Miläägrë diˈib tim tsojk tunan jatanëp
OKWINMAY ko tam mdimtëkëyanë mä jäˈäy yajtsuky ets ta xynyijawë ko ja doktoor diˈib mtsukanëp kyajnëmë jäˈäy ttimtsuky diˈibë päˈäm myëdäjtypy extëm mijts. ¿Wiˈix mnayjawëdët? Seguurë ko mjantsy myëjotmaybyäädëp. Per koxyëp xynyijawë ko ja doktoor yëˈë të tniˈëxpëkë ets mëgoˈpxˈamë jäˈäy kujk ttsuky, ¿këdii seguurë mnayjawëdët?
Pes tyamë Naxwinyëdë nan päˈäm mëët yajpääty ets tsojkëp tuˈugë doktoorë oybyë diˈib tsukëdëp. Jyobaa të twandaˈaky mä Biiblyë, diˈib yëˈë yˈAyukˈäjtypy, ko Naxwinyëdë dyajjëmbitäˈäny extëm tuˈugë it lugäärë tsujpë (2 Peedrʉ 3:13). Per parë duˈun tyun jyatëdët, tsojkëp jawyiin jyëgaˈagëdë axëkˈäjtën ets jyëjptëgooytyaˈayët (Salmo 37:9-11; Proverbios 2:21, 22). Tyäˈädë Naxwinyëdë ninäˈä mbäät kyajëmbity jantsy tsuj pën kyaj jyëjptëgoyë ayoˈon jotmay diˈib pyatypyë naxwinyëdë jäˈäy. ¡Tsojkëp tyun jyatëdët tuˈugë miläägrë! (Diˈibʉ Jatanʉp [Apocalipsis] 21:4, 5.)
Jyobaa tyestiigëty seguurë yˈittë ko tim tsojk tijaty tyëgatsäˈäny. ¿Tiko? Yëˈko Dios të ttunyë miläägrë diˈib xytyukˈijxëm ko myëdäjtypyë mëjää parë ttunët tijaty të twandaˈaky. Min nˈokˈijxkijpxyëm tëdujkë miläägrë diˈibë Biiblyë myaytyakypy mët diˈib tunan jatanëp.
Mbäät niˈigyë xynyijawë tijatyë Biiblyë wyandakypy. Ko niˈigyë kyëktëkët ja mëbëjkën, ta nanduˈun xyˈawix xyjëjpˈixët parë xytyukˈoyˈatët ja miläägrë diˈibë Jyobaa tim tsojk tyunaampy.
[Rekuäädrë diˈib miimp mä pajina 7]
MILÄÄGRË:
JESUS OJTS DYAJKAY DYAˈUUKY MILˈAMË JÄˈÄY MËT TUˈUK MAJTSKË TSÄJPKAAKY ETSË ÄJKX. (MATEWɄ 14:13-21; MARKɄS 8:1-9; FWANK 6:1-14)
WANDAKËN:
“Yëˈë Naxwinyëdë këˈëmë tyëëm dyakäˈäny; Dios, yëˈë nDiosˈäjtëm, xykyunuˈkxäˈänëm.” (SALMO 67:6)
¿WIˈIX NDUKˈOYˈATÄˈÄNËM?
KYAJ PËNË YUU TNEKYYAJNAXÄˈÄNY.
MILÄÄGRË:
JESUS OJTSË WIINTS DYAˈIJXWAˈKXY. (MATEWɄ 9:27-31; MARKɄS 8:22-26)
WANDAKËN:
“Mä tadë tiempë ja wiints yˈijxpëkäˈäny ets ja nat yˈawäˈätsäˈänyë tyatsk.” (ISAÍAS 35:5)
¿WIˈIX NDUKˈOYˈATÄˈÄNËM?
NIˈAMUKË WIINTS YˈIJXPËKÄˈÄNDË.
MILÄÄGRË:
JESUS OJTS DYAˈOYË JÄˈÄY DIˈIB MÄˈÄT. (MATEWɄ 11:5, 6; FWANK 5:3-9)
WANDAKËN:
“Tadë tekymyäˈät kyëxpatäˈäny mumaty extëmë jatsyuˈu, etsë uum kyäjpxëˈëgäˈäny mëdë xondakën.” (ISAÍAS 35:6)
¿WIˈIX NDUKˈOYˈATÄˈÄNËM?
NIˈAMUKË JÄˈÄY DIˈIB MÄˈÄT YˈOYËYÄˈÄNDË
MILÄÄGRË:
JESUS YAˈˈAGËDAKË JÄˈÄY OY DIˈIBË PÄˈÄM TMËDÄJTY. (MARKɄS 1:32-34; LUKɄS 4:40)
WANDAKËN:
“Ni tuˈuk diˈib tsëënëyäämp kyajënäˈänäˈäny: Pëjkëbëts.” (ISAÍAS 33:24)
¿WIˈIX NDUKˈOYˈATÄˈÄNËM?
TUKËˈËYË PÄˈÄM JYËJPTËGOYAˈANY ETS OY MËK NYAJPÄÄDÄˈÄNËM.
MILÄÄGRË:
JESUS OJTS TMËMADAˈAKY TIJATY MYËDÄJTYPYË MËKˈÄJTËN. (MATEWɄ 8:23-27; LUKɄS 8:22-25)
WANDAKËN:
“Tkojäˈändë jëën tëjk, ets ttuktsëënëyäˈändë; ets tniˈibäˈän tkojäˈändë uubës ets tjëˈxäˈändë tyëëm. Kyaj nanëgoobë tniduungëyäˈändë.” (ISAÍAS 65:21, 23)
“Jagam mˈitäˈäny [...] mä oytyim tiijëty diˈib atsëˈk ajäˈäwëp, mët ko kyaj mmëwingonäˈänyëty.” (ISAÍAS 54:14)
¿WIˈIX NDUKˈOYˈATÄˈÄNËM?
NITII KYANEKYˈAYOˈONBËJTÄˈÄGÄˈÄNY.
MILÄÄGRË:
JESUS OJTS DYAJJUKYPYËKYË OˈKPË. (MATEWɄ 9:18-26; LUKɄS 7:11-17)
WANDAKËN:
“Ja oˈkpëty diˈibë të nyaxtëkëdë [...] jikypyëkëp.” (FWANK 5:28, 29)
“Tam yˈijttë tëgekyë ja oˈkpëty, [...] diˈibë oˈktë mejnyoty [...]. Yëˈë oˈkën esë [jut] të naty nandëˈën dyäjktäˈäytyë ja oˈkpëty tëgekyë diˈibë naty yëˈëjëty myëdäjttëp.” (DIˈIBɄ JATANɄP 20:13, 14)
¿WIˈIX NDUKˈOYˈATÄˈÄNËM?
NIˈAMUKË NJIIKYˈÄJT NMËGUˈUKˈÄJTËM JYUKYPYËKÄˈÄNDË.