¿Tiko mbäät nmëbëjkëmë miläägrë diˈibë Biiblyë myaytyakypy?
KO TUˈUGË mëtnaymyaayëbë mdukmëtmaytyäˈägëdët diˈib mëjwiin kajaa të tyuny të jyatyëty, ¿mmëbëkëp? Mbäät xymyëbëky ko xyˈixët wiˈix mdukmëtmaytyaˈagyëty ets pën yaˈixyˈäjtp ko kyaj yˈandaˈaky, ¿këdii? Pën desde ko xyˈixyˈajty xëmë tëyˈäjtën tijaty mdukmëtmaytyaˈagyëty ets ninäˈä mgawinˈëënyëty, ta xymyëbëkët diˈib mdukmëtmaytyakëp.
Nanduˈun jyaty mëdë miläägrë diˈib yajmaytyakp mä Biiblyë. Ëtsäjtëm, kyaj ojts njukyˈäjtëm mä tadë tiempë parë ojts nˈijxëm, per mbäät nbëjkëmë kuentë pën tëyˈäjtën yajmaytyaˈaky o kyaj. ¿Wiˈix? Min nˈokˈijxëm mëgoxk pëky diˈib xytyukˈijxëm ko jantsy tuun jantsy jäjtë.
May ja miläägrë yajtuuny mayjyaˈayoty. Näˈäty, milˈamë jäˈäy tˈijxtë o axtë miyonkˈam (Éxodo 14:21-31; 19:16-19). Kyaj yajtuuny ayuˈutsy ameˈtsyë.
Kyaj yajniwinmäˈäyë. Kyaj yajwoomujkyë jäˈäy parë yˈix jyawëdët mä ja miläägrë yajtunäˈäny. Mayë miläägrë diˈibë Biiblyë myaytyakypy ajotkumonë tyuun jyäjtë o ko jäˈäy tˈamdooy (Markʉs 5:25-29; Lukʉs 7:1-16). Kyaj yajniwinmäˈäyë tyäˈädë miläägrë diˈib tuun jäjtë.
Kyaj ojtsë miläägrë ttundë parë myëkjäˈäytyäˈägäˈändë o parë myëjpëtsëmäˈändë. Pënaty tyuundë miläägrë yëˈë yajmëjpëtsëmandë Dios (Fwank 11:1-4, 15, 40). Ojts yajjëjwijtsëmbittë pënaty tyukganaratandë ja miläägrë (2 Reyes 5:15, 16, 20, 25-27; Apostʉlʉty 8:18-23).
Wiˈixëm ja miläägrë yajtuuny diˈibë naxwinyëdë jäˈäy kyaj tmëmadäˈägët. Extëm nˈokpëjtakëm, ojtsë mejny myony etsë poj, ojtsë nëë jyëmbity binë, ojts myinyë tuu ets nan ojts tyuunaxy, ojts yˈagëdaˈagyë päˈäm jäˈäy ets ojts yˈijxpëktë wiints. Ko tyuunë tyäˈädë miläägrë, yëˈë xytyukˈijxëm ko ja mëjää kyaj tsyoˈony mä naxwinyëdë jäˈäy, pes mbäät ja mëjää tyuun mä oytyim tiijëty (1 Reyes 17:1-7; 18:41-45; Matewʉ 8:24-27; Lukʉs 17:11-19; Fwank 2:1-11; 9:1-7).
Nipën ojts kyajënäˈäny ko kyaj tyuunë miläägrë, ni yëˈë ja myëtsipëty. Ja Jesusë myëtsip kyaj yëˈë dyajtsiptaktë pën tëyˈäjtën ko Lázaro jukypyëjk, pesë Lázaro të nety yˈity taxk xëë jutoty (Fwank 11:45-48; 12:9-11). Ets ko kanäk siiglë nyajxy, ja judiyëty diˈib jyaaytyë Talmud nan kyaj jyënandë ko kyaj tyëyˈäjtënëty ja miläägrë diˈibë Jesus tyuun. Diˈibë duˈun yajtsiptaktë yëˈë mä tsyoˈony ja mëjää. Ets pënaty yajjustisëpatëdë ja Jesusë yˈëxpëjkpëty, kyaj yëˈë tnijawëyandë pën të nety tyuny jyatyëtyë miläägrë, yëˈë duˈun yajtëëwdë: “¿Pën ja mëkˈäjtën të mmoˈoyëdë, o pën xyëëgyëjxm të xyaˈˈagëdäˈäktë tadë tekypyumäˈäy?” (Apostʉlʉty 4:1-13).
Extëm të nˈijxëm, ¿mbäät nmëbëjkëmë miläägrë diˈibë Biiblyë myaytyakypy? Të mëgoxk pëky nˈijxëm parë nmëbëjkëm. Per taanëm kanäk pëky tiko mbäät nmëbëjkëm. Pesë Biiblyë nan myaytyakypy näˈä ets mä tyuun jyäjtë ets pënatyë nety jam yajpatp. Pääty axtë pënaty kyäjpxpatypyë Biiblyë mëjˈixy tjawëdë ko Biiblyë tmaytyaˈaky näˈä meerë tyuun jyäjtë. Kanäk pëky diˈibë Biiblyë ojts tnaskäjpxë duˈun meerë të yˈadëëdäˈäy. Biiblyë kyäjpxwijën nan pyudëjkëbë mëjjäˈäy mutskjäˈäy, oy yˈayoy o myëkjäˈäyëty parë yˈittët oy nixim niyam. Nimää duˈumbë käjpxwijën kyayajpääty.
Pën kyaj mˈity seguurë ko Biiblyë tëyˈäjtën myaytyaˈaky, ¿tiko këkpäät xykyaˈëxpëky? Ko mas niˈigyë xynyijawët, ta mas niˈigyë xymyëbëkët (Fwank 17:17). Ets ko xymyëbëkët ko tuun jäjtë ja miläägrë diˈibë Biiblyë myaytyakypy, ta mas niˈigyë xymyëbëkët ko seguurë tyunäˈäny jyatäˈänyëty tijaty wyandakypy.
[Letrë diˈib miimp mä dibujë mä pajina 5]
Ja Jesusë myëtsip kyaj yëˈë dyajtsiptaktë pën tëyˈäjtën ko Lázaro jukypyëjk