpxë Markʉs 10:29, 30 etsë 2 Korintʉ 6:17, 18.)

Pën mˈaknijawëyaampy, ix mä kapitulo 15 etsë 16 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.

[Yëˈë të dyakyë dibujë diˈib miimp mä pajina 26]

The Complete Encyclopedia of Illustration/J. G. Heck